കൊച്ചി: നടിയെ ആക്രമിച്ച കേസിലെ മൂന്നാം പ്രതി മണികണ്ഠന്‍ ആത്മഹത്യക്ക് ശ്രമിച്ചു. ഇന്ന് പുലര്‍ച്ചെ മദ്യ ലഹരിയിലാണ് ഇയാള്‍ കൈ ഞെരമ്പ് മുറിച്ചത്. മദ്യപിച്ച് പ്രശ്‌നമുണ്ടാക്കിയതിനെ തുടര്‍ന്ന് പാലാരിവട്ടം പൊലിസ് ഇയാളെ കസ്റ്റഡിയില്‍ എടുത്തിരുന്നു. അറസ്റ്റ് ചെയ്ത് വിട്ടയച്ചതിന് പിന്നാലെ കടയില്‍ നിന്ന് ബ്ലേഡ് വാങ്ങി കൈ ഞരമ്പ് മുറിക്കുകയായിരുന്നു. ആശുപത്രിയില്‍ ചികിത്സ തേടിയ ശേഷം ഇയാളെ പൊലിസ് വീട്ടിലേക്ക് പറഞ്ഞു വിട്ടു.

നടിയെ ആക്രമിച്ച കേസില്‍ ഡിസംബര്‍ എട്ടിനാണ് കോടതി വിധി പറയുക. എറണാകുളം പ്രിന്‍സിപ്പല്‍ സെഷന്‍സ് കോടതി ജഡ്ജിയാണ് കേസില്‍ വിധി പറയുന്നത്. പള്‍സര്‍ സുനി ഒന്നാം പ്രതിയായ കേസില്‍, നടന്‍ ദിലീപാണ് എട്ടാം പ്രതി. 28 സാക്ഷികളാണ് കേസില്‍ കൂറുമാറിയത്.

2017 ഫെബ്രുവരി 17നാണ് ഓടിക്കൊണ്ടിരിക്കുന്ന വാഹനത്തില്‍ വച്ച് നടി ആക്രമത്തിന് ഇരായായത്. 2018 മാര്‍ച്ച് എട്ടിനാണ് കേസില്‍ വിചാരണ തുടങ്ങിയത്. പ്രോസിക്യൂഷനും പ്രതിഭാഗവും സാക്ഷിവിസ്താരത്തിനിടെ പലതവണ മേല്‍ക്കോടതികളില്‍ ഹരജികള്‍ നല്‍കിയിരുന്നു. 261 സാക്ഷികളെ വിസ്തരിച്ച കോടതി 1700 രേഖകളും പരിഗണിച്ചു.

Manikandan, the third accused in the actress attack case, attempted suicide in Kochi after being released from police custody. The court will deliver its verdict on December 8.