ദുബൈ: നവംബർ 1 മുതൽ ദുബൈയിലെ ഡെലിവറി റൈഡർമാർ ഹൈ-സ്പീഡ് ലെയ്‌നുകൾ ഉപയോഗിക്കുന്നതിന് വിലക്കേർപ്പെടുത്തും. ഞായറാഴ്ചയാണ് റോഡ്‌സ് ആൻഡ് ട്രാൻസ്പോർട്ട് അതോറിറ്റിയും (RTA) ദുബൈ പൊലിസും ചേർന്ന് പുതിയ നിയമങ്ങൾ പ്രഖ്യാപിച്ചത്. 

അഞ്ചോ അതിലധികമോ ലെയ്‌നുകളുള്ള വലിയ റോഡുകളിൽ ഇടതുവശത്തെ രണ്ട് ലെയ്‌നുകളിലും, മൂന്നോ നാലോ ലെയ്‌നുകളുള്ള റോഡുകളിൽ ഏറ്റവും ഇടതുവശത്തെ ലെയ്‌നിലും ഡെലിവറി ബൈക്കുകൾ പ്രവേശിക്കാൻ പാടില്ല. രണ്ട് ലെയ്‌നുകളോ അതിൽ കുറവോ ഉള്ള റോഡുകളിൽ റൈഡർമാർക്ക് ഇരുവശവും സ്വതന്ത്രമായി ഉപയോഗിക്കാം എന്നും അറിയിപ്പിൽ വ്യക്തമാക്കുന്നു.

സാധാരണയായി ഫാസ്റ്റ് ലെയ്‌നുകൾ എന്ന് അറിയപ്പെടുന്ന ഏറ്റവും ഇടതുവശത്തുള്ള ലെയ്നുകൾ 2021-ലെ നിയമപ്രകാരം തന്നെ ഡെലിവറി റൈഡർമാർക്ക് നിരോധിച്ചിരുന്നു. അബൂദബിയിലും അജ്മാനിലും സമാനമായ നിയന്ത്രണങ്ങൾ നിലവിലുണ്ട്.

ALSO READ: മിഡ്-ടേം അവധിക്ക് ശേഷം യുഎഇയിലെ പൊതു-സ്വകാര്യ സ്കൂളുകൾ നാളെ (20/10/2025) തുറക്കും

നിയന്ത്രണത്തിന്റെ കാരണം 

ഹൈ-സ്പീഡ് ലെയ്‌നുകളിലെ അശ്രദ്ധമായതും, നിയമം പാലിക്കാത്തതുമായ ഡ്രൈവിംഗ് കാരണം അപകടങ്ങൾ വർധിച്ചു വരുകയാണ്. ഡെലിവറി റെെഡർമാർ ഉൾപ്പെട്ട അപകടങ്ങളിൽ വൻ വർധനവാണുണ്ടായിട്ടുള്ളത് ദുബൈ പൊലിസ് അസിസ്റ്റന്റ് കമാൻഡർ-ഇൻ-ചീഫ് ഫോർ ഓപ്പറേഷൻസ് അഫയേഴ്‌സ് മേജർ ജനറൽ സൈഫ് മുഹൈർ അൽ മസ്‌റൂയി വ്യക്തമാക്കി.

ഡെലിവറി റൈഡർമാർ നിയമങ്ങൾ ലംഘിച്ചതിനെ തുടർന്ന് കഴിഞ്ഞ വർഷം 854 അപകടങ്ങളും 2025-ൽ 962 അപകടങ്ങളുമാണ് രേഖപ്പെടുത്തിയത്. ട്രാഫിക് നിയമങ്ങൾ പാലിക്കാത്തതിന് കഴിഞ്ഞ വർഷം ഡെലിവറി റൈഡർമാർക്കെതിരെ 70,166 നിയമലംഘനങ്ങളാണ് ദുബൈ പൊലിസ് ചുമത്തിയത്. ഈ വർഷം കഴിഞ്ഞ ഒമ്പത് മാസത്തിനുള്ളിൽ ഇത് 78,386 ആയി വർധിച്ചു. ഇത് റൈഡർമാർക്കിടയിലെ സുരക്ഷിതമല്ലാത്ത ഡ്രൈവിംഗ് രീതിയെയാണ് സൂചിപ്പിക്കുന്നത്.

ALSO READ: കടലിലേക്ക് അപകടകരമാംവിധം താഴ്ന്ന് എയർ അറേബ്യ വിമാനം; സംഭവത്തിൽ അന്വേഷണം ആരംഭിച്ചു

മികവിനുള്ള പുരസ്‌കാരം
 
അതേസമയം, പുതിയ ലെയ്ൻ നിയന്ത്രണങ്ങൾ പാലിക്കുന്ന ഡെലിവറി കമ്പനികളെ 'ഡെലിവറി സെക്ടർ എക്സലൻസ് അവാർഡ്' നൽകി ആദരിക്കുമെന്ന് RTA-യും ദുബൈ പൊലിസും അറിയിച്ചു. ഡെലിവറി ഓപ്പറേറ്റർമാർക്കിടയിൽ ആരോഗ്യകരമായ മത്സരം വളർത്താനും, ട്രാഫിക് സുരക്ഷ വർധിപ്പിക്കാനും, ട്രാഫിക് നിയമങ്ങൾ പാലിക്കുന്നത് പ്രോത്സാഹിപ്പിക്കാനും ഈ സംരംഭം ലക്ഷ്യമിടുന്നു.

Starting November 1, delivery riders in Dubai will be prohibited from using the fast lanes under new regulations announced by the Roads and Transport Authority (RTA) and Dubai Police. This move aims to enhance road safety and reduce accidents involving delivery riders.