ചെന്നൈ: നിരവധി വാഗ്ധാനങ്ങളുമായി അണ്ണാ ഡിഎംകെയുടെ രണ്ടാംഘട്ട പ്രകടന പത്രിക. റേഷന്‍ കാര്‍ഡ് ഉടമകള്‍ക്ക് വര്‍ഷത്തില്‍ മൂന്ന് പാചകവാതക സിലിന്‍ഡറുകള്‍ സൗജന്യമായി നല്‍കുമെന്നും വിദ്യാഭ്യാസ വായ്പ എഴുതിത്തള്ളുമെന്നുമാണ് അണ്ണാ ഡി.എം.കെ. ജനറല്‍ സെക്രട്ടറി എടപ്പാടി പളനിസ്വാമി പുറത്തിറക്കിയ രണ്ടാം പ്രകടനപത്രികയിലുള്ളത്.

സാമ്പത്തികമായി പിന്നാക്കം നില്‍ക്കുന്ന വിദ്യാര്‍ഥികളുടെ കടമാണ് എഴുതിത്തള്ളുക. തൊഴിലില്ലായ്മ വര്‍ധിച്ചുവരുന്നതിനാല്‍ വിദ്യാഭ്യാസം പൂര്‍ത്തിയാക്കിയ പാവപ്പെട്ട വിദ്യാര്‍ഥികള്‍ വായ്പ തിരിച്ചടയ്ക്കാനാതെ ബുദ്ധിമുട്ടുകയാണ്. അഭ്യസ്ഥവിദ്യരുടെ ദുരിതം മനസ്സിലാക്കിയാണ് വായ്പ എഴുതിത്തള്ളുന്നതെന്ന് പളനിസ്വാമി അറിയിച്ചു.

വാര്‍ധക്യകാല പെന്‍ഷന്‍ 1000 രൂപയില്‍നിന്ന് 2000 രൂപയാക്കും, ജല്ലിക്കെട്ടില്‍ മരിച്ചവരുടെ ആശ്രിതര്‍ക്ക് 10 ലക്ഷം രൂപ സഹായധനം, ഭിന്നശേഷിക്കാരുടെ കടം എഴുതിത്തള്ളും തുടങ്ങിയ വാഗ്ദാനങ്ങളും പത്രികയിലുണ്ട്.