ഭോപ്പാല്‍: വീണ്ടും വിവാദ പരാമര്‍ശവുമായി ബി.ജെ.പി നേതാവും മുന്‍ ഭോപ്പാല്‍ എം.പിയുമായ പ്രഗ്യാസിങ് താക്കൂര്‍. മാതാപിതാക്കള്‍ പെണ്‍മക്കളെ അഹിന്ദുക്കളുടെ വീട്ടില്‍ പോകുന്നതില്‍ നിന്ന് വിലക്കണമെന്നും, ഈ നിര്‍ദ്ദേശം അനുസരിച്ചില്ലെങ്കില്‍ പെണ്‍കുട്ടികളുടെ കാല് തല്ലി ഒടിക്കണമെന്നുമാണ് അവര്‍ പറഞ്ഞത്. ഭോപ്പാലില്‍ ഒരു ചടങ്ങില്‍ പങ്കെടുക്കവേ ആണ് പ്രഗ്യാ സിങ് ഠാക്കൂര്‍ വിദ്വേഷ പരാമര്‍ശം നടത്തിയത്. 

''നിങ്ങളുടെ മനസ്സിനെ ശക്തിപ്പെടുത്തുക, നമ്മുടെ മകള്‍ നമ്മെ അനുസരിക്കുന്നില്ലെങ്കില്‍, അവള്‍ ഒരു അഹിന്ദുവിന്റെ വീട്ടില്‍ പോയാല്‍,അവരുടെ കാലുകള്‍ തല്ലിയൊടിക്കുന്നതില്‍ മടി കാണിക്കരുത്. മൂല്യങ്ങള്‍ അനുസരിക്കാത്തവരും മാതാപിതാക്കളുടെ വാക്കുകള്‍ കേള്‍ക്കാത്തവരും തീര്‍ച്ചയായും ശിക്ഷിക്കപ്പെടണം. അവരുടെ നന്മക്കായി കുട്ടികളെ അടിക്കേണ്ടിവന്നാല്‍, അതില്‍ നിന്ന്പിന്നോട്ട് പോകേണ്ടതില്ല. മാതാപിതാക്കള്‍ അത്തരം പ്രവൃത്തികള്‍ ചെയ്യുന്നത് അവരുടെ കുട്ടികളുടെ നല്ല ഭാവിക്കാണ്. കഷ്ണങ്ങളാക്കി മുറിക്കപ്പെട്ട് മരിക്കാന്‍ അവരെ വിട്ടുകൊടുക്കില്ല''- പ്രഗ്യ പറഞ്ഞു. 

''മൂല്യങ്ങള്‍ പാലിക്കാത്ത, മാതാപിതാക്കളുടെ വാക്കുകള്‍ കേള്‍ക്കാത്ത, മുതിര്‍ന്നവരെ ബഹുമാനിക്കാത്ത, വീട്ടില്‍ നിന്ന് ഓടിപ്പോകാന്‍ തയ്യാറാകുന്ന പെണ്‍കുട്ടികള്‍... അവരുടെ അടുത്ത് കൂടുതല്‍ ജാഗ്രത പാലിക്കുക. അവരെ നിങ്ങളുടെ വീട് വിട്ട് പോകാന്‍ അനുവദിക്കരുത്, അടിച്ചോ വിശദീകരിച്ചോ,സ്‌നേഹിച്ചോ അല്ലെങ്കില്‍ ശകാരിക്കുകയോ ചെയ്ത് അവരെ തടയണം'- അവര്‍ കൂട്ടിച്ചേര്‍ത്തു.

വിവാദ പരാമര്‍ശനത്തിനെതിരെ കോണ്‍ഗ്രസ് രൂക്ഷവിമര്‍ശനവുമായി രംഗത്തെത്തിയിട്ടുണ്ട്.