ബംഗളുരു: ബംഗളുരുവിലെ പി.ഇ.എസ് സര്‍വകലാശാലയില്‍ മുസ് ലിം വിദ്യാര്‍ഥിയെ വര്‍ഗീയമായി അധിക്ഷേപിച്ച അധ്യാപകനെ സസ്‌പെന്‍ഡ് ചെയ്തു. ഡോ. മുരളീധര്‍ ദേശ്പാണ്ഡെ എന്ന പ്രൊഫസറാണ് ക്ലാസ് മുറിയില്‍വച്ച് വിദ്യാര്‍ഥിയെ തീവ്രവാദി എന്ന് വിളിച്ചത്. 

ചൊവ്വാഴ്ച്ചയാണ് സംഭവം നടന്നത്. അഫാന്‍ എന്ന വിദ്യാര്‍ഥി ക്ലാസില്‍ നിന്ന് പുറത്തുപോകാനായി അനുവാദം ചോദിച്ചപ്പോഴാണ് സംഭവം. ' നിനക്ക് നാണമാകുന്നില്ലേ തീവ്രവാദി' എന്ന് അധ്യാപകന്‍ ആക്രോശിക്കുന്ന വീഡിയോ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്. 

''ഇന്ന് ഞാന്‍ വളരെ ശാന്തനായിരിക്കുമെന്നാണ് കരുതിയത്.. ഭീകരന്‍''- പ്രൊഫസര്‍ വീഡിയോയില്‍ പറയുന്നു. 

' നിന്നെപ്പോലുള്ളവര്‍ കാരണമാണ് ഇറാന്‍ യുദ്ധമുണ്ടായത്, ഡൊണാള്‍ഡ് ട്രംപ് വന്ന് നിന്നെ കൊണ്ടുപോകും. നീ നരകത്തില്‍ പോകും'- അധ്യാപകന്‍ പറയുന്നു. 

വീഡിയോ സമൂഹമാധ്യമങ്ങള്‍ പ്രചരിച്ചതിന് പിന്നാലെയാണ് സര്‍വകലാശാല അധ്യാപകനെ അന്വേഷണ വിധേയമായി സസ്‌പെന്‍ഡ് ചെയ്തത്. വിദ്യാര്‍ഥിയുടെ പരാതി ലഭിച്ചുവെന്നും അന്വേഷണം നടക്കുകയാണെന്നും സര്‍വകലാശാല വൈസ് ചാന്‍സലര്‍ അറിയിച്ചു. 

അതേസമയം, അഫാനെ പിന്തുണച്ച മൂന്ന് വിദ്യാര്‍ഥികളെ പല കാരണങ്ങള്‍ ചൂണ്ടിക്കാട്ടി സസ്‌പെന്‍ഡ് ചെയ്തതായും ആരോപണമുണ്ട്. 

കോണ്‍ഗ്രസിന്റെ വിദ്യാര്‍ത്ഥി വിഭാഗമായ നാഷണല്‍ സ്റ്റുഡന്റ് യൂണിയന്‍ ഓഫ് ഇന്ത്യ( എന്‍എസ്യുഐ) പൊലിസില്‍ പരാതി നല്‍കുകയും പ്രൊഫസര്‍ പരസ്യമായി മാപ്പ് പറയണമെന്ന് ആവശ്യപ്പെടുകയും ചെയ്തു.

PES University has suspended a professor after allegations surfaced that he referred to a Muslim student as a “terrorist.” The incident sparked widespread outrage and raised concerns about discrimination and bias within educational institutions.