ന്യൂഡല്‍ഹി: വ്യാജ എംഎല്‍എ ചമഞ്ഞ് പണം കൊടുക്കാതെ ഹോട്ടലില്‍ കഴിഞ്ഞ പ്രതികള്‍ പിടിയില്‍. ഡല്‍ഹി തുഗ്ലക്കാബാദ് സ്വദേശികളായ വിനോദ്, സുഹൃത്ത് മനോജ് എന്നിവരാണ് 18 ദിവസത്തോളം പണം നല്‍കാതെ ആഗ്രയിലെ ഹോട്ടലില്‍ താമസിച്ചത്. കൂടെയുള്ളയാള്‍ എംഎല്‍എയുടെ പിഎ ആണെന്നാണ് ഇവര്‍ ജീവനക്കാരോട് പറഞ്ഞത്. 

18 ദിവസം കഴിഞ്ഞിട്ടും പണം നല്‍കാന്‍ കൂട്ടാക്കാത്തതോടെ ഹോട്ടലിന്റെ ഉടമ നേരിട്ടെത്തി ഇരുവരോടും പണം ആവശ്യപ്പെട്ടു. എന്നാല്‍ താന്‍ എംഎല്‍എ ആണെന്നും, പരാതി നല്‍കുമെന്നും പറഞ്ഞ് വിനോദ് ഹോട്ടല്‍ ഉടമയെയും ജീവനക്കാരെയും ഭീഷണിപ്പെടുത്തി. ഇതോടെ ഹോട്ടലുടമ പൊലിസില്‍ പരാതി നല്‍കുകയായിരുന്നു. 

ALSO READ: വിരമിച്ചു കഴിഞ്ഞാൽ മെസി ആ റോൾ ഏറ്റെടുക്കും: പ്രസ്താവനയുമായി അർജന്റൈൻ സൂപ്പർതാരം 

പൊലിസെത്തി ചോദ്യം ചെയ്തപ്പോഴും തുടക്കത്തില്‍ എംഎല്‍എ ആണെന്ന് ഇരുവുരും ആവര്‍ത്തിച്ചു. എന്നാല്‍ വിശദമായ ചോദ്യം ചെയ്യലില്‍ തട്ടിപ്പ് പുറത്താവുകയും, ഇരുവരും കുറ്റസമ്മതം നടത്തുകയും ചെയ്തു. ഇവരുടെ കാറില്‍ എംപി എന്ന് ബോര്‍ഡും സ്ഥാപിച്ചിരുന്നു. 

പ്രതികള്‍ ഡല്‍ഹിയിലും പരിസര പ്രദേശങ്ങളിലുമായി സമാന തട്ടിപ്പുകള്‍ നടത്തിയിരുന്നതായി പൊലിസ് പറഞ്ഞു. നിരവധി കടകളില്‍ നിന്ന് പണം നല്‍കാതെ ഭക്ഷണം കഴിക്കുകയും സാധനങ്ങള്‍ വാങ്ങുകയും ചെയ്തിരുന്നെന്നും പൊലിസ് കണ്ടെത്തിയിട്ടുണ്ട്.