കൊല്ലം: ആന്ധ്രയില്‍ 700 കോടി രൂപ ചെലവില്‍ കശുമാവ് കൃഷി നടത്തുമെന്ന മന്ത്രി ജെ.മേഴ്‌സിക്കുട്ടിയമ്മയുടെ പ്രഖ്യാപനം ചുളുവിനു അഴിമതി നടത്താനുള്ള നീക്കത്തിന്റെ ഭാഗമാണെന്നു കൊല്ലം ഡി.സി.സി പ്രസിഡന്റായ കൊടിക്കുന്നില്‍ സുരേഷ് വാര്‍ത്താ സമ്മേളനത്തില്‍ ആരോപിച്ചു. ഇങ്ങയൊരു തീരുമാനം നടത്തണമെങ്കില്‍ ചര്‍ച്ച നടത്തുകയും സുതാര്യമായിരിക്കുകയും വേണം. ഇക്കാര്യത്തില്‍ ആന്ധ്രാ സര്‍ക്കാരുമായി എന്തു കരാറാണ് നടത്തിയതെന്നു മന്ത്രി വ്യക്തമാക്കണം.

കടലില്‍ കല്ലിടുന്നതിനു തുല്ല്യമാണ് ആന്ധ്രയില്‍ കശുമാവ് കൃഷി നടത്തുമെന്നു പറയുന്നതെന്നു കൊടിക്കുന്നില്‍ പറഞ്ഞു. കശുവണ്ടി മേഖലയില്‍ കഴിഞ്ഞ 41 വര്‍ഷക്കാലത്തിനിടിയില്‍ ആദ്യമായാണ് ബോണസ് പരിധി ഉയര്‍ത്താതിരുന്നത്. കഴിഞ്ഞ യു.ഡി.എഫ് സര്‍ക്കാര്‍ നല്‍കിയ 8500 രൂപ മാത്രമാണ് ഇത്തവണ കശുവണ്ടി തൊഴിലാളികള്‍ക്കു ബോണസായി നല്‍കിയത്. ശതമാനം തീരുമാനിക്കാതെ ബോണസ് ഏര്‍പ്പെടുത്തിയതുമൂലം തൊഴിലാളികള്‍ക്കു രണ്ടരശതമാനം തുക ഇത്തവണ നഷ്ടമായി. കശുവണ്ടി മുതലാളിമാര്‍ക്ക് അനുകൂലമായി ബോണസ് കാര്യത്തില്‍ മന്ത്രി തീരുമാനമെടുത്തിരിക്കുകയാണ്.

വിമാന കമ്പനികളെപ്പോലെ തുരന്തോ, രാജധാനി, ശതാബ്ദി എക്‌സ്പ്രസ് ട്രെയിനുകളില്‍ ടിക്കറ്റ് ചാര്‍ജ്ജ് വര്‍ധിപ്പിക്കാനുള്ള കേന്ദ്രതീരുമാനം തീവെട്ടിക്കൊള്ളയാണെന്നും ഇതു മോദി സര്‍ക്കാരിന്റെ ഓണസമ്മാനമാണെന്നും കൊടിക്കുന്നില്‍ പറഞ്ഞു. മന്ത്രി കെ.ബാബുവിനെതിരെയുള്ള വിജിലന്‍സ് കേസില്‍ പാര്‍ട്ടിയുടെ അഭിപ്രായം രാഷ്ട്രീയ കാര്യസമിതി ചര്‍ച്ച ചെയ്തു തീരുമാനിക്കും. കൊല്ലം ഡി.സി.സിയുടെ ആഭിമുഖ്യത്തില്‍ ശ്രീനാരായണഗുരുവിന്റെ 'നമുക്കു ജാതിയില്ല' വിളംബരത്തിന്റെ ശതാബ്ദി ആഘോഷം നാളെ കൊല്ലത്തു കര്‍ണാടക മുന്‍ മുഖ്യമന്ത്രി വീരപ്പമൊയ്‌ലി ഉദ്ഘാടനം ചെയ്യും. കെ.പി.സി.സി പ്രസിഡന്റ് വി.എം സുധീരന്‍ അധ്യക്ഷത വഹിക്കുമെന്നും കൊടിക്കുന്നില്‍ പറഞ്ഞു.