തിരുവനന്തപുരം: വീട് കുത്തിത്തുറന്ന് 15 പവൻ സ്വർണ്ണവും ഒരു ലക്ഷം രൂപയും കവർന്ന മോഷ്ടാവ്, എടുത്ത സ്വർണ്ണത്തിൽ ഒരു ഭാഗം വീട്ടിൽത്തന്നെ മറന്നുവെച്ച് കടന്നുകളഞ്ഞു. ഊരൂട്ടമ്പലം ഗോവിന്ദമംഗലം കട്ടറക്കുഴി നന്ദാവനത്തിൽ പ്രതാപചന്ദ്രൻ നായരുടെ വീട്ടിലാണ് വിചിത്രമായ ഈ മോഷണം നടന്നത്. 15 പവൻ മോഷ്ടിച്ചെങ്കിലും ഇതിൽ 10 പവനോളം വരുന്ന സ്വർണ്ണാഭരണങ്ങൾ അടുക്കളയിലെ സ്ലാബിൽ ഉപേക്ഷിച്ച നിലയിൽ കണ്ടെത്തുകയായിരുന്നു.

ALSO READ: മിനിറ്റുകൾ കൊണ്ട് എത്തേണ്ട ദൂരം, പിന്നിട്ടത് 16 വർഷം; 2010-ൽ ഓർഡർ ചെയ്ത നോക്കിയ ഫോണുകൾ ഒടുവിൽ ഉടമയുടെ കൈകളിൽ

വർക്‌ഷോപ്പ് ജീവനക്കാരനായ പ്രതാപചന്ദ്രൻ നായരും കുടുംബവും മക്കളുടെ സ്കൂൾ വാർഷികാഘോഷത്തിൽ പങ്കെടുക്കാൻ പോയ സമയത്താണ് മോഷണം നടന്നത്. രാത്രി ഒൻപത് മണിയോടെ വീട്ടുകാർ തിരിച്ചെത്തിയപ്പോഴാണ് പിൻവാതിൽ തുറന്നു കിടക്കുന്നത് ശ്രദ്ധയിൽപ്പെട്ടത്. കിടപ്പുമുറിയിലെ അലമാരയിൽ സൂക്ഷിച്ചിരുന്ന 15 പവൻ സ്വർണ്ണവും ഒരു ലക്ഷം രൂപയുമാണ് നഷ്ടപ്പെട്ടത്. ഇതിൽ തുണിയിൽ പൊതിഞ്ഞു സൂക്ഷിച്ചിരുന്ന 10 പവൻ സ്വർണ്ണം അടുക്കളയിലെ സ്ലാബിൽ വെച്ച നിലയിൽ കണ്ടെത്തിയിട്ടുണ്ട്.

ALSO READ: വീട് നിർമ്മാണത്തിനായി മണ്ണുമാറ്റിയപ്പോൾ കണ്ടത് ചെമ്പ് പാത്രം, തുറന്നപ്പോൾ കണ്ണഞ്ചിപ്പിക്കുന്ന സ്വർണ്ണാഭരണങ്ങൾ; പ്രദേശത്ത് കൂടുതൽ പരിശോധനകൾ നടത്തും

പിൻവാതിൽ വഴി രക്ഷപ്പെടാൻ ശ്രമിക്കുന്നതിനിടെ മോഷ്ടാവ് സ്വർണ്ണപ്പൊതി അടുക്കളയിൽ മറന്നുവെച്ചതാകാമെന്നാണ് പൊലിസിന്റെ പ്രാഥമിക നിഗമനം. മാറനല്ലൂർ പൊലിസ്, വിരലടയാള വിദഗ്ധർ, ഡോഗ് സ്ക്വാഡ് എന്നിവർ സ്ഥലത്തെത്തി പരിശോധന നടത്തി.

മാറനല്ലൂർ പ്രദേശം അടുത്ത കാലത്തായി മോഷണ പരമ്പരകളുടെ കേന്ദ്രമായി മാറിയിരിക്കുകയാണ്. കഴിഞ്ഞ നാല് മാസത്തിനിടെ മാത്രം ഈ പ്രദേശത്ത് ഒരുകോടിയിലധികം രൂപയുടെ കവർച്ച നടന്നതായാണ് കണക്കുകൾ സൂചിപ്പിക്കുന്നത്. എന്നാൽ ഇത്രയധികം മോഷണങ്ങൾ നടന്നിട്ടും ഒരു പ്രതിയെപ്പോലും പിടികൂടാൻ പൊലിസിന് സാധിക്കാത്തതിൽ നാട്ടുകാർക്കിടയിൽ ശക്തമായ പ്രതിഷേധം നിലനിൽക്കുന്നുണ്ട്.

In a bizarre incident at Maranalloor, Thiruvananthapuram, a thief broke into the house of a workshop employee and stole 15 sovereigns of gold and ₹1 lakh in cash while the family was away at a school function. However, in a stroke of luck for the homeowners, the thief forgot 10 sovereigns of the stolen gold on the kitchen slab while escaping through the back door. The incident highlights a worrying trend, as the Maranalloor region has witnessed several robberies totaling over ₹1 crore in the last four months. Local residents are in fear as the police are yet to make any significant arrests in these ongoing cases.