കൽപ്പറ്റ: മാനന്തവാടിയിലെ നടവയൽ, കളനാടികൊല്ലി കര്യമ്പാതിയിൽ മധ്യവയസ്കനായ കെ.ജി. ചന്ദ്രനെ (56) തലയ്ക്കടിച്ച് കൊലപ്പെടുത്തിയ കേസിൽ ഭാര്യ ടി.എൻ. ഭവാനി (54) കേണിച്ചിറ പൊലിസിന്റെ പിടിയിലായി. ഞായറാഴ്ച പുലർച്ചെ മൂന്നു മണിയോടെയാണ് ദാരുണമായ സംഭവം നടന്നതെന്ന് പൊലിസ് വെളിപ്പെടുത്തി. ചന്ദ്രന്റെ മരണം തറയിൽ തലയിടിച്ച് വീണുണ്ടായതാണെന്ന ഭവാനിയുടെ വാദം പോസ്റ്റ്മോർട്ടം റിപ്പോർട്ടും പൊലിസിന്റെ ചോദ്യം ചെയ്യലിലും പൊളിയുകയായിരുന്നു.

സംഭവദിവസം, ശുചിമുറിയിലേക്ക് പോകാനായി കട്ടിലിൽനിന്ന് എഴുന്നേറ്റ ചന്ദ്രൻ തറയിൽ തലയിടിച്ച് വീണുവെന്നാണ് ഭവാനി അയൽവാസികളോടും ബന്ധുക്കളോടും പറഞ്ഞത്. തുടർന്ന്, അവർ ചന്ദ്രനെ മാനന്തവാടി മെഡിക്കൽ കോളേജ് ആശുപത്രിയിൽ എത്തിച്ചെങ്കിലും അപ്പോഴേക്കും അദ്ദേഹം മരണപ്പെട്ടിരുന്നു. ആശുപത്രിയിൽ എത്തിയപ്പോൾ ഡോക്ടർമാർ മരണകാരണത്തിൽ സംശയം പ്രകടിപ്പിച്ചതോടെ പൊലിസ് ഭവാനിയെ വിശദമായി ചോദ്യംചെയ്യുകയായിരുന്നു.

പിന്നീട് നടന്ന അന്വേഷണത്തിൽ, ചന്ദ്രന്റെ മരണം കൊലപാതകമാണെന്ന് തെളിയുകയായിരുന്നു. ഭവാനി ടൈൽ കഷണം ഉപയോഗിച്ച് ചന്ദ്രന്റെ തലയ്ക്ക് അടിച്ചാണ് കൊലപ്പെടുത്തിയതെന്ന് പൊലിസിനോട് സമ്മതിച്ചു. സംഭവദിവസം ഇരുവർക്കും ഇടയിൽ കലഹവും വാക്കുതർക്കവും ഉണ്ടായതായും ചന്ദ്രൻ ഭവാനിയെ മർദിച്ചതായും പൊലിസിന് വിവരം ലഭിച്ചു. പോസ്റ്റ്മോർട്ടം റിപ്പോർട്ട് ഈ വാദങ്ങൾ ശരിവെക്കുകയും കേസിൽ നിർണായക തെളിവാകുകയും ചെയ്തു.

കേണിച്ചിറ പൊലിസാണ് ഭവാനിയെ അറസ്റ്റ് ചെയ്ത് റിമാൻഡ് ചെയ്തത്. കേസന്വേഷണം നടത്തിയത് ഇൻസ്പെക്ടർ എസ്.എച്ച്.ഒ. രാജീവ്കുമാർ, സബ് ഇൻസ്പെക്ടർ മഹേഷ്, എ.എസ്.ഐ. ദിലീപ്കുമാർ, സിവിൽ പൊലിസ് ഓഫീസർമാരായ ജിഷ്ണു, സുനിത എന്നിവർ അടങ്ങുന്ന സംഘമാണ്.