കോഴിക്കോട്: കോർപറേഷനിൽ കനത്ത പോരാട്ടവുമായി യു.ഡി.എഫും എൽ.ഡി.എഫും. വോട്ടെടുപ്പിന് ദിവസങ്ങൾ മാത്രം ശേഷിക്കെ വീടുകൾ കയറിയും വോട്ടർമാരെ നേരിൽക്കണ്ടും അനുകൂല സാഹചര്യമൊരുക്കാൻ മുന്നണികൾ മത്സരിക്കുകയാണ്. 

പതിവുരീതിയിൽ നിന്ന് വ്യത്യസ്തമായി സ്ഥാനാർഥികളെ തർക്കങ്ങളില്ലാതെ ആദ്യം പ്രഖ്യാപിച്ചത് അനുകൂല ഘടകമായാണ് യു.ഡി.എഫ് കരുതുന്നത്. വി.എം വിനുവിന്റെ സ്ഥാനാർഥിത്വവും അപ്രതീക്ഷിത ട്വിസ്റ്റും അൽപം മങ്ങലേൽപ്പിച്ചെങ്കിലും പകരം സ്ഥാനാർഥിയെ പ്രഖ്യാപിച്ച് പ്രചാരണരംഗത്ത് സജീവമാകാൻ യു.ഡി.എഫിന് സാധിച്ചു. പുതുമുഖങ്ങൾക്ക് അവസരം നൽകിയും പഴയ കൗൺസിലർമാരെ പരിഗണിച്ചുമുള്ള സ്ഥാനാർഥി നിർണയത്തിലൂടെ ജയസാധ്യതയേറെയാണെന്നാണ് യു.ഡി.എഫ് കരുതുന്നത്. കെ.പി.സി.സി ജനറൽ സെക്രട്ടറി പി.എം നിയാസ്, നിലവിലെ കോർപറേഷൻ പ്രതിപക്ഷ നേതാവ് കെ.സി ശോഭിത എന്നിവരടങ്ങുന്ന പ്രമുഖനിരയാണ് ഇത്തവണ ജനവിധി തേടുന്നത്. പരിചയസമ്പത്തും പ്രവർത്തനാനുഭവവുമുള്ള ജനകീയ സ്ഥാനാർഥികളെ മത്സരരംഗത്തിറക്കാൻ സാധിച്ചുവെന്ന ആത്മവിശ്വാസമാണ് എൽ.ഡി.എഫിനുള്ളത്. 40 ഓളം പുതുമുഖങ്ങളെയാണ് മത്സരിപ്പിക്കുന്നത്. ഘടകകക്ഷികളുമായി സീറ്റ് വിഭജനത്തിൽ നിലനിന്നിരുന്ന തർക്കങ്ങൾ പരിഹരിച്ച് പരമാവധി വിമതശബ്ദമില്ലാത്ത രീതിയിലാണ് ഇത്തവണ സ്ഥാനാർഥി പ്രഖ്യാപനം പൂർത്തിയാക്കിയത്. നിലവിലെ ഡെപ്യൂട്ടി മേയർ സി.പി മുസാഫർ അഹമ്മദ്, ഡെപ്യൂട്ടി കലക്ടറായിരുന്ന അനിതകുമാരി എന്നിവരടങ്ങുന്ന പ്രമുഖരെയാണ് എൽ.ഡി.എഫ് ഇത്തവണ മത്സരിപ്പിക്കുന്നത്. സിറ്റിങ് കൗൺസിലർമാരെയും യുവാക്കളെയും ഉൾപ്പെടുത്തിയാണ് ബി.ജെ.പിയും സ്ഥാനാർഥികളെ പ്രഖ്യാപിച്ചത്.  മഹിളാമോർച്ച അധ്യക്ഷയും രണ്ടുതവണ കൗൺസിലറുമായ നവ്യാ ഹരിദാസ് അടങ്ങുന്ന സ്ഥാനാർഥികളുമായാണ് ഇത്തവണ ബി.ജെ.പി രംഗത്തെത്തിയത്. 

