തിരുവനന്തപുരം: ടിക്കറ്റ് വരുമാനത്തിൽ രണ്ടാമത്തെ ഉയർന്ന പ്രതിദിന കളക്ഷൻ സ്വന്തമാക്കി കെഎസ്ആർടിസി. രണ്ടാമത്തെ ഉയർന്ന കളക്ഷനായി ഒക്ടോബർ ആറിന് 9.41 കോടി തുകയാണ് നേടിയതെന്നാണ് മന്ത്രി കെബി ഗണേഷ് കുമാർ അറിയിച്ചത്. എക്കാലത്തെയും മികച്ച പ്രതിദിന ടിക്കറ്റ് വരുമാനം കെഎസ്ആർടിസി നേടിയത് സെപ്റ്റംബർ ഏട്ടിനാണ്. 10.19 കോടിയാണ് കെഎസ്ആർടിസി സ്വന്തമാക്കിയത്. കെബി ഗണേഷ് കുമാർ തന്റെ ഫേസ്ബുക്ക് അക്കൗണ്ടിലൂടെയാണ് ഇക്കാര്യം അറിയിച്ചത്.

കെബി ഗണേഷ് കുമാറിന്റെ ഫേസ്ബുക് പോസ്റ്റിന്റെ പൂർണരൂപം

06.10.2025-ൽ കെ.എസ്.ആർ.ടി.സി-ക്ക് ചരിത്രത്തിലെ രണ്ടാമത്തെ ഉയർന്ന കളക്ഷൻ 9.41 കോടി രൂപ. കെ.എസ്.ആർ.ടി.സി ജീവനക്കാരെയും യാത്രക്കാരെയും അനുമോദിക്കുന്നു..

കെ.എസ്.ആർ.ടി.സി 06.10.2025-ൽ ചരിത്രത്തിലെ രണ്ടാമത്തെ ഏറ്റവും ഉയർന്ന പ്രതിദിന ടിക്കറ്റ് വരുമാന നേട്ടം 9.41 കോടി രൂപ കൈവരിച്ചു. ഈ വർഷം തന്നെ സെപ്റ്റംബർ എട്ടാം തീയതിയാണ് എക്കാലത്തെയും മികച്ച ടിക്കറ്റ് വരുമാന നേട്ടമായ 10.19 കോടി രൂപ നേടാനായത്. 06.10.2025-ന് രണ്ടാമത്തെ പ്രതിദിന ഉയർന്ന വരുമാനമായ 9.41 കോടി രൂപ നേടുവാനായി.

പരമാവധി യാത്രക്കാരെ ബസുകളിൽ കയറ്റി കളക്ഷൻ വർദ്ധിപ്പിക്കാൻ  സഹകരിച്ച കെ.എസ്.ആർ.ടി.സി ജീവനക്കാരെയും അതിന്‌ നേതൃത്വം നൽകിയ സി.എം.ഡി അടക്കമുള്ള ഓഫീസർമാരെയും ഉദ്യോഗസ്ഥരെയും ആത്മാർത്ഥമായി സഹകരിച്ച കെഎസ്ആർടിസി-യിലെ ട്രേഡ് യൂണിയനുകളെയും അഭിനന്ദിക്കുന്നു.
 
കെ.എസ്.ആർ.ടി.സിയെ ഉത്തമമായ യാത്രാമാർഗ്ഗമായി സ്വീകരിച്ച് യാത്രയ്ക്കായി ഉപയോഗിച്ച കേരളത്തിലെ നല്ലവരായ യാത്രക്കാർക്കും  നന്ദി അറിയിക്കുന്നു. 

കെ.എസ്.ആർ.ടി.സി ബസ്സുകൾ കൃത്യമായി ഓടിക്കുവാനും നല്ല സേവനം നൽകുവാനും യാത്രക്കാരെ ആകർഷിക്കുന്ന രീതിയിൽ ശുചിത്വത്തോടെ കൊണ്ടുനടക്കുവാനും ജീവനക്കാർ കാണിക്കുന്ന സന്മനസ്സ് അഭിനന്ദാർഹമാണ്...