പനാജി: സൂപ്പർ കപ്പിൽ ഇന്ന് ക്ലാസിക് പോര്. ഗ്രൂപ്പ് ഡിയിൽനിന്ന് സെമിഫൈനൽ ഉറപ്പിക്കാൻ ഐ.എസ്.എൽ വമ്പന്മാരായ കേരളാബ്ലാസ്റ്റേഴ്സും മുംബൈ സിറ്റിയുമാണ് നേർക്കുനേർ വരുന്നത്. ഫാറ്റോർദയിലെ ജവഹർലാൽ നെഹ്‌റു സ്റ്റേഡിയത്തിൽ രാത്രി 7.30മുതലാണ് മത്സരം. തുടർച്ചയായ രണ്ട് മത്സരങ്ങളിലെ തകർപ്പൻ വിജയങ്ങളുടെ ആത്മവിശ്വാസത്തിലാണ് ബ്ലാസ്റ്റേഴ്‌സ് കളത്തിലിറങ്ങുന്നത്. രണ്ട് മത്സരങ്ങളിൽനിന്ന് ആറ് പോയിൻ്റുള്ള മഞ്ഞപ്പടക്ക് ഈ മത്സരത്തിൽ സമനില നേടിയാൽ പോലും ടീമിന് സെമി ഉറപ്പിക്കാം.

രണ്ട് മത്സരങ്ങളിൽനിന്ന് മൂന്ന് ഗോളുകൾ നേടി മികച്ച ഫോമിലുള്ള സ്പാനിഷ് സ്ട്രൈക്കർ കോൾഡോ ഒബിയെറ്റയാണ് ബ്ലാസ്റ്റേഴ്സിൻ്റെ കരുത്ത്. 
ഹുവാൻ റോഡ്രിഗസ്, ബികാഷ് യുമ്നം എന്നിവരടങ്ങിയ പ്രതിരോധം ഈ ടൂർണമെന്റിൽ ഇതുവരെ ഒരു ഗോൾ പോലും വഴങ്ങിയിട്ടില്ല. ഇതുവരെ നാല് ഗോളുകൾ നേടുകയും രണ്ട് ക്ലീൻ ഷീറ്റുകളും സ്വന്തമാക്കിയാണ് ബ്ലാസ്റ്റേഴ്സ് ഇന്ന് മുംബൈയെ നേരിടാനിറങ്ങുന്നത്.

മറുവശത്ത് രണ്ട് മത്സരങ്ങളിൽനിന്ന് മൂന്ന്പോയിൻ്റുള്ള മുംബൈക്ക് ഇന്ന് വന്മാർജിനിൽ ബ്ലാസ്റ്റേഴ്സിനെ പരാജയപ്പെടുത്തിയാൽ മത്രമേ സെമി ടിക്കറ്റ് ലഭിക്കുകയുള്ളൂ.  കഴിഞ്ഞ മത്സരത്തിൽ രാജസ്ഥാൻ യുണൈറ്റഡിനോട് തോറ്റതോടെ അവർ നിലവിൽ മൂന്ന് പോയിന്റുമായി ഗ്രൂപ്പിൽ രണ്ടാമതാണ്. നിലവില്‍ ഗ്രൂപ്പ് എയില്‍നിന്ന് ഈസ്റ്റ് ബംഗാള്‍, ഗ്രൂപ്പ് ബിയില്‍നിന്ന് എഫ്.സി ഗോവ, ഗ്രൂപ്പ് സിയില്‍നിന്ന് പഞ്ചാബ് എഫ്.സി എന്നിവര്‍ സെമി ഉറപ്പിച്ചിട്ടുണ്ട്.