ചെന്നൈ: വസ്ത്രങ്ങൾക്കോ ഗൃഹോപകരണങ്ങൾക്കോ ഓഫറുകൾ നൽകുന്നതുപോലെ 'ഒന്നെടുത്താൽ ഒന്ന് ഫ്രീ' എന്ന വമ്പൻ ഓഫറുമായി വാഹന വിപണിയിൽ തരംഗം സൃഷ്ടിക്കുകയാണ് സിട്രൺ (Citroën). സിട്രണിന്റെ ഏറ്റവും പുതിയ പ്രീമിയം എസ്‌യുവിയായ C5 എയർക്രോസ് വാങ്ങുന്നവർക്ക് C3 ഹാച്ച്ബാക്ക് തികച്ചും സൗജന്യമായി നൽകുമെന്നാണ് കോയമ്പത്തൂരിലെ ഒരു ഡീലർഷിപ്പിന്റെ വാഗ്ദാനം. വാഹന വിപണിയിൽ ഇതുവരെ കേട്ടുകേൾവിയില്ലാത്ത ഈ ഓഫർ ഇതിനോടകം തന്നെ സോഷ്യൽ മീഡിയയിൽ വൈറലായിട്ടുണ്ട്.

ALSO READ: വേനൽ ചൂടിൽ എസി ഉപയോഗിക്കുമ്പോൾ സൂക്ഷിക്കുക; ഒരു മണിക്കൂർ കാർ എസി പ്രവർത്തിപ്പിക്കാൻ ഇത്രയും രൂപയാകുമോ

എന്താണ് ഈ കോംബോ ഓഫർ?

തമിഴ്‌നാട്ടിൽ ഏകദേശം 47.15 ലക്ഷം രൂപ ഓൺ-റോഡ് വില വരുന്ന C5 എയർക്രോസ് സ്വന്തമാക്കുന്നവർക്ക്, ഏകദേശം 6 ലക്ഷത്തോളം രൂപ വിലയുള്ള C3-യുടെ ബേസ് വേരിയന്റാണ് അധിക ചിലവില്ലാതെ സ്വന്തമാക്കാൻ സാധിക്കുക. സ്റ്റോക്ക് ക്ലിയറൻസിന്റെ ഭാ​ഗമായാണ് കമ്പനി ഈ വമ്പൻ ഓഫർ പ്രഖ്യാപിച്ചിരിക്കുന്നത്.

ഇന്ത്യൻ വിപണിയിൽ ടൊയോട്ട ഫോർച്യൂണർ, എംജി ഗ്ലോസ്റ്റർ തുടങ്ങിയ കരുത്തരോട് മത്സരിക്കാനെത്തിയ C5 എയർക്രോസിന് പ്രതീക്ഷിച്ച ചലനം ഉണ്ടാക്കാൻ സാധിച്ചിട്ടില്ല എന്നതാണ് യാഥാർത്ഥ്യം. മത്സരങ്ങൾ കടുത്തതോടെയാണ് ഇത്തരമൊരു വമ്പൻ ഇളവിന് കമ്പനി ഇപ്പോൾ മുതിർന്നത്. 2026 ജനുവരിയിൽ ഇന്ത്യയിലാകെ വെറും 2 യൂണിറ്റുകൾ മാത്രമാണ് ഈ മോഡൽ വിറ്റുപോയത്.

2021-ൽ ഇന്ത്യയിലെത്തിയതു മുതൽ ഇതുവരെ 1,132 യൂണിറ്റുകൾ മാത്രമാണ് വിൽക്കാനായത്. ഡീലർഷിപ്പുകളിൽ കെട്ടിക്കിടക്കുന്ന ഈ ഇൻവെന്ററി ഒഴിവാക്കാനാണ് ഇത്തരമൊരു 'കണ്ണഞ്ചിപ്പിക്കുന്ന' ഓഫറുമായി ഡീലർമാർ മുന്നോട്ടുവന്നതെന്നാണ് വിപണി വിദഗ്ധരുടെ വിലയിരുത്തൽ.

ശ്രദ്ധിക്കുക

എന്നാൽ സിട്രൺ ഇന്ത്യ ഔദ്യോഗികമായി ഈ ഓഫർ പ്രഖ്യാപിച്ചിട്ടില്ല. കോയമ്പത്തൂരിലെ ഒരു ഡീലർഷിപ്പാണ് ഈ പരസ്യം പുറത്തിറക്കിയത്. പിന്നീട് വിവാദമായതോടെ അവർ പിൻവലിച്ചതായും റിപ്പോർട്ടുകളുണ്ട്.

സിട്രൺ C5 എയർക്രോസ് സവിശേഷതകൾ

പ്രീമിയം സൗകര്യങ്ങളാൽ സമ്പന്നമാണ് എസ്‌യുവി വിഭാ​ഗത്തിൽ ഉൾപ്പെടുന്ന സിട്രൺ C5. 2.0 ലിറ്റർ ഡീസൽ എഞ്ചിൻ 177 PS പവർ, 400 Nm ടോർക്ക് ഈ എഞ്ചിൻ ഉത്പ്പാദിപ്പിക്കുന്നു. 8-സ്പീഡ് ടോർക്ക് കൺവെർട്ടറിലാണ് ഗിയർബോക്‌സ് സജ്ജീകരിച്ചിരിക്കുന്നത്. ലിറ്ററിന് 17.5 കി.മീ. മൈലേജ് ആണ് കമ്പനി വാ​ഗ്ദാനം ചെയ്യുന്നത്.

പനോരമിക് സൺറൂഫ്, ഹൈഡ്രോളിക് കുഷ്യൻ സസ്പെൻഷൻ, 10-ഇഞ്ച് ടച്ച് സ്ക്രീൻ ഇൻഫോടെയ്ൻമെന്റ് സിസ്റ്റം എന്നിവ വാഹനത്തിന്റെ പ്രത്യേകതകളാണ്

മികച്ച റൈഡ് ക്വാളിറ്റിയും സുഖസൗകര്യങ്ങളും ഉണ്ടെങ്കിലും, ഉയർന്ന വിലയും പരിമിതമായ സർവീസ് സെന്ററുകളുമാണ് സിട്രണിന് വിപണിയിൽ വെല്ലുവിളിയാകുന്നത്. എന്നാൽ ലക്ഷങ്ങളുടെ ഈ പുതിയ ഓഫർ യാഥാർത്ഥ്യമാണെങ്കിൽ, ഒരു പ്രീമിയം കാർ വാങ്ങാൻ ഇരിക്കുന്നവർക്ക് ഇത് ഒരു സുവർണ്ണാവസരം തന്നെയാണ്.

buy one get one free: citroen offer