മക്ക: റമദാൻ 1447നെ മുൻനിർത്തി സമഗ്ര പ്രവർത്തന പദ്ധതി പ്രഖ്യാപിച്ച് സൗദി അധികൃതർ. ലക്ഷക്കണക്കിന് വിശ്വാസികളുടെ തിരക്ക് കാര്യക്ഷമമായി നിയന്ത്രിക്കാനും സേവന നിലവാരം മെച്ചപ്പെടുത്തുകയും ചെയ്യുകയെന്നതാണ് പദ്ധതിയുടെ പ്രധാന ലക്ഷ്യം.

അടിസ്ഥാന സൗകര്യങ്ങളുടെ ശക്തമായ പരിപാലനം, ബന്ധപ്പെട്ട വകുപ്പുകളുമായുള്ള ഏകോപനം, തീർത്ഥാടകരുടെ  സേവന അനുഭവം സുഗമമാക്കൽ എന്നിവയാണ് പദ്ധതിയുടെ  പ്രധാന മാനദണ്ഡങ്ങൾ. മക്കയിലെ വിശുദ്ധ മസ്ജിദിൽ സൗദി പോർട്ടിക്കോ, സേവന കെട്ടിടങ്ങൾ, വിപുലീകരിച്ച പ്രാർത്ഥന മേഖലകൾ എന്നിവ മുഴുവൻ പദ്ധതിയിൽ ഉൾപ്പെടുത്തിയിട്ടുണ്ട്. മദീനയിലെ നബിയുടെ മസ്ജിദിലും പരിസര പ്രദേശങ്ങളിലുമായി സമാനമായ തയ്യാറെടുപ്പുകൾ പൂർത്തിയാക്കിയിട്ടുണ്ട്.

ജനക്കൂട്ട നിയന്ത്രണത്തിനായി ഇന്ററാക്ടീവ് 3ഡി മാപ്പുകൾ, സന്ദർശക എണ്ണൽ സംവിധാനങ്ങൾ, റിയൽ ടൈം നിരീക്ഷണ സംവിധാനങ്ങൾ, പല ഭാഷകളിലുള്ള ഡിജിറ്റൽ ഗൈഡൻസ് സ്ക്രീനുകൾ തുടങ്ങിയ സ്മാർട്ട് സാങ്കേതികവിദ്യകളും സജ്ജമാക്കിയിട്ടുണ്ട്. 

വൈദ്യുതി, എയർ കണ്ടീഷനിംഗ്, ലൈറ്റിംഗ്, എസ്കലേറ്ററുകൾ, ലിഫ്റ്റുകൾ തുടങ്ങിയ അടിസ്ഥാന സൗകര്യങ്ങൾ പരമാവധി സജ്ജമാക്കിയിട്ടുണ്ടെന്ന് അധികൃതർ അറിയിച്ചു. ശുചിത്വവും ആരോഗ്യ സുരക്ഷയും ഉറപ്പാക്കാൻ പ്രത്യേക പ്രോട്ടോകോളുകളും ശക്തിപ്പെടുത്തിയിട്ടുണ്ട്.

റമദാനിൽ ആരാധകർക്ക് കൂടുതൽ സൗകര്യമൊരുക്കുന്നതിനായി ഇഫ്താർ വിതരണ സംവിധാനം, ശുചീകരണ സേവനങ്ങൾ, സമ്സം വെള്ള വിതരണം, മൊബിലിറ്റി കാർട്ടുകൾ, കുട്ടികൾക്കായുള്ള ഹോസ്പിറ്റാലിറ്റി കേന്ദ്രങ്ങൾ, സന്നദ്ധ പ്രവർത്തക പ്ലാറ്റ്‌ഫോം എന്നിവയും വിപുലീകരിച്ചിട്ടുണ്ട്.

ആത്മീയ അനുഭവം സമ്പുഷ്ടമാക്കുന്നതിനായി സാംസ്കാരിക-വിദ്യാഭ്യാസ പ്രവർത്തനങ്ങൾ, ഖുർആൻ വിതരണം, പ്രദർശനങ്ങൾ, സന്നദ്ധ സേവന പ്രവർത്തനങ്ങൾ എന്നിവയും തുടരുമെന്ന് അധികൃതർ അറിയിച്ചു. റമദാൻ കാലത്ത് ഉയർന്ന തിരക്ക് കൈകാര്യം ചെയ്യാൻ പരിശീലനം ലഭിച്ച ജീവനക്കാരുടെ ശക്തമായ വിന്യാസവും വകുപ്പുകൾ തമ്മിലുള്ള ഏകോപനവും ഉറപ്പാക്കുമെന്ന് അധികൃതർ  വ്യക്തമാക്കി.


Saudi authorities have launched a comprehensive operational plan for Ramadan 1447 covering the Grand Mosque in Makkah and the Prophet’s Mosque in Madinah. The plan focuses on crowd management, smart technologies, infrastructure readiness, and improved services for worshippers, including navigation systems, enhanced facilities, and expanded volunteer support. Officials said the initiative aims to ensure smooth operations, safety, and a better spiritual experience for millions of worshippers during Ramadan.