അബുദാബി: ഏഷ്യ കപ്പ് ഗ്രൂപ്പ് ഘട്ടത്തിലെ അവസാന മത്സരത്തിലും ഇന്ത്യക്ക് ജയം. ഒമാനെ 21 റൺസിനാണ് ഇന്ത്യ പരാജയപ്പെടുത്തിയത്. മത്സരത്തിൽ ടോസ് നേടി ബാറ്റിങ്‌ തെരഞ്ഞെടുത്ത ഇന്ത്യ എട്ട് വിക്കറ്റ് നഷ്ടത്തിൽ 188 റൺസാണ് നേടിയത്. വിജയലക്ഷ്യം പിന്തുടർന്ന ഒമാൻ ഇന്നിങ്‌സ് നാല് വിക്കറ്റ് നഷ്ടത്തിൽ 167 റൺസിൽ അവസാനിക്കുകയായിരുന്നു. മത്സരത്തിന്റെ ഒരു ഘട്ടത്തിൽ ഒമാൻ വിജയിക്കുമെന്ന് തോന്നിച്ചെങ്കിലും ഇന്ത്യ വിജയം കൈപ്പിടിയിലാക്കുകയായിരുന്നു. 

ഒമാൻ നിരയിൽ ആമിർ കലീം, ഹമ്മദ് മിർസ എന്നിവർ അർദ്ധ സെഞ്ച്വറി നേടി തിളങ്ങി. ആമിർ 44 പന്തിൽ ഏഴ് ഫോറുകളും രണ്ട് സിക്സുകളും അടക്കം 64 റൺസ് നേടി ടീമിന്റെ ടോപ് സ്കോററായി പൊരുതി. 33 പന്തിൽ 51 റൺസാണ് മിർസ നേടിയത്. അഞ്ചു ഫോറുകളും രണ്ട് സിക്സുകളും അടങ്ങുന്നതാണ് താരത്തിന്റെ പ്രകടനം. ക്യാപ്റ്റൻ ജതീന്ദർ സിംഗ് 33 പന്തിൽ 32 റൺസ് നേടി. അഞ്ചു ഫോറുകളാണ് താരം നേടിയത്. 

ഇന്ത്യൻ ബൗളിങ്ങിൽ കുൽദീപ് യാദവ്, ഹർഷിദ് റാണ, ഹർദിക് പാണ്ഡ്യാ, അർഷദീപ് സിങ് എന്നിവർ ഓരോ വിക്കറ്റ് വീതം സ്വന്തമാക്കി. 

അർദ്ധ സെഞ്ച്വറി നേടിയ സഞ്ജു സാംസണാണ് ഇന്ത്യൻ നിരയിലെ ടോപ് സ്‌കോറർ. ത്സരത്തിൽ 45 പന്തിൽ 56 റൺസ് നേടിയാണ് സഞ്ജു ഇന്ത്യൻ ടീമിന്റെ ടോപ് സ്കോററായത്. മൂന്ന് വീതം ഫോറുകളും സിക്സുകളും ആണ് സഞ്ജു അടിച്ചെടുത്തത്.

അഭിഷേക് ശർമ്മ 15 പന്തിൽ 38 റൺസ് നേടി മികച്ച പ്രകടനം നടത്തി. അഞ്ചു ഫോറുകളും രണ്ട് സിക്സുകളും ആണ് താരം നേടിയത്. തിലക് വർമ്മ 18 പന്തിൽ 29 റൺസും അക്‌സർ പട്ടേൽ 13 പന്തിൽ 26 റൺസും നേടി നിർണായകമായി.

 ഒമാൻ ബൗളിങ്ങിൽ ആമിർ കലീം, ജിതേൻകുമാർ രാമാനന്ദി, ഫൈസൽ ഷാ എന്നിവർ രണ്ട് വിക്കറ്റുകൾ വീതം നേടി മികച്ച പ്രകടനം നടത്തി.