വാണിയംകുളം: സമൂഹിക മാധ്യമത്തില്‍ പോസ്റ്റിട്ട ഡി.വൈ.എഫ്.ഐ മുന്‍ നേതാവിന് ക്രൂരമര്‍ദ്ദനം. ഗുരുതരമായി പരുക്കേറ്റ പനയൂര്‍ സ്വദേശി വിനേഷ് ആശുപത്രിയില്‍ വെന്റിലേറ്ററില്‍ നിരീക്ഷണത്തിലാണ്. വിനേഷിന്റെ തലയിലേറ്റ പരുക്ക് ഗുരുതരമാണെന്നും ശരീരത്തില്‍ നിരവധി പരുക്കുകള്‍ ഉള്ളതായും പൊലിസ് പറയുന്നു. 

ഇന്നലെ വാണിയംകുളത്തായിരുന്നു സംഭവം. ഡി.വൈ.എഫ്.ഐ ബ്ലോക്ക് സെക്രട്ടറിയുടെ ഫേസ്ബുക്ക് പോസ്റ്റിന് താഴെ കമന്റിട്ടതിനെ ചൊല്ലിയുണ്ടായ തര്‍ക്കമാണ് ആക്രമണത്തില്‍ കലാശിച്ചത്. ഡി.വൈ.എഫ്.ഐ ഷൊര്‍ണൂര്‍ ബ്ലോക്ക് ഭാരവാഹികളുടെ നേതൃത്വത്തിലാണ് ക്രൂരമര്‍ദ്ദനമെന്നാണ് പൊലിസ് പറയുന്നത്. 

ALSO READ: കണ്ണൂരില്‍ അര്‍ധരാത്രിയില്‍ സ്‌ഫോടനം; വീടുകളുടെ ജനല്‍ചില്ലുകള്‍ തകര്‍ന്നു; പിന്നില്‍ ബി.ജെ.പിയെന്ന് ആരോപണം

മര്‍ദ്ദനമേറ്റ് അവശനായ വിനേഷിനെ അജ്ഞാതര്‍ ഓട്ടോയില്‍ വീട്ടിലെത്തിക്കുകയായിരുന്നു. വീട്ടുകാര്‍ വാതില്‍ തുറന്നപ്പോള്‍ രക്തത്തില്‍ കുളിച്ച വിനേഷിനെയാണ് കണ്ടത്. ഉടന്‍ തന്നെ വീട്ടുകാര്‍ ആശുപത്രിയിലെത്തിക്കുകയായിരുന്നു. നിലവില്‍ വിനേഷിന്റെ ആരോഗ്യനില ഗുരുതരമാണെന്നാണ് വിവരം. ഒരു ശസ്ത്രക്രിയ പൂര്‍ത്തിയാക്കിയതായും ആശുപത്രി അധികൃതര്‍ വ്യക്തമാക്കി. 

ഡി.വൈ.എഫ്.ഐ മുന്‍ മേഖല സെക്രട്ടറിയേറ്റ് അംഗമായിരുന്നു വിനേഷ്. സംഘടനാ നടപടികളുടെ ഭാഗമായി നാലുവര്‍ഷം മുന്‍പ് വിനേഷിനെ പാര്‍ട്ടിയില്‍ നിന്ന് ഒഴിവാക്കിയിരുന്നു. മജിസ്‌ട്രേറ്റ് ആശുപത്രിയിലെത്തി വിനേഷിന്റെ മൊഴിയെടുത്തു.അതേസമയം, കേസിലെ പ്രതികള്‍ കോഴിക്കോട് നിന്നും പിടിയിലായതായി സൂചനയുണ്ട്. 

English Summary: A former DYFI leader, Vinesh from Panayur, was brutally assaulted after allegedly commenting on a Facebook post made by the DYFI block secretary. The attack took place in Vaniyamkulam, and Vinesh is currently on a ventilator in critical condition, having suffered severe head injuries and multiple wounds.