മക്ക: ലോകമെമ്പാടുമുള്ള ഹലാൽ ഉൽപ്പന്നങ്ങളുടെ നിലവാരം മെച്ചപ്പെടുത്തുന്നതിനായി സഊദി ഫുഡ് ആൻഡ് ഡ്രഗ് അതോറിറ്റിയും സെൻട്രൽ ഇസ്ലാമിക് കൗൺസിൽ ഓഫ് തായ്‌ലൻഡും തമ്മിൽ ധാരണാപത്രം ഒപ്പുവച്ചു. മക്ക ചേംബർ എക്‌സിബിഷൻ ആൻഡ് ഇവന്റ് സെന്ററിൽ നടന്ന മൂന്നാമത് 'മക്ക ഹലാൽ ഫോറ'ത്തോടനുബന്ധിച്ചായിരുന്നു ഈ സുപ്രധാനമായ നീക്കം. റോയൽ കോർട്ട് ഉപദേശകനും കൗൺസിൽ ഓഫ് സീനിയർ സ്കോളേഴ്സ് അംഗവുമായ ശൈഖ് സാദ് ബിൻ നാസർ അൽ-ശത്രി, വാണിജ്യ മന്ത്രി മാജിദ് ബിൻ അബ്ദുല്ല അൽ-ഖസബി, എസ്.എഫ്.ഡി.എ സി.ഇ.ഒ ഹിഷാം ബിൻ സാദ് അൽ-ജദായ് തുടങ്ങി നിരവധി ഉന്നത ഉദ്യോഗസ്ഥർ ചടങ്ങിൽ സംബന്ധിച്ചു.

ALSO READ: റമദാൻ: സഊദിയിലെ സ്കൂൾ പ്രവൃത്തിസമയങ്ങളിൽ മാറ്റം; വിവിധ പ്രവിശ്യകളിലെ പുതുക്കിയ സമയക്രമം ഇങ്ങനെ

സഊദി ഹലാൽ സെന്റർ സി.ഇ.ഒ അബ്ദുൽ അസീസ് അൽ-റഷൂദിയും തായ്‌ലൻഡ് ഇസ്ലാമിക് കൗൺസിൽ സെക്രട്ടറി ജനറൽ മേജർ ജനറൽ സുറിൻ പലാരെയും തമ്മിലാണ് കരാറിൽ ഒപ്പിട്ടത്. ആഗോള വിപണിയിൽ ഹലാൽ ഉൽപ്പന്നങ്ങളുടെ വിശ്വാസ്യത വർദ്ധിപ്പിക്കുക, ഹലാൽ വ്യാപാരം വഴി സമ്പദ്‌വ്യവസ്ഥയെ വൈവിധ്യവത്കരിച്ച് അന്താരാഷ്ട്ര വിപണിയെ ആകർഷിക്കാനുമാണ് ലക്ഷ്യം. വിദ​ഗ്ദരെ വാർത്തെടുക്കാൻ ഹലാൽ അക്കാദമിയുടെ സേവനങ്ങൾ കൂടുതൽ രാജ്യങ്ങളിലേക്ക് വ്യാപിപ്പിക്കും. അന്താരാഷ്ട്ര ഹലാൽ വിപണിയിലെ സഊദിയുടെ സ്ഥാനം കൂടുതൽ കരുത്തുറ്റതാകുമെന്ന് അധികൃതർ വ്യക്തമാക്കി.

The Saudi Food and Drug Authority (SFDA) has signed a strategic MoU with the Central Islamic Council of Thailand at the 3rd Makkah Halal Forum. This partnership aims to strengthen the global halal ecosystem, enhance product reliability, and expand training through the Halal Academy.