തിരുവനന്തപുരം: ശബരിമല സ്വര്‍ണക്കൊള്ളയില്‍ സി.പി.എമ്മും സര്‍ക്കാരും ആരോപണങ്ങള്‍ നേരിടുമ്പോള്‍ പത്തനംതിട്ട ആറന്‍മുള വള്ളസദ്യയിലെ ആചാരലംഘന ആരോപണത്തില്‍ ഭഗവാനെ പിടിച്ച് ആണയിട്ട് സി.പി.എം. അഷ്ടമിരോഹിണി വള്ളസദ്യയില്‍ മന്ത്രിക്ക് സദ്യവിളമ്പിയത് ആചാരം ലംഘിച്ചാണെന്ന ആരോപണത്തിനാണ് ഭഗവാന്റെ പേരിലുള്ള സി.പി.എമ്മിന്റെ മറുപടി. പാര്‍ട്ടി നിലപാടുകള്‍ പ്രഖ്യാപിക്കാന്‍ ഭഗവാന്റെ സഹായം തേടുന്നതിന് പിന്നില്‍ സി.പി.എമ്മിന്റെ നയവ്യതിയാനമാണെന്ന വിമര്‍ശനമുയർന്നിട്ടുണ്ട്. 

2013 നവംബര്‍ 27 മുതല്‍ 29 വരെ നടന്ന സി.പി.എമ്മിന്റെ പാലക്കാട് പ്ലീനത്തില്‍ വിശ്വാസ ആചാരങ്ങള്‍ അനുഷ്ഠിക്കുന്നത് വൈരുധ്യാത്മക ഭൗതിക വാദത്തിന് എതിരാണെന്ന പാര്‍ട്ടി വിലയിരുത്തലിന്റെ ലംഘനമാണ് ആറന്‍മുള സംഭവത്തെ തുടര്‍ന്നുള്ള ആണയിടല്‍. 

ഒരു വ്യാഴവട്ടക്കാലം കഴിഞ്ഞപ്പോഴേക്കും ഭഗവാന്റെ പേരില്‍ കള്ളം പറഞ്ഞാല്‍ ഭഗവാന്‍ ഒരിക്കലും പൊറുക്കില്ലെന്ന് പറഞ്ഞ് ആണയിടാന്‍ വരെ പാര്‍ട്ടി തയ്യാറായത് പാര്‍ട്ടി അനുയായികളെയും ഞെട്ടിച്ചിട്ടുണ്ട്. ഈശ്വരനാമത്തില്‍ നിയമസഭാംഗങ്ങളായി സത്യപ്രതിജ്ഞചെയ്ത പാര്‍ട്ടി അംഗങ്ങളെ പരസ്യശാസനയ്ക്ക് വിധേയമാക്കിയ സി.പി.എം ആണിപ്പോള്‍ ദൈവത്തിന്റെ വഴിയെ നീങ്ങുന്നത്. 

സെപ്റ്റംബര്‍ 14ന് നടന്ന ആറന്‍മുള വള്ളസദ്യ സംബന്ധിച്ച വിവാദത്തെ തുടര്‍ന്ന് സി.പി.എം പത്തനംതിട്ട ജില്ലാകമ്മിറ്റി പുറത്തിറക്കിയ ഫെയ്‌സ്ബുക്ക് പോസ്റ്റിലാണ് 'ഭഗവാന്റെ പേരില്‍ കള്ളം പറഞ്ഞാല്‍ ഭഗവാന്‍ ഒരിക്കലും പൊറുക്കില്ലെന്ന് ഓര്‍ക്കുന്നത് നന്ന്' എന്ന വാചകം ഉള്ളത്.

സദ്യയില്‍ ആചാരലംഘനം നടന്നതായി കാണിച്ച് തന്ത്രി ദേവസ്വം ബോര്‍ഡിന് കത്ത് നല്‍കിയത് വിവാദമായതോടെയാണ് സി.പി.എം ഭഗവാനെ കൂട്ടുപിടിച്ചത്. ദേവസ്വം മന്ത്രി വി.എന്‍ വാസവനായിരുന്നു വള്ളസദ്യ ഉദ്ഘാടനം ചെയ്തത്. ദേവന് നേദിക്കുന്നതിനു മുമ്പ് മന്ത്രിക്കും മറ്റ് വിശിഷ്ട വ്യക്തികള്‍ക്കും വള്ളസദ്യ വിളമ്പിയെന്നായിരുന്നു തന്ത്രിയുടെ ആക്ഷേപം. പരിഹാരക്രിയകള്‍ പരസ്യമായിത്തന്നെ വേണമെന്നാണ് തന്ത്രിയുടെ നിര്‍ദേശം. 

പരിഹാരക്രിയയുടെ ഭാഗമായി വള്ളസദ്യയുടെ നടത്തിപ്പ് ചുമതലക്കാരായ പള്ളിയോട സേവാസംഘത്തിന്റെ മുഴുവന്‍ പ്രതിനിധികളും ക്ഷേത്ര ഉപദേശക സമിതി അംഗങ്ങളും ഭരണസമിതി അംഗങ്ങളും പരസ്യമായി ദേവനു മുമ്പില്‍ ഉരുളിവച്ച് എണ്ണപ്പണം സമര്‍പ്പിക്കണമെന്നും കത്തിലുണ്ട്. സെപ്റ്റംബര്‍ 14നായിരുന്നു വാസവന്‍ പങ്കെടുത്ത വള്ളസദ്യ നടന്നത്. ഈ മാസം 12നാണ് ഇക്കാര്യങ്ങളെല്ലാം ചൂണ്ടിക്കാട്ടി തന്ത്രി പരമേശ്വരന്‍ വാസുദേവന്‍ ഭട്ടതിരിപ്പാട് ബോര്‍ഡിന് കത്ത് നല്‍കിയത്.