ഇന്ത്യയിലേക്കുള്ള റഷ്യൻ എണ്ണ ഇറക്കുമതിയിൽ ഗണ്യമായ കുറവുണ്ടായതായി റിപ്പോർട്ട്. ഈ സാമ്പത്തിക വർഷത്തിന്റെ ആദ്യ പകുതിയിൽ (ഏപ്രിൽ മുതൽ സെപ്റ്റംബർ വരെ) കഴിഞ്ഞ വർഷത്തെ അപേക്ഷിച്ച് 8.4 ശതമാനമാണ് ഇറക്കുമതിയിൽ കുറവുണ്ടായിരിക്കുന്നത്. ഇതിന് പ്രധാന കാരണം റഷ്യ നൽകിയിരുന്ന വിലക്കിഴിവുകളിലെ കുറവും വിതരണത്തിലെ പ്രതിസന്ധിയുമാണ്.

റഷ്യൻ എണ്ണയുടെ ലഭ്യത കുറഞ്ഞതോടെ രാജ്യത്തെ എണ്ണ ശുദ്ധീകരണശാലകൾ മിഡിൽ ഈസ്റ്റ്, അമേരിക്കൻ എണ്ണ വിപണികളിലേക്ക് കൂടുതൽ ശ്രദ്ധ കേന്ദ്രീകരിച്ചു തുടങ്ങി. ഏപ്രിൽ 1 മുതൽ സെപ്റ്റംബർ വരെ ഇന്ത്യ പ്രതിദിനം 1.75 ദശലക്ഷം ബാരൽ റഷ്യൻ എണ്ണയാണ് ഇറക്കുമതി ചെയ്തത്. എന്നാൽ, സെപ്റ്റംബറിലെ കണക്കനുസരിച്ച് ഇത് പ്രതിദിനം 1.6 ദശലക്ഷം ബാരലായി കുറഞ്ഞു. ഇത് ഓഗസ്റ്റിലെ അളവിന് തുല്യമാണെങ്കിലും, കഴിഞ്ഞ വർഷം ഇതേ മാസത്തെ അപേക്ഷിച്ച് 14.2 ശതമാനം കുറവാണ്.

അമേരിക്കൻ സമ്മർദ്ദം നിർണായകം

റഷ്യൻ എണ്ണ ഇറക്കുമതി കുറയ്ക്കുന്നതിനായി അമേരിക്കയിൽ നിന്ന് ഇന്ത്യയുടെ മേൽ ശക്തമായ സമ്മർദ്ദമുണ്ട്. റഷ്യയിൽ നിന്നുള്ള ക്രൂഡ് ഓയിൽ വാങ്ങുന്നത് യുക്രെയ്നിലെ യുദ്ധത്തിന് സാമ്പത്തിക സഹായം നൽകുന്നതിന് തുല്യമാണെന്നാണ് യുഎസിന്റെ നിലപാട്. ഈ സമ്മർദ്ദത്തിന്റെ ഭാഗമായി ഇന്ത്യൻ ഉൽപ്പന്നങ്ങൾക്കുള്ള താരിഫ് അമേരിക്ക ഇരട്ടിയാക്കുകയും ചെയ്തിരുന്നു. റഷ്യൻ എണ്ണയുടെ ഇറക്കുമതി കുറയ്ക്കുന്നത് ഇന്ത്യയുടെ താരിഫ് നിരക്ക് പുനഃപരിശോധിക്കുന്നതിനും ഒരു വ്യാപാര കരാർ ഉറപ്പിക്കുന്നതിനും നിർണായകമാണെന്ന് യുഎസ് വ്യക്തമാക്കിയിട്ടുണ്ട്.

മറ്റ് വിപണികളിൽ നിന്നുള്ള ഇറക്കുമതിയിൽ വർദ്ധന

സെപ്റ്റംബറിൽ സ്വകാര്യ എണ്ണ ശുദ്ധീകരണശാലകളായ റിലയൻസ് ഇൻഡസ്ട്രീസ് ലിമിറ്റഡും നയാര എനർജിയും റഷ്യൻ എണ്ണയുടെ ഇറക്കുമതി വർദ്ധിപ്പിച്ചപ്പോൾ, പൊതുമേഖലാ ശുദ്ധീകരണശാലകളുടെ വാങ്ങലുകൾ കുറഞ്ഞു. അതേസമയം, ഏപ്രിൽ മുതൽ സെപ്റ്റംബർ വരെയുള്ള കാലയളവിൽ ഇന്ത്യയുടെ യുഎസ് ക്രൂഡ് ഇറക്കുമതി കഴിഞ്ഞ വർഷത്തെ അപേക്ഷിച്ച് 6.8 ശതമാനം വർധിച്ച് പ്രതിദിനം ഏകദേശം 213,000 ബാരലായി. ഇതേസമയം, മിഡിൽ ഈസ്റ്റേൺ എണ്ണയുടെ പങ്ക് 42 ശതമാനത്തിൽ നിന്ന് 45 ശതമാനമായി ഉയർന്നു. ഇതോടെ ഒപെക് (OPEC) രാജ്യങ്ങളിൽ നിന്നുള്ള എണ്ണയുടെ വിഹിതം 45 ശതമാനത്തിൽ നിന്ന് 49 ശതമാനമായി വർദ്ധിച്ചു.