പാലക്കാട്: സ്വകാര്യ സ്‌കൂളിലെ കായിക അധ്യാപകന്‍ വിദ്യാര്‍ഥികളെ ലൈംഗികമായി പീഡിപ്പിച്ച സംഭവത്തില്‍ ഒരു പരാതി കൂടി. വടക്കഞ്ചേരി വടക്കേക്കര സ്വദേശിയായ അധ്യാപകനെതിരെ മൂന്നാമത്തെ എഫ്.ഐ.ആര്‍ ആണ് പാലക്കാട് പൊലിസ് രജിസ്റ്റര്‍ ചെയ്തത്. കൗണ്‍സിലിങിനിടെയാണ് പീഡനവിവരം കുട്ടി വെളിപ്പെടുത്തിയത്.

നഗരത്തിലെ പ്രമുഖ സ്വകാര്യ സ്‌കൂളിലെ മൂന്ന് വിദ്യാര്‍ഥികളാണ് ഇതുവരെ അധ്യാപകനെതിരെ പരാതി നല്‍കിയിരിക്കുന്നത്. ഇയാള്‍ നിലവില്‍ റിമാന്‍ഡിലാണ്. അധ്യാപകന്‍ പഠിപ്പിച്ചിരുന്ന സ്‌കൂളിലെ കൂടുതല്‍ വിദ്യാര്‍ഥികള്‍ക്ക് കൗണ്‍സിലിങ് നല്‍കാന്‍ പൊലിസ് തീരുമാനിച്ചു. കൂടുതല്‍ പേര്‍ പീഡനത്തിനിരയായിട്ടുണ്ടോ എന്ന് ഇതിലൂടെ കണ്ടെത്താനാകും.

പ്രതിയുടെ മൊബൈല്‍ ഫോണ്‍ പൊലിസ് ശാസ്ത്രീയ പരിശോധനയ്ക്ക് അയച്ചു. കൂടുതല്‍ തെളിവുകള്‍ ശേഖരിക്കാന്‍ പ്രതിയെ കസ്റ്റഡിയില്‍ വാങ്ങി ചോദ്യം ചെയ്യും.  പീഡനവിവരം അറിഞ്ഞിട്ടും പൊലിസില്‍ അറിയിക്കുന്നതില്‍ സ്‌കൂള്‍ അധികൃതര്‍ക്ക് വീഴ്ച പറ്റിയോ എന്ന് വിദ്യാഭ്യാസ വകുപ്പ് അന്വേഷിക്കും. കുറ്റകരമായ അനാസ്ഥയുണ്ടെന്ന് കണ്ടെത്തിയാല്‍ സ്‌കൂള്‍ മാനേജ്‌മെന്റിനെതിരെയും കര്‍ശന നടപടിയുണ്ടാകും.

A third FIR has been registered against a sports teacher in Palakkad after another student revealed sexual harassment during counseling, while the education department probes the school's alleged delay in reporting the incidents.