കുന്നുംകൈ: പാഠ്യ പാഠ്യേതര വിഷയങ്ങളില്‍ ചിറ്റാരിക്കല്‍ ഉപജില്ലയില്‍ മികച്ച സ്‌കൂളായി തിരഞ്ഞെടുക്കപ്പെട്ട കുന്നുംകൈ എ.യു.പി സ്‌കൂള്‍ 'നമ്മുടെ സ്‌കൂള്‍ നമ്മുടെ വിരല്‍ തുമ്പില്‍' എന്ന ഓണ്‍ലൈന്‍ സംവിധാനം ഒരുക്കി ശ്രദ്ധേയമാവുന്നു. പഠനത്തോടൊപ്പം കുട്ടികളുടെ ജീവിത സാഹചര്യം  മനസിലാക്കിയും അടിസ്ഥാന സൗകര്യമൊരുക്കിയും സ്‌കൂളിനെയും രക്ഷിതാക്കളെയും തമ്മില്‍ കൂടുതല്‍ ബന്ധിപ്പിക്കുന്നതിനും മറ്റുമാണു നൂതന സാങ്കേതിക വിദ്യ പരീക്ഷിക്കുന്നത്.
കുട്ടികളുടെ പഠന പുരോഗതിയും ഹാജറും വിവിധ പരീക്ഷകള്‍ക്കു ലഭിച്ച  മാര്‍ക്കും പുതിയ സംവിധാനം വഴി  രക്ഷിതാക്കള്‍ക്കു വീട്ടിലിരുന്നു അറിയാം. ഇതിനായി പ്രത്യേകം വെബ് സൈറ്റും എസ്.എം.എസ് സംവിധാനവും ഒരുക്കിയിട്ടുണ്ട്. ഇതിന്റെ മൊബൈല്‍ സോഫ്റ്റ്‌വെയറും വികസിപ്പിച്ചെടുത്തിയിട്ടുണ്ട്. സംസ്ഥാനത്തു തന്നെ ഇത്തരം പദ്ധതികള്‍ നടപ്പിലാക്കുന്ന ഏതാനും സ്‌കൂളുകളില്‍ ഒന്നാണ് കുന്നുംകൈ എ.യു.പി സ്‌കൂളെന്നു അധ്യാപകര്‍ പറഞ്ഞു. പഠനത്തില്‍ പിന്നാക്കം നില്‍ക്കുന്ന കുട്ടികളെ കണ്ടെത്തി അവര്‍ക്കു  പ്രത്യേകം പരിശീലനം നല്‍കുന്ന പദ്ധതി കഴിഞ്ഞ വര്‍ഷം മുതല്‍ നടപ്പിലാക്കിവരുന്നുണ്ട്. തങ്ങളുടെ സഹപാഠിക്കു വീടില്ലാതെ കഷ്ടപ്പെടുന്ന വാര്‍ത്ത അറിഞ്ഞു വിദ്യാര്‍ഥികളും അധ്യാപകരും രക്ഷിതാക്കളും ചേര്‍ന്നു സ്‌നേഹവീടു നിര്‍മിച്ചു നല്‍കിയതു വഴി നേരത്തെ സ്‌കൂള്‍  ശ്രദ്ധ നേടിയിരുന്നു.
ഓണ്‍ലൈന്‍ സംവിധാനത്തിന്റെ ഉദ്ഘാടനം സ്‌കൂള്‍ മാനേജര്‍ എല്‍.കെ നസീര്‍ നിര്‍വഹിച്ചു. പി.ടി.എ പ്രസിഡന്റ് സി.വി സുരേഷ് അധ്യക്ഷനായി. സ്‌കൂള്‍ സീനിയര്‍ അസ്സിസ്റ്റന്റ് സി.എം വര്‍ഗീസ് പദ്ധതി വിശദീകരിച്ചു. പ്രധാനധ്യാപിക ലിസമ്മ ജോസഫ്, കെ.എം പ്രസാദ്, ജിന്‍സി മാത്യു, പി.ജെ തങ്കമ്മ സംബന്ധിച്ചു.