തൊടുപുഴ: മുല്ലപ്പെരിയാറിലെ ജലനിരപ്പ് വീണ്ടും ഉയര്‍ന്നു. ഡാമിലേക്കുള്ള നീരൊഴുക്ക് വര്‍ധിച്ചതിനെത്തുടര്‍ന്ന് ജലനിരപ്പ് 140 അടിയലേക്ക് എത്തി നില്‍ക്കുകയാണ്. നിലവില്‍ തുറന്ന 13 സ്പില്‍വേ ഷട്ടറുകളിലൂടെ 9403 ഘനയടി വെള്ളം പുറത്തേക്ക് ഒഴുക്കിവിടുന്നുണ്ട്. 

ഇന്നലെ ഒറ്റ രാത്രി കൊണ്ട് പെയ്ത കനത്ത മഴയില്‍ ശനിയാഴ്ച്ച പുലര്‍ച്ച നാലിനുള്ള കണക്കുപ്രകാരം സെക്കന്‍ഡില്‍ 71733 ഘനഅടി ജലമാണ് അണക്കെട്ടിലേക്ക് ഒഴുകിയെത്തിയത്. ശക്തമായ ജലമൊഴുക്കിനെ തുടര്‍ന്ന് ഒറ്റ രാത്രികൊണ്ട് ജലനിരപ്പ് ഏഴടിയോളമാണ് ഉയര്‍ന്നത്. ഡാമില്‍ നിന്ന് വെള്ളം ഒഴുകിയെത്തുന്ന ജനവാസ മേഖലകളില്‍ ആശങ്കഉയര്‍ന്നിട്ടുണ്ട്. താഴ്ന്ന പ്രദേശങ്ങളിലൊക്കെ വെള്ളം ഉയര്‍ന്നു തുടങ്ങിയിട്ടുണ്ട്.

138.9 അടിയാണ് അണക്കെട്ടിലെ ഇന്നലെ രാത്രി 9 മണിയിലെ ജലനിരപ്പ്. 1400 ക്യുസെക്‌സ് വെള്ളം തമിഴ്‌നാട്ടിലേക്ക് കൊണ്ടുപോകുന്നുണ്ട്.

ALSO READ: മഞ്ചേരിയിൽ അരുംകൊല; യുവാവിനെ കാടുവെട്ട് യന്ത്രം ഉപയോഗിച്ച് കഴുത്തറുത്ത് കൊന്നു

വൃഷ്ടി പ്രദേശത്തെ ജലനിരപ്പിന്റെ റൂള്‍ കര്‍വ് പിന്നിട്ടതിന് പിന്നാലെ ഇന്നലെ രാവിലെ ഒന്‍പത് മണിക്കാണ് വി വണ്‍, വി ടു, വി ത്രി സ്പില്‍വെ ഷട്ടറുകള്‍ 75 സെന്റിമീറ്റര്‍ വീതം ഉയര്‍ത്തി 1078 ക്യുസെക്‌സ് വീതം വെള്ളം പുറത്തേക്ക് ഒഴുക്കി തുടങ്ങിയത്. പിന്നീട് 11 ഓടെ വി ഫോര്‍ മുതല്‍ വി എട്ട് വരെയുള്ള ഷട്ടറുകള്‍ തുറന്ന് 3763 ക്യുസെക്‌സ് വീതം വെള്ളം പുറത്തേക്ക് ഒഴുക്കി. വൈകിട്ടോടെ 7305 ക്യുസെക്‌സ് ആക്കി ഉയര്‍ത്തി. ഇതോടെ പെരിയാര്‍ തടങ്ങളില്‍ താഴ്ന്ന പ്രദേശത്ത് വെള്ളം കയറി.

അണക്കെട്ടിലേക്കുള്ള നീരൊഴുക്കിന്റെ തോത് മുമ്പ് ഒരിക്കലും ഉണ്ടാകാത്ത വിധമാണ് കുതിച്ചുയര്‍ന്നത്. ഇന്നലെ പുലര്‍ച്ചെയോടെ അണക്കെട്ടിലെക്കുള്ള നീരൊഴുക്കിന്റെ തോത് സെക്കന്റില്‍ 40733 ഘനയടിയായി വര്‍ധിച്ചത് പെരിയാര്‍ തീരങ്ങളില്‍ ആശങ്ക ഉണര്‍ത്തി. പെരിയാറിന്റെ ഇരു കരകളിലും താമസിക്കുന്നവര്‍ക്കുള്ള മുന്നറിയിപ്പും തമിഴ്‌നാട് വെള്ളിയാഴ്ച രാത്രി തന്നെ പുറപ്പെടുവിച്ചിട്ടുണ്ട്. 

English Summary: At the Mullaperiyar Dam in Kerala, the water level rose rapidly following heavy rainfall in the catchment area. The level reached around 140 feet, going up by about 7 feet overnight.