കിഴിശ്ശേരി: തെരുവു നായ്ക്കളുടെ ആക്രമണത്തിനു പിറകെ കുറുക്കന്മാരുടെ ശല്യവും രൂക്ഷമായി. കിഴിശ്ശേരി പുളിയക്കോട് ആക്കപ്പറമ്പില്‍ സ്ത്രീ ഉള്‍പ്പെടെ മൂന്നു പേരെയാണു കുറുക്കന്‍ അക്രമിച്ചത്. കോഴിപ്പള്ളി സുകുമാരന്‍, മുള്ളമടക്കല്‍ ഉസ്മാന്‍, കോട്ട അബ്ദു റഹ്മാന്റെ ഭാര്യ ഖദീജ എന്നിവരാണു കുറുക്കന്റെ അക്രമത്തിന് ഇരയായത്.
ഇന്നലെ രാവിലെ 11നാണ് ആക്കപ്പറമ്പില്‍ കുറുക്കന്റെ പരാക്രമം നടന്നത്. ആടിനെ മേയ്ക്കുമ്പോഴാണു ഖദീജയെ കുറുക്കന്‍ അക്രമിച്ചത്. പറമ്പില്‍ പണിയെടുത്തുകൊണ്ടിരിക്കുകയായിരുന്ന ഉസ്മാനേയും കുറുക്കന്‍ അക്രമിച്ചു. വീടിന്റെ പരിസരത്തു വെച്ചാണു സുകുമാരന്‍ അക്രമിക്കപ്പട്ടത്. ഇവരെ അക്രമിച്ചതിനു ശേഷം ഇതേ കുറുക്കന്‍ പ്രദേശത്തെ മൂന്ന് ആടുകളെയും കടിച്ചു. കുറുക്കന്റെ അക്രമത്തില്‍ പരുക്കേറ്റ മൂന്നുപേരും മഞ്ചേരി മെഡിക്കല്‍ കൊളജ് ആശുപത്രിയില്‍ ചികിത്സ തേടി. പരുക്കു മാരകമായതിനാല്‍ ഖദീജയെ അഡ്മിറ്റ് ചെയ്തിരിക്കുകയാണ്.
നാട്ടിന്‍പുറങ്ങളില്‍ കുറുക്കന്‍മാരുടെ ശല്യം പെരുകിവരുകയാണ്. തെരുവു നായ്ക്കളെ ഭയന്നു കഴിയുന്ന ജനങ്ങള്‍ക്കു കുറുക്കന്‍മാര്‍ വലിയ ശല്യമായി മാറിയിട്ടുണ്ട്. മുതിര്‍ന്നവര്‍ പോലും വീടിനു പുറത്തിറങ്ങാന്‍ കഴിയാത്ത അവസ്ഥയിലാണ്.