മലപ്പുറം: നാടിനെ നടുക്കി മലപ്പുറം ചുങ്കത്തറയിൽ ഹണി ട്രാപ്പ് ഭീഷണിയിൽ ഡൽഹിയിലെ യുവ ബിസിനസുകാരൻ ജീവനൊടുക്കിയ സംഭവത്തിൽ ഞെട്ടിക്കുന്ന ഗൂഢാലോചനയുടെ ചുരുളഴിഞ്ഞു. മാനസികമായി പീഡിപ്പിച്ച് ആത്മഹത്യയിലേക്ക് തള്ളിവിട്ട കേസിൽ അയൽവാസിയായ യുവതിയും ഭർത്താവുമടക്കം നാല് പേരെ എടക്കര പൊലിസ് അറസ്റ്റ് ചെയ്തു.

ജൂൺ 11-ന് പള്ളിക്കുത്തിലെ വീട്ടിൽ തൂങ്ങിമരിച്ച 35-കാരനായ രതീഷിൻ്റെ മരണം ഒരു സാധാരണ ആത്മഹത്യയല്ലെന്ന് ബന്ധുക്കളുടെ മൊഴികളിൽ നിന്ന് പൊലിസിന് സൂചന ലഭിച്ചിരുന്നു. തുടർന്ന് നടത്തിയ പ്രത്യേക അന്വേഷണത്തിലാണ് ഹണി ട്രാപ്പ് തട്ടിപ്പിന്റെ വിവരങ്ങൾ പുറത്തുവന്നത്.

അയൽവാസിയും ബന്ധുവുമായ സിന്ധു, ഇവരുടെ ഭർത്താവ് ശ്രീരാജ്, സുഹൃത്ത് മഹേഷ്, സിന്ധുവിൻ്റെ ബന്ധു പ്രവീൺ എന്നിവരാണ് കേസിൽ അറസ്റ്റിലായത്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.

 പണം തിരികെ ചോദിച്ചതോടെ ഹണി ട്രാപ്പ് പ്ലാൻ

ഡൽഹിയിൽ വിജയകരമായ ബിസിനസ് നടത്തിവന്ന രതീഷിൽ നിന്നും സിന്ധു പല ആവശ്യങ്ങൾ പറഞ്ഞും മറ്റുമായി പണം കൈപ്പറ്റിയിരുന്നു. ഈ പണം രതീഷ് തിരികെ ആവശ്യപ്പെട്ടതോടെയാണ് പ്രശ്നങ്ങൾക്ക് തുടക്കമായത്. പണം തിരികെ നൽകാതിരിക്കാനും, രതീഷിൽ നിന്ന് കൂടുതൽ പണം തട്ടിയെടുക്കാനുമായി സിന്ധുവും ഭർത്താവ് ശ്രീരാജും ചേർന്നാണ് ഹണി ട്രാപ്പ് എന്ന കെണി ഒരുക്കിയത്. ഇതിനായി മഹേഷിന്റെയും പ്രവീണിന്റെയും സഹായം തേടി.

സഹോദരൻ്റെ ഗൃഹപ്രവേശന ചടങ്ങിനായി കേരളത്തിലെത്തിയ രതീഷിനെ "കടം വാങ്ങിയ പണം തിരികെ നൽകാം" എന്ന് പറഞ്ഞ് സിന്ധു തങ്ങളുടെ വീട്ടിലേക്ക് വിളിച്ചുവരുത്തുകയായിരുന്നു.

