കാസര്‍കോട്:  രേഖകളില്ലാതെ മണല്‍ കടത്തി പോകുകയായിരുന്ന ഓട്ടോറിക്ഷ പൊലിസ്  പിന്തുടര്‍ന്നപ്പോള്‍ ഉപേക്ഷിച്ചു ഡ്രൈവര്‍ മുങ്ങി. ഇന്നലെ പുലര്‍ച്ചെ തായലങ്ങാടിയില്‍ വാഹനപരിശോധന നടത്തുകയായിരുന്ന പൊലിസ് സംഘം കൈകാണിച്ചെങ്കിലും ഓട്ടോറിക്ഷ നിര്‍ത്താതെ പോവുകയായിരുന്നു.
ഇതേ തുടര്‍ന്ന് ഓട്ടോയെ പൊലിസ് പിന്തുടര്‍ന്നതോടെയാണ്  ഡ്രൈവര്‍ ഓട്ടോ ഉപേക്ഷിച്ച് രക്ഷപ്പെട്ടത്.
തുടര്‍ന്ന്  പൊലിസ് നടത്തിയ പരിശോധനയില്‍ ഓട്ടോയില്‍  നിറയെ മണല്‍ കണ്ടെത്തുകയായിരുന്നു. ഓട്ടോയും മണലും പൊലിസ് കസ്റ്റഡിയില്‍ എടുത്തു.
ഓട്ടോയ്ക്ക് എന്‍ജിന്‍ നമ്പറും ചെയ്‌സ് നമ്പറും ഉണ്ടായിരുന്നില്ല.
ഇതോടെ  മോഷ്ടിച്ചുകൊണ്ടുവന്ന ഓട്ടോയിലാണു മണല്‍ കടത്തിയതെന്ന സംശയം ഉയര്‍ന്നിട്ടുണ്ട്.