മുക്കം: കാരശേരി ഗ്രാമപഞ്ചായത്തിലെ പട്ടര്‍ ചോലയില്‍ വീട്ടിലേക്ക് ലോറി പാഞ്ഞുകയറി വീട് തകര്‍ന്നു. പട്ടര്‍ ചോല നൂറുല്‍ ഹുദ മദ്‌റസാ സദര്‍ മുഅല്ലിം അബ്ദുല്‍ ഗഫൂര്‍ മൗലവിയുടെ വീട്ടിലേക്കാണ്  ചൊവ്വാഴ്ച്ച രാവിലെ 7.30 ഓടെ ചെങ്കല്‍ ലോറി നിയന്ത്രണം വിട്ട് പിന്നോട്ട് ഓടി വീട്ടിലേക്ക് പാഞ്ഞുകയറിയത്. പ്രദേശത്തെ ചെങ്കല്‍ ക്വാറിയില്‍ നിന്നും ഫുള്‍ലോഡ് ചെങ്കല്ലുമായി വന്ന ലോറി കയറ്റം കയറുന്നതിനിടെ ബ്രേക്ക് പോയി നിയന്ത്രണം വിടുകയായിരുന്നു.
വലിയ ദുരന്തം ഒഴിവായ ആശ്വാസത്തിലാണ് നാട്ടുകാര്‍. ഇടിയില്‍ വീടിന്റെ മുന്‍ഭാഗം പൂര്‍ണമായും തകര്‍ന്നിട്ടുണ്ട്. വീടിന്റെ ചുമരുകള്‍ക്ക് മൊത്തമായും ഇളക്കം സംഭവിച്ചതിനാല്‍ അപകട ഭീഷണിയിലാണ്. വീട് പൂര്‍ണമായും പൊളിച്ച് പുനര്‍ നിര്‍മിക്കേണ്ട അവസ്ഥയാണുള്ളത്.
വാര്‍ഡ് മെമ്പര്‍ പി.പി ശിഹാബ്, റവന്യു അധികൃതര്‍, മുക്കം റെയ്ഞ്ച് ജംഇയ്യത്തുല്‍ മുഅല്ലിമീന്‍ പ്രസിഡന്റ് കബീര്‍ സഖാഫി, ജന.സെക്രട്ടറി അംജദ് ഖാന്‍ റഷീദി എന്നിവരുടെ നേതൃത്വത്തില്‍ റെയ്ഞ്ച് നേതാക്കള്‍ സ്ഥലം സന്ദര്‍ശിച്ചു.