നഗ്നവീഡിയോ ദൃശ്യങ്ങൾ പകർത്തി ഭീഷണി

വീട്ടിലെത്തിയ രതീഷിനെ പ്രതികൾ മുറിയിൽ പൂട്ടിയിട്ട് ക്രൂരമായി മർദ്ദിച്ചു. തുടർന്ന് നഗ്നനാക്കി രതീഷിന്റെ വീഡിയോ ദൃശ്യങ്ങൾ പകർത്തി ഭീഷണിപ്പെടുത്തി. "കൂടുതൽ പണം നൽകിയില്ലെങ്കിൽ ഈ വീഡിയോകൾ സോഷ്യൽ മീഡിയയിൽ പ്രചരിപ്പിക്കും" എന്ന് ഭീഷണി മുഴക്കി. രതീഷ് വഴങ്ങാതായപ്പോൾ, പ്രതികൾ ഈ വീഡിയോകൾ അദ്ദേഹത്തിൻ്റെ ഭാര്യയ്ക്ക് അയച്ചുകൊടുത്തു. മറ്റ് ബന്ധുക്കൾക്കും സുഹൃത്തുക്കൾക്കും ദൃശ്യങ്ങൾ അയച്ചു കൊടുക്കുമെന്ന് ഭീഷണിപ്പെടുത്തി രതീഷിന് മേലുള്ള മാനസിക സമ്മർദ്ദം വർദ്ധിപ്പിച്ചു.

ജീവിതത്തിലെ ഏറ്റവും സന്തോഷകരമായ ദിവസങ്ങൾക്കിടെ കുടുംബത്തിൻ്റെ മാനം നഷ്ടപ്പെടുമോ എന്ന കടുത്ത ഭയം താങ്ങാനാവാതെയാണ് രതീഷ് ആത്മഹത്യ ചെയ്തതെന്ന് സഹോദരൻ വെളിപ്പെടുത്തി.

തെളിവുകൾ കണ്ടെത്തി; നാല് പേർക്കെതിരെ കേസ്

തുടക്കത്തിൽ ആത്മഹത്യയായി കണക്കാക്കിയെങ്കിലും, ബന്ധുക്കളുടെയും സുഹൃത്തുക്കളുടെയും മൊഴികൾ ഹണി ട്രാപ്പിലേക്ക് വിരൽ ചൂണ്ടിയതോടെ എടക്കര പൊലിസ് പ്രത്യേക അന്വേഷണ സംഘം രൂപീകരിച്ച് വിശദമായ അന്വേഷണം ആരംഭിച്ചു.

പ്രതികളുടെ മൊബൈൽ ഫോണുകൾ പരിശോധിച്ചതിൽ നിന്നും നഗ്ന വീഡിയോ ദൃശ്യങ്ങൾ ഉൾപ്പെടെയുള്ള നിർണ്ണായക തെളിവുകൾ കണ്ടെത്തി. സിസിടിവി ദൃശ്യങ്ങളും കോൾ റെക്കോർഡുകളും പരിശോധിച്ച പോലീസ് ഗൂഢാലോചന സ്ഥിരീകരിച്ചു.

പ്രതികൾക്കെതിരെ ഐപിസി 306 (ആത്മഹത്യ പ്രേരണ), 120ബി (ഗൂഢാലോചന), 323 (ദേഹോപദ്രവം), 384 (ഭീഷണിപ്പെടുത്തി പണം തട്ടൽ), 506 (അന്യായമായ ഭീഷണി) എന്നീ വകുപ്പുകൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നത്.

"സമൂഹത്തിൻ്റെ മാനസികാരോഗ്യത്തെ ബാധിക്കുന്ന ഇത്തരം ഹണി ട്രാപ്പ് കേസുകളിൽ കൃത്യമായ തെളിവുകൾ ശേഖരിച്ച് കർശന നടപടി സ്വീകരിക്കും," എടക്കര പൊലിസ് സ്റ്റേഷൻ ഹൗസ് ഓഫിസർ അറിയിച്ചു.കേരളത്തിൽ വർധിച്ചു വരുന്ന ഹണി ട്രാപ്പ് തട്ടിപ്പുകളുടെ പശ്ചാത്തലത്തിൽ ഈ സംഭവം ഏറെ ശ്രദ്ധേയമാണ്. സോഷ്യൽ മീഡിയ വഴിയും വ്യക്തിബന്ധങ്ങളിലൂടെയുമുള്ള ഇത്തരം തട്ടിപ്പുകൾക്കെതിരെ പൊതുജനം അതീവ ജാഗ്രത പാലിക്കണമെന്ന് പൊലിസ് നിർദ്ദേശം നൽകി.