ചെന്നൈ: കരൂര്‍ ദുരന്തത്തില്‍ മൗനം വെടിഞ്ഞ് ടി.വി.കെ അധ്യക്ഷന്‍ വിജയ്. മനസില്‍ വേദന മാത്രമാണെന്നും ഇത്രയും വേദന ഇതിനുമുന്‍പുണ്ടായിട്ടില്ലെന്നും വിജയ് പറഞ്ഞു. സമൂഹമാധ്യത്തിലൂടെയാണ് വിജയ് വീഡിയോ സന്ദേശം പുറത്തുവിട്ടത്. നേരത്തെ ദുരന്തത്തിന് പിന്നാലെ ഹൃദയം തകര്‍ന്നിരിക്കുകയാണെന്ന ചെറിയ കുറിപ്പ് മാത്രമാണ് വിജയ് പങ്കുവെച്ചിരുന്നത്. സംഭവത്തില്‍ ഗൂഢാലോചനയുണ്ടെന്ന ആരോപണവും വിജയ് പങ്കുവെച്ചു. 

കരൂര്‍ ദുരന്തത്തില്‍ പാര്‍ട്ടി പ്രവര്‍ത്തകരെ വേട്ടയാടരുതെന്നും കുറ്റം തന്റെമേല്‍ വെച്ചോളൂ എന്നും താന്‍ എന്തും ഏറ്റെടുക്കാന്‍ തയ്യാറാണെന്നും മുഖ്യമന്ത്രി എം.കെ സ്റ്റാലിനോട് അഭ്യര്‍ഥിച്ചു. കുടുംബാംഗങ്ങളെ നഷ്ടപ്പെട്ടവരുടെ വേദനയില്‍ പങ്കുചേരുന്നു. നടക്കാന്‍ പാടില്ലാത്തതാണ് നടന്നത്. ഞാനും മനുഷ്യനാണ്. ഇത്രയും ആളുകള്‍ക്ക് ദുരിതം ബാധിക്കുമ്പോള്‍ എങ്ങനെയാണ് എനിക്ക് നാടുവിടാനാകുക. ആളുകള്‍ റാലിക്കെത്തിയത് എന്നോടുള്ള സ്നേഹംകൊണ്ടാണ്. ആശുപത്രിയില്‍ പോയാല്‍ കൂടുതല്‍ പ്രശ്‌നമുണ്ടാകുമായിരുന്നു. അതിനാലാണ് പോകാത്തത്. പരുക്കേറ്റവരെ എത്രയും പെട്ടന്ന് കാണുമെന്നും അദ്ദേഹം പറഞ്ഞു. 

ALSO READ: കരൂര്‍ ദുരന്തം: ടി.വി.കെ പ്രാദേശിക നേതാവ് ജീവനൊടുക്കി; മതിയായ സുരക്ഷയൊരുക്കാത്തതിന് പിന്നില്‍ മുന്‍ മന്ത്രി സെന്തില്‍ ബാലാജിയെന്ന് ആത്മഹത്യാ കുറിപ്പ്

പൊതുജനങ്ങള്‍ക്ക് എല്ലാ സത്യവും മനസിലാവും. അഞ്ച് ജില്ലകളില്‍ ഒരു കുഴപ്പവും ഉണ്ടായിട്ടില്ല. കരൂരില്‍ മാത്രം എന്തുകൊണ്ട് ഇത് സംഭവിച്ചു. തെറ്റൊന്നും ചെയ്തിട്ടില്ല. എന്നിട്ടും പാര്‍ട്ടി പ്രവര്‍ത്തകര്‍ക്കും സമൂഹമാധ്യമത്തില്‍ സംസാരിച്ചവര്‍ക്കുമെതിരെ കേസെടുത്തെന്നും വിജയ് പറഞ്ഞു. 

അതിനിടെ, കരൂര്‍ ദുരന്തത്തില്‍ തമിഴ്നാട് പൊലിസ് ആദ്യ അറസ്റ്റ് രേഖപ്പെടുത്തി. തമിഴക വെട്രി കഴകം വെസ്റ്റ് ജില്ലാ സെക്രട്ടറി മതിയഴകനെയാണ് പൊലിസ് അറസ്റ്റ് ചെയ്തത്. ഇയാള്‍ക്കെതിരെ അഞ്ച് വകുപ്പുകളാണ് നിലവില്‍ ചുമത്തിയിട്ടുള്ളത്. അപകടമുണ്ടായതു മുതല്‍ ഒളിവിലായിരുന്ന മതിയഴകനെ അറസ്റ്റ് ചെയ്ത പൊലിസ് കൂടുതല്‍ അറസ്റ്റിലേക്ക് കടക്കുമെന്നാണ് സൂചന.

കരൂര്‍ ദുരന്തത്തില്‍ ടി.വി.കെക്കും വിജയിക്കുമെതിരെ ഗുരുതര കുറ്റങ്ങള്‍ ചുമത്തിയാണ് എഫ്.ഐ.ആര്‍ ഇട്ടിരിക്കുന്നത്. ഉച്ചയ്ക്ക് തുടങ്ങേണ്ട റാലിയില്‍ മനഃപൂര്‍വം മണിക്കൂറുകള്‍ വൈകിയെത്തിയ വിജയ് പരിപാടിയെ ജനക്കൂട്ടത്തെ ആകര്‍ഷിക്കാനുള്ള ഉപാധിയായും ശക്തി പ്രകടനമായും കണ്ടത് അപകടത്തിന് കാരണമായതായി എഫ്.ഐ.ആറില്‍ ചൂണ്ടികാട്ടുന്നുണ്ട്.  അതിനിടെ, 41 പേരുടെ മരണത്തിന് കാരണമായ ദുരന്തത്തില്‍ വിജയ് യെയും അറസ്റ്റ് ചെയ്യണമെന്ന് ആവശ്യപ്പെട്ടുള്ള പോസ്റ്ററുകള്‍ തമിഴ്നാട്ടിലെ വിവിധ ഇടങ്ങളില്‍ പ്രത്യക്ഷപ്പെട്ടിട്ടുണ്ട്.

English Summary: Tamil actor and TVK (Tamizhaga Vetri Kazhagam) chief Vijay has broken his silence over the Karur tragedy, calling it the most painful experience of his life. In an emotional video statement shared on social media, Vijay said he is deeply saddened and hinted at a possible conspiracy behind the incident.