സൂറിച്ച്: പുതുവത്സരാഘോഷത്തിനിടെ സ്വിറ്റ്സര്‍ലന്‍ഡിലെ ബാറില്‍ വന്‍ സ്ഫോടനം. സ്‌ഫോടനത്തിന് പിന്നാലെ തീപിടിത്തവുമുണ്ടായി. അപകടത്തില്‍ നിരവധി പേര്‍ മരിച്ചതായാണ് റിപ്പോര്‍ട്ട്. കുറേയാളുകള്‍ക്ക് പരുക്കേറ്റതായും റിപ്പോര്‍ട്ടില്‍ പറയുന്നു.  ക്രാന്‍സ് മൊണ്ടാനയില്‍ പ്രവര്‍ത്തിക്കുന്ന ഒരു ബാറിലാണ് സ്ഫോടനമുണ്ടായത്. 

പ്രാദേശികസമയം വ്യാഴാഴ്ച പുലര്‍ച്ചെ ഒന്നരയോടെയാണ്  സ്ഫോടനമുണ്ടായത്. സ്ഫോടനത്തിന്റെ ഉറവിടമോ എങ്ങനെയാണ് സ്ഫോടനമുണ്ടായതെന്നോ വ്യക്തമല്ലെന്നും ഒട്ടേറെപേര്‍ മരിച്ചെന്നും നിരവധിപേര്‍ക്ക് പരിക്കേറ്റിട്ടുണ്ടെന്നും പൊലിസ് വക്താവ് വാര്‍ത്താ ഏജന്‍സിയായ എ.എഫ്.പിയോട് പറഞ്ഞു. സംഭവസ്ഥലത്ത് പൊലിസിന്റെ ഇടപെടല്‍ തുടരുകയാണെന്നും അദ്ദേഹം കൂട്ടിച്ചേര്‍ത്തു.

ALSO READ: 'ഇസ്‌റാഈലിനെ വിറപ്പിച്ച ശബ്ദത്തിനുടമ, കുഞ്ഞുമക്കള്‍ക്ക് വാത്സല്യനിധിയായ പിതാവ്; കുടുംബത്തോടൊപ്പം രക്തസാക്ഷിത്വം' മക്കളൊടൊത്തുള്ള അബു ഉബൈദയുടെ ദൃശ്യങ്ങള്‍ 

സ്‌ഫോടനത്തെ തുടര്‍ന്നാണ് തീപിടുത്തമുണ്ടായതെന്നും ആ സമയത്ത് 100-ലധികം പേര്‍ ബാറിനുള്ളില്‍ ഉണ്ടായിരുന്നതായി കരുതപ്പെടുന്നുവെന്നും പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.

പ്രദേശം പൂര്‍ണ്ണമായും അടച്ചിട്ടിരിക്കുകയാണ്.  ക്രാന്‍സ്-മൊണ്ടാനയില്‍ പറക്കല്‍ നിരോധിത മേഖല ഏര്‍പ്പെടുത്തിയിട്ടുണ്ടെന്ന് പൊലിസ് അറിയിട്ടു. തീപിടുത്തത്തിന്റെ കാരണം വ്യക്തമല്ലെന്നും പൊലിസ് പറഞ്ഞു.

അതിനിടെ, സ്വിറ്റ്സര്‍ലാന്‍ഡിലെ സ്ഫോടനത്തിന്റെ ദൃശ്യങ്ങളെന്നപേരില്‍ ചില വീഡിയോകള്‍ സാമൂഹികമാധ്യമങ്ങളില്‍ പ്രചരിക്കുന്നുണ്ട്. ഒരുകെട്ടിടത്തില്‍നിന്ന് തീ ഉയരുന്നതും ആളുകള്‍ സമീപത്ത് തടിച്ചുകൂടിനില്‍ക്കുന്നതും ദൃശ്യങ്ങളില്‍ കാണാം. എന്നാല്‍, ഇത് ക്രാന്‍സ് മൊണ്ടാനയിലെ ദൃശ്യങ്ങളാണോ എന്നതില്‍ സ്ഥിരീകരണം വന്നിട്ടില്ല. 

a powerful explosion followed by a fire broke out at a bar in crans-montana, switzerland, during new year celebrations, leaving several people dead and many injured, according to police reports.