തിരുവനന്തപുരം: പൊലിസ് മര്‍ദ്ദനങ്ങളില്‍ പ്രതിഷേധം കടുപ്പിക്കാന്‍ പ്രതിപക്ഷം. പൊലിസുകാരെ സര്‍വീസില്‍ നിന്നും പുറത്താക്കുന്നത് വരെ നിയമസഭയ്ക്ക് മുന്‍പില്‍ അനിശ്ചിതകാല സത്യാഗ്രഹ സമരം പ്രഖ്യാപിച്ചു. എം.എല്‍.എമാരായ എ.കെ.എം അഷ്‌റഫും ടി.ജെ സനീഷ് കുമാറുമാണ് സത്യാഗ്രഹമിരിക്കുക.

കുന്നംകുളം കേസിലെ ഉത്തരവാദികളായ പൊലിസുകാരെ സര്‍വീസില്‍ നിന്ന് പുറത്താക്കണണെന്നും അതുവരെ സമരം തുടരുമെന്നും പ്രതിപക്ഷനേതാവ് വി.ഡി സതീശന്‍ പറഞ്ഞു. 

രൂക്ഷവിമര്‍ശനമാണ് പൊലിസ് മര്‍ദ്ദനങ്ങളില്‍ പ്രതിപക്ഷം സഭയില്‍ ഉന്നയിച്ചത്. എന്തൊരു ക്രൂരമര്‍ദ്ദനമാണ് സുജിത്ത് നേരിട്ടത്. ഈ മര്‍ദ്ദനത്തെ ന്യായീകരിക്കാന്‍ പറ്റുമോ?. പൊലിസിനെ തിരുത്തുന്നതിനു പകരം ദൃശ്യങ്ങള്‍ പുറത്തുവരാതിരിക്കാനാണ് നിങ്ങള്‍ ശ്രമിച്ചത്. പേരൂര്‍ക്കട വ്യാജമോഷണക്കേസ് അടക്കം നിരവധി വിഷയങ്ങള്‍ പ്രതിപക്ഷ നേതാവ് ഉന്നയിച്ചു. കക്കൂസിലെ വെള്ളം കുടിക്കാന്‍ ദളിത് യുവതിയോട് പറഞ്ഞ നാണംകെട്ട പൊലിസാണിവിടെ ഉള്ളത്. അന്തിക്കാട് തോര്‍ത്തില്‍ കരിക്ക് വെച്ചാണ് ഇടിച്ചത്. ഇവന്‍ ആക്ഷന്‍ ഹീറോ ബിജുവാണോ? പൊലിസിനെ ന്യായീകരിക്കുകയാണ് സര്‍ക്കാര്‍ ചെയ്യുന്നതെന്നും പ്രതിപക്ഷ നേതാവ് പറഞ്ഞു. 

ഡിവൈഎഫ്‌ഐ നേതാവിനെ തല്ലിക്കൊന്ന പൊലിസുകാരെയാണ് ഭരണപക്ഷം ന്യായീകരിച്ചത്. പിന്നയൊണോ യൂത്ത് കോണ്‍ഗ്രസ് നേതാവ് പരാതി കൊടുത്താല്‍ നടപടി എടുക്കുന്നത്. ടി.പി വധക്കേസ് പ്രതികള്‍ക്ക് വരെ പൊലീസ് മദ്യം വാങ്ങിച്ചു കൊടുത്തു. തുടര്‍ന്ന് ഇത് സ്റ്റാലിന്റെ റഷ്യയല്ലെന്നും പ്രതിപക്ഷ നേതാവ് മുഖ്യമന്ത്രിയെ ഓര്‍മിപ്പിച്ചു.

നിങ്ങള്‍ സ്റ്റാലിന്‍ ചമയാന്‍ ശ്രമിച്ചാല്‍ അതിനെ ചോദ്യം ചെയ്യും. മൂന്നാം തിയ്യതി മുതല്‍ നിരവധി പരാതികള്‍ ഉയര്‍ന്നിട്ടും മുഖ്യമന്ത്രി മറുപടി പറയാന്‍ തയ്യാറായില്ല. പൊലിസ് ക്രൂരത കാട്ടുമ്പോഴും മുഖ്യമന്ത്രി മൗനം പാലിച്ചുവെന്നും സതീശന്‍ കുറ്റപ്പെടുത്തി.