കോട്ടയം: ശാഖയില്‍ ലൈംഗിക പീഡനത്തിനിരയായെന്ന് വെളിപ്പെടുത്തി യുവാവ് ജീവനൊടുക്കിയ കേസില്‍ ആര്‍.എസ്.എസ് പ്രവര്‍ത്തകന്‍ നിധീഷ് മുരളിധരനെ പൊലിസ് അറസ്റ്റ് ചെയ്‌തേക്കും. ഇയാള്‍ക്കായി അന്വേഷണം വ്യാപിപ്പിച്ചിരിക്കുകയാണ് പൊലിസ്. 

ആര്‍.എസ്.എസ് ശാഖയിലെ ലൈംഗികാതിക്രമത്തെ തുടര്‍ന്ന് ആത്മഹത്യ ചെയ്ത കോട്ടയം സ്വദേശി അനന്തു അജിയുടെ ഇന്‍സ്റ്റാഗ്രാം വീഡിയോ കഴിഞ്ഞ ദിവസം പുറത്തുവന്നിരുന്നു. മരണത്തിന് മുന്‍പ് ഷെഡ്യൂള്‍ ചെയ്തുവെച്ച വീഡിയോ ആണ് പുറത്തുവന്നത്. തന്നെ നിരന്തരമായി പീഡനത്തിന് ഇരയാക്കിയ വ്യക്തിയുടെ പേര് വെളിപ്പെടുത്തുന്നതാണ് വീഡിയോ. NM എന്ന പേരില്‍ നേരത്തെ ആതാഹത്യാകുറിപ്പില്‍ പറഞ്ഞിരുന്ന വ്യക്തി ആര്‍എസ്എസ് നേതാവായ നിധീഷ് മുരളീധരന്‍ ആണെന്ന് വീഡിയോയില്‍ അനന്തു അജി വ്യക്തമാക്കുന്നുണ്ട്.

മരണ മൊഴിയെന്ന പേരില്‍ വീഡിയോ പുറത്തുവന്ന സാഹചര്യത്തില്‍ യുവാവിന്റെ ബന്ധുക്കളുടെയും സുഹൃത്തുക്കളുടെയും മൊഴി വീണ്ടും രേഖപ്പെടുത്തുമെന്നും പൊലിസ് വ്യക്തമാക്കി.ഒസിഡി രോഗത്തിന് യുവാവ് ചികിത്സ തേടിയ രണ്ടു ഡോക്ടര്‍മാരുടെ മൊഴി തിരുവനന്തപുരം തമ്പാനുര്‍ പൊലിസ് രേഖപ്പെടുത്തി. 

കഴിഞ്ഞ ദിവസമാണ് കോട്ടയം പൊന്‍കുന്ന് വഞ്ചിമല ചാമക്കാലായില്‍ അനന്തു അജിയെ തിരുവനന്തപുരത്തെ ലോഡ്ജ് മുറിയില്‍ മരിച്ച നിലയില്‍ കണ്ടെത്തിയത്. നാലു വയസുമുതല്‍ പരിസരവാസിയായ ആര്‍എസ്എസുകാരനില്‍ നിന്ന് നിരന്തര ലൈംഗികാതിക്രമത്തിന് വിധേയനായതായി അനന്തു തന്റെ ആത്മഹത്യ കുറിപ്പില്‍ വ്യക്തമാക്കിയിരുന്നു. ആര്‍എസ്എസ് ശാഖയില്‍ നിന്നടക്കം ലൈംഗികമായി പീഡിപ്പിക്കപ്പെട്ടെന്നും, ഒരിക്കലും ഒരു ആര്‍എസ്എസുകാരനുമായും നിങ്ങള്‍ സൗഹൃദത്തിലാവരുതെന്നും അനന്തു വെളിപ്പെടുത്തിയിരുന്നു. തന്റെ ഇന്‍സ്റ്റഗ്രാം പോസ്റ്റിലാണ് ഗുരുതര വെളിപ്പെടുത്തല്‍ നടത്തിയത്. 

ALSO READ: ആർഎസ്എസ് ശാഖയിൽ പീഡനത്തിന് ഇരയാക്കിയ 'NM' നിധീഷ് മുരളീധരൻ; അനന്തു അജിയുടെ ഇൻസ്റ്റാഗ്രാം വീഡിയോ പുറത്ത്

നാല് വയസ് മുതല്‍ ആര്‍.എസ്.എസുകാര്‍ ലൈംഗികമായി പീഡിപ്പിച്ചുവെന്നും ഇത് വിഷാദ രോഗത്തിലേക്ക് അടക്കം നയിച്ചുവെന്നുമാണ് കുറിപ്പിലുള്ളത്. കഴിഞ്ഞ 15 വര്‍ഷമായി തെറാപ്പി എടുക്കുന്നുണ്ടെന്നും പല തവണ ആത്മഹത്യ ചെയ്യാന്‍ തോന്നിയിട്ടുണ്ടെന്നും കുറിപ്പില്‍ പറയുന്നു. സജീവ ആര്‍.എസ്.എസ് പ്രവര്‍ത്തകനാണ് തന്നെ ലൈംഗികമായി ഉപദ്രവിച്ചതെന്നും ആര്‍.എസ്.എസ് ക്യാമ്പില്‍ വെച്ച് ലൈംഗിക വൈകൃതങ്ങള്‍ക്ക് ഇരയാക്കുന്നത് പതിവാണെന്നും യുവാവ് പറയുന്നു. ഇംഗ്ലീഷിലും മലയാളത്തിലും മംഗ്ലീഷിലുമായാണ് കുറിപ്പ് എഴുതിയത്.

നിധീഷ് മുരളീധരന്റെ സ്ഥാപനം രണ്ടു ദിവസമായി അടഞ്ഞു കിടക്കുകയാണ്. സോഷ്യല്‍ മീഡിയ അക്കൗണ്ടും അപ്രത്യക്ഷമായി.

A young man who died by suicide had alleged sexual abuse at an RSS shakha. Widespread investigation has been launched into RSS worker Nidheesh Muralidharan, with arrest likely. Get full details on the case and ongoing probe.