ALSO READ: 'ഡിറ്റ് വാ' ചുഴലിക്കാറ്റ് തമിഴ്‌നാട് തീരത്തേക്ക്; കേരളത്തില്‍ ഇന്നും ഒറ്റപ്പെട്ട മഴ; അഞ്ച് ജില്ലകള്‍ക്ക് മുന്നറിയിപ്പ് 

 വാർഡുതലത്തിലുള്ള കൺവൻഷനുകളെല്ലാം പൂർത്തിയാക്കി വീടുകൾ കയറിയുള്ള പ്രചാരണവുമായാണ് യു.ഡി.എഫ് മുന്നേറുന്നത്. കുടുംബസംഗമങ്ങൾ വിളിച്ചുചേർത്തും വോട്ട് തേടുന്നുണ്ട്. അടുത്താഴ്ചയോടെ പ്രധാനനേതാക്കളെ പങ്കെടുപ്പിച്ചുള്ള പ്രചാരണം ആരംഭിക്കും. പ്രതിപക്ഷനേതാവ് വി.ഡി സതീശൻ, രമേശ്‌ചെന്നിത്തല, ചാണ്ടി ഉമ്മൻ തുടങ്ങിവർ പ്രചാരണത്തിനെത്തും. താരപ്രചാരകരെ ഉൾപ്പെടുത്തിയുള്ള റോഡ് ഷോയും സംഘടിപ്പിക്കും. 50 വർഷത്തെ കോർപറേഷനിലെ വികസനമുരടിപ്പ് ചൂണ്ടിക്കാട്ടുന്നതാണ് യു.ഡി.എഫിന്റെ പ്രചാരണം. ഭരണവീഴ്ചകളും സ്വജനപക്ഷപാതവുമെല്ലാം ഇതിനകം ചർച്ചയാക്കിയിട്ടുണ്ട്. ശബരിമല സീസണായതിനാൽ സ്വർണക്കൊള്ളയുമായി ബന്ധപ്പെട്ട വിവാദങ്ങളും  ചർച്ചയാക്കി മാറ്റുന്നുണ്ട്. വിശ്വാസികളുടെ മനസിനെ സ്വാധീനിക്കത്തക്ക രീതിയിലാണ് ശബരിമല വിഷയം പ്രചാരണത്തിൽ തുറുപ്പുചീട്ടാക്കി മാറ്റുന്നത്. കൂടാതെ വെള്ളാപ്പള്ളിയുടെ വിവാദ പരാമർശവും മുഖ്യമന്ത്രിയുടെ ഹിന്ദുപത്രത്തിലെ അഭിമുഖവും ചർച്ചയാക്കി മാറ്റാനാണ് ലക്ഷ്യമിടുന്നത്. പാർട്ടിതലത്തിൽ നടത്തിയ സർവേഫലങ്ങൾ യു.ഡി.എഫിന്റെ ആത്മവിശ്വാസം വർധിപ്പിച്ചിട്ടുണ്ട്. 2010 ലെ തെരഞ്ഞെടുപ്പിലുണ്ടായിനേക്കാൾ വലിയ മുന്നേറ്റമുണ്ടാകുമെന്നാണ് യു.ഡി.എഫിന്റെ കണക്കുകൂട്ടൽ. 75 വാർഡുകളിൽ 34 പേരായിരുന്നു യു.ഡി.എഫിൽ നിന്ന് വിജയിച്ചത്. ഇത്തവണ  41 മുതൽ 45 സീറ്റുകൾ വരെ നേടാനാകുമെന്ന കണക്കുകൂട്ടലിലാണ് യു.ഡി.എഫ്. 
 എൽ.ഡി.എഫ് വാർഡ് കൺവൻഷനുകളെല്ലാം ഇതിനകം പൂർത്തീകരിച്ചു. സ്ഥാനാർഥികൾ വീടുകൾ കയറിയും വോട്ടർമാരെ നേരിൽക്കണ്ടും പൊതുപര്യടനം ആരംഭിച്ചിട്ടുണ്ട്. ഈ ആഴ്ചയോടെ പ്രധാന നേതാക്കൾ പ്രചാരണത്തിനായെത്തും. 45 മുതൽ 47 സീറ്റുകൾ വരെ ലഭിക്കുമെന്നാണ് എൽ.ഡി.എഫ് കണക്കുകൂട്ടൽ. 

നിലവിൽ ഏഴ് കൗൺസിലർമാരുള്ള ബി.ജെ.പി കഴിഞ്ഞ തെരഞ്ഞെടുപ്പിൽ 22 ഇടങ്ങളിലാണ് രണ്ടാംസ്ഥാനത്തെത്തിയത്. 2015ലും 2020ലും നേടിയത് ഏഴ് സീറ്റുകളാണെങ്കിലും 2015ൽ ഏഴിടത്ത് രണ്ടാമതായിരുന്ന പാർട്ടിക്ക് 2020 ൽ 22 ഇടത്ത് രണ്ടാമത് എത്താനായി. ഈ മികവ് ആവർത്തിച്ചാൽ ഇത്തവണ 20 ൽ കുറയാതെ സീറ്റുകളിൽ വിജയിക്കാൻ കഴിയുമെന്നാണ് ബി.ജെ.പിയുടെ കണക്കുകൂട്ടൽ.