ദുബൈ: യുഎഇയില്‍ പനി പടരുന്ന സാഹചര്യത്തില്‍ പ്രവാസികള്‍ക്ക് ജാഗ്രതാ നിര്‍ദേശവുമായി ആരോഗ്യ വിദഗ്ധര്‍. പനിയോ ചുമയോ അനുഭവപ്പെടുമ്പോള്‍ ഡോക്ടറുടെ നിര്‍ദേശമില്ലാതെ സ്വയം ആന്റിബയോട്ടിക്കുകള്‍ കഴിക്കുന്നത് ഗുരുതരമായ ആരോഗ്യപ്രശ്‌നങ്ങള്‍ക്ക് കാരണമാകുമെന്ന് അധികൃതര്‍ മുന്നറിയിപ്പ് നല്‍കി.
പ്രവാസി സമൂഹങ്ങള്‍ക്കിടയില്‍ കണ്ടുവരുന്ന സ്വയംചികിത്സാ രീതി 'സൂപ്പര്‍ ബഗ്ഗുകളുടെ' (Superbugs) വളര്‍ച്ചയ്ക്ക് കാരണമാകുന്നുവെന്ന് ആരോഗ്യവിദഗ്ധര്‍ ചൂണ്ടിക്കാട്ടുന്നു. അനാവശ്യമായി ആന്റിബയോട്ടിക്കുകള്‍ ഉപയോഗിക്കുമ്പോള്‍ ശരീരത്തിലെ ബാക്ടീരിയകള്‍ ഈ മരുന്നുകളെ പ്രതിരോധിക്കാന്‍ ശേഷി നേടുന്നു. ഇത് പിന്നീട് യഥാര്‍ത്ഥത്തില്‍ ഒരു അണുബാധ ഉണ്ടാകുമ്പോള്‍ മരുന്നുകള്‍ ഫലിക്കാത്ത അവസ്ഥയിലേക്ക് നയിക്കുകയും രോഗം സങ്കീര്‍ണ്ണമാക്കുകയും ചെയ്യുന്നു.

വൈറല്‍ പനിയും ആന്റിബയോട്ടിക്കും

സാധാരണയായി കണ്ടുവരുന്ന പനി, ജലദോഷം, തൊണ്ടവേദന എന്നിവ വൈറസുകള്‍ മൂലമാണ് ഉണ്ടാകുന്നത്. ആന്റിബയോട്ടിക്കുകള്‍ ബാക്ടീരിയകളെ നശിപ്പിക്കാന്‍ രൂപകല്‍പ്പന ചെയ്തവയാണ്. വൈറല്‍ ഇന്‍ഫെക്ഷനുകളെ പ്രതിരോധിക്കാന്‍ ആന്റിബയോട്ടിക്കുകള്‍ക്ക് കഴിയില്ല. അതുകൊണ്ട് തന്നെ വൈറല്‍ പനിക്ക് ആന്റിബയോട്ടിക് കഴിക്കുന്നത് ഗുണത്തേക്കാളേറെ ദോഷമാണ് ചെയ്യുകയെന്നും വിദഗ്ധര്‍ വ്യക്തമാക്കുന്നു.
'സൂപ്പര്‍ ബഗ്ഗുകളെ ചെറുക്കുക' എന്ന ലക്ഷ്യത്തോടെ യുഎഇ ആരോഗ്യരോഗ പ്രതിരോധ മന്ത്രാലയവും ദേശീയ കമ്മിറ്റിയും വിവിധ ബോധവല്‍ക്കരണ പരിപാടികള്‍ നടത്തിവരികയാണ്. ആരോഗ്യത്തിന് കൂടുതല്‍ മുന്‍ഗണന നല്‍കണമെന്നും മരുന്നുകള്‍ ഉപയോഗിക്കുമ്പോള്‍ ജാഗ്രത പാലിക്കണമെന്നും അധികൃതര്‍ നിര്‍ദേശിച്ചു.

ALSO READ: ചിപ്പുള്ള ഇന്ത്യന്‍ ഇപാസ്‌പോര്‍ട്ട് പ്രവാസികള്‍ക്ക് വിതരണംചെയ്ത് തുടങ്ങി, മാറ്റങ്ങള്‍ അറിഞ്ഞിരിക്കാം | New E-Passports

Summary: As flu season peaks in the UAE, health experts have issued a stern warning to expatriates regarding the dangers of self-medication. The authorities emphasized that antibiotics should never be taken without a doctor's prescription for common symptoms like fever or cough.