കൊച്ചി: കോതമംഗലത്തെ സ്വകാര്യ കോളേജ് ഹോസ്റ്റലിൽ ബി.ബി.എ. വിദ്യാർത്ഥിനിയെ മരിച്ച നിലയിൽ കണ്ടെത്തി. നെല്ലിക്കുഴിയിലെ ഇന്ദിരാഗാന്ധി കോളേജിന്റെ ഹോസ്റ്റലിലാണ് സംഭവം. മാംകുളം മുനിപാറഭാഗം സ്വദേശിനിയായ നന്ദന ഹരി (19) ആണ് മരിച്ചത്.

ബി.ബി.എ. ഒന്നാം വർഷ വിദ്യാർത്ഥിനിയായിരുന്ന നന്ദനയെ ഹോസ്റ്റൽ മുറിയിലെ ഫാനിൽ തൂങ്ങിമരിച്ച നിലയിലാണ് കണ്ടെത്തിയത്.പരീക്ഷകൾക്ക് മുന്നോടിയായി സ്റ്റഡി ലീവ് പ്രഖ്യാപിച്ചതിനാൽ ഹോസ്റ്റലിൽ നന്ദനയുടെ കൂടെ താമസിച്ചിരുന്ന മറ്റ് കുട്ടികൾ സ്വന്തം വീടുകളിലേക്ക് പോയിരുന്നു. ഈ സമയത്താണ് നന്ദനയെ മരിച്ച നിലയിൽ കണ്ടെത്തിയത്. ആത്മഹത്യയാണെന്നാണ് പ്രാഥമിക നിഗമനം.

വിവരം അറിഞ്ഞതിനെ തുടർന്ന് കോതമംഗലം പൊലിസ് സ്ഥലത്തെത്തി പരിശോധന ആരംഭിച്ചു. മൃതദേഹം പോസ്റ്റ്‌മോർട്ടത്തിനായി മാറ്റി. മരണവുമായി ബന്ധപ്പെട്ട് എന്തെങ്കിലും ദുരൂഹതയുണ്ടോ എന്നതിനെക്കുറിച്ച് പൊലിസ് അന്വേഷിക്കുന്നുണ്ട്.