നീലേശ്വരം: നീലേശ്വരം താലൂക്കാശുപത്രി വളപ്പില്‍ അത്യാഹിത വിഭാഗം പ്രവര്‍ത്തിക്കുന്ന കെട്ടിടത്തിനോട് ചേര്‍ന്ന് അപകട ഭീഷണിയില്‍ ജലസംഭരണി. കേരള ജല അതോറിറ്റിയുടെ 30,000 ലിറ്റര്‍ സംഭരണശേഷിയുള്ള ജലസംഭരണിയുടെ നില്‍പാണ് അപകടം സൃഷ്ടിക്കുന്നത്. ഈ വെള്ളമാണെങ്കിലോ താലൂക്കാശുപത്രിയുടെ ആവശ്യത്തിന് ഉപയോഗിക്കുന്നുമില്ല. ആശുപത്രിയുടെ സമീപത്തെ 170 ഓളം കുടുംബങ്ങള്‍ക്കുള്ള കുടിവെള്ള വിതരണം ചെയ്യാനാണ് ആശുപത്രി വളപ്പില്‍ ജലസംഭരണി സ്ഥാപിച്ചത്.

കാലപ്പഴക്കം മൂലം ഇതിന്റെ കമ്പി ദ്രവിച്ച് പുറത്തേക്ക് തള്ളിയ നിലയിലുമാണ്. നൂറ്റാണ്ടുകളായിട്ടും പൊളിച്ചു മാറ്റി പുതിയ സംഭരണി നിര്‍മിക്കാന്‍ പകരം സ്ഥലം ലഭിക്കാത്തതാണ് ജലവകുപ്പിന് തടസ്സമായി നില്‍ക്കുന്നത്. ഒരു വര്‍ഷം മുമ്പ് താലൂക്കാശുപത്രി പൊതുസന്ദര്‍ശനത്തിനെത്തിയ മന്ത്രി വീണാ ജോര്‍ജ് ഇതിന്റെ അപകടാവസ്ഥ നേരില്‍ കണ്ടിരുന്നതുമാണ്. പകരം സംവിധാനം ഏര്‍പ്പെടുത്താന്‍ അന്ന് മന്ത്രി നിര്‍ദേശവും നല്‍കിയിരുന്നു. എന്നിട്ടും ഇതുവരെ ഒന്നും നടപ്പായില്ല.  

 ALSO READ: ഒരു കോടിയുടെ ഇന്‍ഷുറന്‍സ് തുക തട്ടിയെടുക്കാന്‍ സുകുമാരകുറുപ്പ് മോഡല്‍ ; കാറില്‍ കണ്ടത് കത്തിക്കരിഞ്ഞ മൃതദേഹം- പ്രതിയെ കുടുക്കിയത് കാമുകിയുമായുള്ള ചാറ്റ്

സംഭരണിയില്‍ വെള്ളം നിറയ്ക്കുമ്പോള്‍ ആശുപത്രിയിലെ രോഗികളും ജീവനക്കാരും ഒന്നും സംഭവിക്കല്ലേ എന്ന പ്രാര്‍ത്ഥനയിലാണ്. അമൃത് പദ്ധതിയില്‍ ഉള്‍പ്പെടുത്തി പുതിയ സംഭരണി നിര്‍മിക്കുമെന്നാണ് അവസാനം അധികൃതരുടെ വിശദീകരണം. ആരോഗ്യവകുപ്പും ജല വകുപ്പും നീലേശ്വരം നഗരസഭ അധികൃതരും ഇടപെട്ട് പ്രശ്‌നം പരിഹരിക്കണമെന്നാണ് നാട്ടുകാരുടെ ആവശ്യം. 

A 30,000-litre water tank at Neeleshwaram Taluk Hospital, intended to supply drinking water to around 170 nearby families, has become dangerously corroded, but no replacement has been arranged despite ministerial directives.