അബൂദബി: മിഡ്-ടേം അവധിക്ക് ശേഷം യുഎഇയിലെ പൊതു-സ്വകാര്യ സ്കൂളുകളിൽ തിങ്കളാഴ്ച ക്ലാസുകൾ പുനരാരംഭിക്കും. ഒക്ടോബർ 13 മുതൽ 19 വരെയായിരുന്നു അവധി. ക്ലാസുകൾ ആരംഭിക്കുന്നതോടെ, ഡിസംബറിൽ നടക്കാനിരിക്കുന്ന സെമസ്റ്റർ അവസാന പരീക്ഷകൾക്കായുള്ള തയ്യാറെടുപ്പ് ആരംഭിക്കുമെന്ന് അൽ ബയാൻ ദിനപത്രം റിപ്പോർട്ട് ചെയ്തു.

ഈ ആഴ്ചമുതൽ പഠനം വീണ്ടും ആരംഭിക്കും. വിദ്യാർഥികളുടെ കഴിവുകൾ വർധിപ്പിക്കുന്നതിനും പഠനത്തിലെ പോരോയ്മകൾ പരിഹരിക്കുന്നതിനും മോക്ക് ടെസ്റ്റുകൾക്കും മെയിൻ പരീക്ഷകൾക്കും വിദ്യാർഥികളെ തയ്യാറാക്കാനായി അധ്യാപകർ ശ്രദ്ധ കേന്ദ്രീകരിക്കുമെന്നും സ്കൂൾ അധികൃതർ അറിയിച്ചു.

ALSO READ: കടലിലേക്ക് അപകടകരമാംവിധം താഴ്ന്ന് എയർ അറേബ്യ വിമാനം; സംഭവത്തിൽ അന്വേഷണം ആരംഭിച്ചു

അക്കാദമിക് പ്രകടനം മെച്ചപ്പെടുത്തുന്നതിന് വിദ്യാർഥികളെ സഹായിക്കാൻ ലക്ഷ്യമിട്ടുള്ള പ്രത്യേക പദ്ധതികളും സ്കൂളുകൾ നടത്തുന്നുണ്ട്.

അടുത്ത ആഴ്ചകളിൽ സ്കൂളുകളിൽ രക്ഷാകർതൃ-അധ്യാപക മീറ്റിംഗുകൾ നടക്കും. ഇതിൽ, വിദ്യാർഥികളുടെ പഠനത്തിലെ പുരോഗതി അവലോകനം ചെയ്യുകയും, അറബിക്, ഗണിതശാസ്ത്രം, സയൻസ് തുടങ്ങിയ പ്രധാന വിഷയങ്ങളിൽ അവരെ സഹായിക്കുന്നതിനാവശ്യമായ പദ്ധതികൾ തയ്യാറാക്കുകയും ചെയ്യും. 

വിദ്യാഭ്യാസ മന്ത്രാലയത്തിന്റെ ഷെഡ്യൂൾ പ്രാകരം, ഡിസംബർ 2 മുതൽ 12 വരെയാണ് അവസാന പരീക്ഷകൾ നടക്കുക. തുടർന്ന് ഡിസംബർ 8 മുതൽ 2026 ജനുവരി 4 വരെ വിദ്യാർഥികൾക്ക് വിന്റർ അവധിയും ഉണ്ടായിരിക്കും. സ്കൂൾ ജീവനക്കാർക്ക് ഡിസംബർ 15 മുതൽ ജനുവരി 4 വരെയാണ് അവധി.

ALSO READ: യുഎഇയിലെ ഇന്നത്തെ സ്വര്‍ണം, വെള്ളി നിരക്ക്; ദിര്‍ഹം - രൂപ വിനിമയ നിരക്കും പരിശോധിക്കാം | UAE Market on October 19

അവസാനഘട്ട തയ്യാറെടുപ്പുകൾക്ക് മുന്നോടിയായി ഒക്ടോബർ 17 മുതൽ നവംബർ 19 വരെയുള്ള കാലയളവ് മോക്ക് ടെസ്റ്റുകൾക്കായി നീക്കിവയ്ക്കും. കൂടാതെ, വിദ്യാർഥികളിലെ പരീക്ഷാ പേടി കുറയ്ക്കുന്നതിനും തയ്യാറെടുപ്പ് മെച്ചപ്പെടുത്തുന്നതിനുമായി പ്രതിവാര അവലോകന സെഷനുകളും പ്രായോഗിക പരിശീലനങ്ങളും നടത്താൻ അധ്യാപകർക്ക് നിർദ്ദേശം നൽകിയിട്ടുണ്ട്.

മാനസികമായ തയ്യാറെടുപ്പിന്റെ പ്രാധാന്യവും അധികൃതർ എടുത്തുപറഞ്ഞു. പഠനവും വിശ്രമവും സന്തുലിതമായി കൊണ്ടുപോകാനും പോസിറ്റീവായ ക്ലാസ്റൂം അന്തരീക്ഷം വളർത്താനും വിദ്യാർഥികളെ അവർ പ്രോത്സാഹിപ്പിച്ചു. സെമസ്റ്റർ അവസാനിക്കുമ്പോൾ മികച്ച അക്കാദമിക് ഫലങ്ങൾ ഉറപ്പാക്കുന്നതിൽ സ്കൂളുകളും കുടുംബങ്ങളും തമ്മിലുള്ള സഹകരണം പ്രധാനമാണെന്നും അവർ വ്യക്തമാക്കി.

Schools in the UAE will resume classes on Monday after a week-long mid-term break from October 13 to 19. The new week will mark the beginning of intensive exam preparation for end-of-semester exams scheduled for December 2-12