ദോഹ: അമേരിക്കയുമായി ഒമാനില്‍ വെച്ച് നടന്ന മധ്യസ്ഥ ചര്‍ച്ചകള്‍ക്ക് പിന്നാലെ തങ്ങളുടെ മിസൈല്‍ പദ്ധതികള്‍ ചര്‍ച്ചാവിഷയമേ അല്ലെന്ന് വ്യക്തമാക്കി ഇറാന്‍. ഇറാന്റെ മിസൈല്‍ പ്രോഗ്രാം രാജ്യത്തിന്റെ പ്രതിരോധവുമായി ബന്ധപ്പെട്ടതാണെന്നും അതില്‍ വിട്ടുവീഴ്ചകള്‍ക്ക് തയാറല്ലെന്നും വിദേശകാര്യ മന്ത്രി അബ്ബാസ് അരാഗ്ചി പറഞ്ഞു. ഇറാന്റെ മണ്ണില്‍ അമേരിക്കന്‍ ആക്രമണമുണ്ടായാല്‍ മിഡില്‍ ഈസ്റ്റിലെ യു.എസ് സൈനിക താവളങ്ങളെ ലക്ഷ്യം വെക്കുമെന്നും അദ്ദേഹം മുന്നറിയിപ്പ് നല്‍കി.

ഒമാന്‍ തലസ്ഥാനമായ മസ്‌കറ്റില്‍ നടന്ന ചര്‍ച്ചകള്‍ ശുഭസൂചനയാണെങ്കിലും വിശ്വാസം കെട്ടിപ്പടുക്കാന്‍ ഇനിയും ഏറെ ദൂരം സഞ്ചരിക്കാനുണ്ടെന്ന് അരാഗ്ചി പറഞ്ഞു. യുറേനിയം സമ്പുഷ്ടീകരണം ഇറാന്റെ അലംഘനീയമായ അവകാശമാണെന്നും ചര്‍ച്ചകളിലൂടെ പ്രശ്‌നപരിഹാരത്തിന് ഇറാന്‍ സന്നദ്ധമാണെന്നും അദ്ദേഹം കൂട്ടിച്ചേര്‍ത്തു.

അതേസമയം, ഒമാനിലെ ചര്‍ച്ചകള്‍ക്ക് തൊട്ടുപിന്നാലെ ഇറാനുമായുള്ള വ്യാപാരം തുടരുന്ന രാജ്യങ്ങള്‍ക്കെതിരെ താരിഫ് ഏര്‍പ്പെടുത്തുന്ന ഉത്തരവില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ഒപ്പുവെച്ചു. ഇറാന്റെ എണ്ണ കയറ്റുമതി തടയുന്നതിനായി കൂടുതല്‍ കപ്പലുകള്‍ക്കും ഷിപ്പിങ് ഏജന്‍സികള്‍ക്കും എതിരെ ഉപരോധവും ഏര്‍പ്പെടുത്തിയിട്ടുണ്ട്. വരാനിരിക്കുന്ന ബുധനാഴ്ച ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു ട്രംപുമായി കൂടിക്കാഴ്ച നടത്താനിരിക്കെ, ഇറാന്റെ ബാലസ്റ്റിക് മിസൈല്‍ പദ്ധതികള്‍ക്കും പ്രാദേശിക സായുധ സംഘങ്ങള്‍ക്കുള്ള പിന്തുണയ്ക്കും കടുത്ത നിയന്ത്രണങ്ങള്‍ വേണമെന്ന നിലപാടിലാണ് ഇസ്‌റാഈല്‍.

നെതന്യാഹു ബുധനാഴ്ച ട്രംപിനെ കാണും 

അമേരിക്കയും ഇറാനും തമ്മിലുള്ള ആണവ ചര്‍ച്ചകളുടെ പശ്ചാത്തലത്തില്‍ ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു അമേരിക്കന്‍ പ്രസിഡന്റ് ഡൊണാള്‍ഡ് ട്രംപുമായി കൂടിക്കാഴ്ച നടത്തും. ബുധനാഴ്ച വാഷിങ്ടണിലാണ് കൂടിക്കാഴ്ച. ഒമാനില്‍ വെച്ച് നടന്ന ചര്‍ച്ചകളില്‍ അമേരിക്ക സ്വീകരിച്ച നിലപാടുകളില്‍ ഇസ്‌റാഈല്‍ ആശങ്ക പ്രകടിപ്പിച്ചിട്ടുണ്ട്.

ഇറാനുമായുള്ള ഏതൊരു കരാറിലും അവരുടെ ബാലസ്റ്റിക് മിസൈല്‍ പദ്ധതികള്‍ക്ക് നിയന്ത്രണം ഏര്‍പ്പെടുത്തണമെന്നും ഹിസ്ബുല്ല, ഹമാസ് ഉള്‍പ്പെടെയുള്ള സംഘടനകള്‍ക്ക് നല്‍കുന്ന പിന്തുണ ഇറാന്‍ അവസാനിപ്പിക്കണമെന്നും നെതന്യാഹു ആവശ്യപ്പെട്ടു. ഇറാന്‍ ആണവായുധം നിര്‍മ്മിക്കുന്നത് തടയാന്‍ ഏത് സൈനിക നടപടിക്കും ഇസ്‌റാഈല്‍ സന്നദ്ധമാണെന്ന സൂചനകള്‍ക്കിടെയാണ് ഈ കൂടിക്കാഴ്ച.

ALSO READ: 'ആവശ്യമായ സ്വീഡിഷ് യുവതികളെ എത്തിച്ചുനല്‍കി' ; അനില്‍ അംബാനിക്കെതിരേ എപ്സ്റ്റീന്‍ ഫയലില്‍ ഗുരുതര വെളിപ്പെടുത്തല്‍ | Epstein Files

English Summary: Iranian Foreign Minister Abbas Araghchi stated that Iran’s missile program is 'off the table' in negotiations with the US, emphasizing it as a matter of national defense. While calling the mediated talks in Oman a 'good start,' he warned of retaliatory strikes on US bases if Iranian territory is attacked. Despite the diplomatic engagement, President Trump has imposed new tariffs and sanctions on entities doing business with Iran to curb its oil exports. Meanwhile, Israel continues to push for including Iran’s ballistic missiles and regional influence in the scope of future negotiations.