പാലക്കാട്: പട്ടാമ്പി പള്ളിപ്പുറത്ത് ഗുഡ്‌സ് ട്രെയിൻ പാളം തെറ്റിയതിനെ തുടർന്ന് സംസ്ഥാനത്ത് ട്രെയിൻ സർവീസുകൾ താറുമാറായി. മംഗലാപുരത്തുനിന്നും പാലക്കാട്ടേക്ക് വരികയായിരുന്ന ട്രെയിനാണ് ഇന്ന് രാവിലെ 11.30-ഓടെ പാളം തെറ്റിയത്. ഇതേത്തുടർന്ന് പ്രധാന എക്സ്പ്രസ് ട്രെയിനുകൾ ഉൾപ്പെടെ ആറോളം ട്രെയിനുകൾ മണിക്കൂറുകളോളം വൈകിയാണ് സർവീസ് നടത്തുന്നത്.

അപകടവിവരമറിഞ്ഞ് ഉച്ചയ്ക്ക് രണ്ട് മണിയോടെ ഷൊർണൂരിൽ നിന്നുള്ള റെയിൽവേ എൻജിനീയറിങ് സംഘം സ്ഥലത്തെത്തി. പാളം തെറ്റിയ ഗുഡ്‌സ് ട്രെയിൻ നീക്കം ചെയ്ത ശേഷം ഈ പാതയിലൂടെയുള്ള ഗതാഗതം ഭാഗികമായി പുനഃസ്ഥാപിച്ചിട്ടുണ്ട്. എങ്കിലും ട്രെയിനുകളുടെ സമയക്രമം സാധാരണ നിലയിലാകാൻ സമയമെടുക്കും.

ALSO READ: റെയിൽ വൺ ആപ്പിൽ ഡിസ്കൗണ്ട് ടിക്കറ്റ്; ഓഫർ നീട്ടി

ഏറനാട് എക്സ്പ്രസ്, പരശുറാം എക്‌സ്പ്രസ് ലോകമാന്യ തിലക് - കൊച്ചുവേളി എക്സ്പ്രസ്, നിസാമുദ്ദീൻ - കൊച്ചുവേളി എക്സ്പ്രസ്,  കോഴിക്കോട് - തിരുവനന്തപുരം ജനശതാബ്ദി എക്സ്പ്രസ്, കോഴിക്കോട് - പാലക്കാട് പാസഞ്ചർ എന്നീ ട്രെയിനുകൾ വൈകിയോടുന്നു. 

അപകടത്തെ തുടർന്ന് രണ്ട് ട്രെയിനുകൾ ഭാഗികമായി റദ്ദാക്കി. കോഴിക്കോട് നിന്നും പാലക്കാട്ടേക്ക് വരുന്ന പാസഞ്ചർ ഷൊർണൂരിൽ യാത്ര അവസാനിപ്പിച്ചു. പാലക്കാട് നിന്നും കണ്ണൂരിലേക്കുള്ള പാസഞ്ചർ ട്രെയിൻ പാലക്കാടിന് പകരം ഷൊർണൂരിൽ നിന്നാണ് യാത്ര ആരംഭിച്ചത്.

a goods train derailed at pattambi causing major disruption to train services across kerala, with several passenger and express trains delayed as railway authorities carry out restoration and safety measures.