ബെംഗളൂരു: ഭരണഘടനയെ ചരിത്രപരമായി എതിര്‍ത്ത ആര്‍എസ്എസ്- സംഘപരിവാറിനോട് ജാഗ്രത പുലര്‍ത്തണമെന്ന് കര്‍ണാടക മുഖ്യമന്ത്രി സിദ്ധരാമയ്യ. മൈസൂര്‍ യൂണിവേഴ്‌സിറ്റിയുടെ രജതജൂബിലി ആഘോഷങ്ങള്‍ ഉദ്ഘാടന ചെയ്യവേയാണ് സിദ്ധരാമയ്യയുടെ പരാമര്‍ശം. 

ആര്‍എസ്എസും സംഘപരിവാറും അംബ്ദേകറുടെ ഭരണഘടനയെ എതിര്‍ത്തവരാണ്. അത് ഇപ്പോഴും തുടരുന്നു. നിങ്ങളുടെ കൂട്ടുകെട്ടുകള്‍ നല്ലതായിരിക്കണം. സമൂഹത്തിന് വേണ്ടി നിലകൊള്ളുന്നവരുമായി സഹകരിക്കുക. സാമൂഹിക മാറ്റത്തെ എതിര്‍ക്കുന്നവരുമായോ, സനാതനികളുമായോ അല്ല സഹകരിക്കേണ്ടത്. 

ഒരു സനാതനി രാജ്യത്തിന്റെ ചീഫ് ജസ്റ്റിസിനെതിരെ ചെരുപ്പെറിഞ്ഞു. ഇക്കാര്യം സമുഹത്തില്‍ സനാതനികളും യഥാസ്ഥിതികരും ഇപ്പോഴും നിലനില്‍ക്കുന്നുണ്ടെന്ന് കാണിക്കുന്നു. ഈ പ്രവര്‍ത്തിയെ ദളിതര്‍ മാത്രമല്ല, എല്ലാവരും അപലപിക്കണം. എങ്കില്‍ മാത്രമേ സമൂഹം മാറ്റത്തിന്റെ പാതയിലാണെന്ന് നമുക്ക് പറയാന്‍ കഴിയൂ,' സിദ്ധരാമയ്യ പറഞ്ഞു. 

ALSO READ: ഇന്ത്യയിൽ ആദ്യത്തേത് കോഴിക്കോട് മെഡിക്കൽ കോളേജിൽ ന്യൂക്ലിയർ മെഡിസിൻ പി.ജി; കേരളത്തിന് 81 പുതിയ പിജി സീറ്റുകൾ 

മാത്രമല്ല പൊതുവിദ്യാലയങ്ങളിലും, മറ്റ് വിദ്യാഭ്യാസ സ്ഥാപനങ്ങളിലും ആര്‍എസ്എസ് അടക്കമുള്ള സംഘടനകള്‍ പരിപാടികള്‍ സംഘടിപ്പിക്കുന്നതിനെ വിലക്കുന്ന ഉത്തരവിനെ കുറിച്ചും സിദ്ധരാമയ്യ വിശദീകരിച്ചു. 

പുതിയ ഉത്തരവ് ആര്‍എസ്എസിനെ മാത്രം ലക്ഷ്യം വെക്കുന്നില്ല. ഇത് എല്ലാ സംഘടനകള്‍ക്കും ബാധകമാണ്. ജഗദീഷ് ഷെട്ടാര്‍ മുഖ്യമന്ത്രിയായിരുന്ന കാലത്ത് 2013ല്‍ ഈ ഉത്തരവ് ആദ്യമായി പുറപ്പെടുവിച്ചു. അന്ന് ബിജെപി അതിനെ എതിര്‍ത്തില്ല. ഞങ്ങളുടെ ലക്ഷ്യം ആര്‍എസ്എസോ ഏതെങ്കിലും പ്രത്യേക സംഘടനയോ അല്ല. ക്രമസമാധാന നില തകരാറിലായാല്‍ ഞങ്ങളുടെ പൊലിസ് ആവശ്യമായ നടപടി സ്വീകരിക്കും,' സിദ്ധരാമയ്യ കൂട്ടിച്ചേര്‍ത്തു.

മാത്രമല്ല യുക്തിസഹവും ശാസ്ത്രീയവുമായ ചിന്തകള്‍ക്കാണ് താന്‍ പിന്തുണ നല്‍കുന്നതെന്നും, ശാസ്ത്രം പഠിക്കുകയും, അന്ധിവിശ്വാസങ്ങള്‍ പിന്തുടരുകയും ചെയ്യുന്ന ഒരാളായി വിദ്യാര്‍ഥികള്‍ മാറരുതെന്നും സിദ്ധരാമയ്യ ആവശ്യപ്പെട്ടു.

Don’t align with Sanatanis in RSS who oppose the Constitution says karnataka cheif minister sidharaamayyah