മുംബൈ: 2026 ടി20 ലോകകപ്പ് സൂപ്പർ 8 പോരാട്ടത്തിൽ ദക്ഷിണാഫ്രിക്കയ്‌ക്കെതിരെ ഇന്ത്യ നേരിട്ട കനത്ത പരാജയത്തിന് പിന്നാലെ സോഷ്യൽ മീഡിയയിൽ പുതിയ തർക്കം പുകയുന്നു. മത്സരത്തിന് മുന്നോടിയായി ഔദ്യോഗിക ബ്രോഡ്കാസ്റ്ററായ സ്റ്റാർ സ്പോർട്സ് പുറത്തിറക്കിയ പരസ്യ വീഡിയോയാണ് ഇപ്പോൾ തിരിച്ചടിച്ചിരിക്കുന്നത്. ഇന്ത്യയുടെ തോൽവിക്ക് പിന്നാലെ ദക്ഷിണാഫ്രിക്കൻ നടിയും ഇൻഫ്ലുവൻസറുമായ തഞ്ച വൂർ (Tanja Vur) പങ്കുവെച്ച പരിഹാസ വീഡിയോ വൈറലായതോടെ സംഭവം വലിയ ചർച്ചയായി.

വിവാദമായ 'കപ്പ് കേക്ക്' പരസ്യം

മത്സരത്തിന് മുന്നോടിയായി സ്റ്റാർ സ്പോർട്സ് പുറത്തിറക്കിയ പരസ്യത്തിൽ ഒരു ഇന്ത്യൻ ആരാധകൻ ദക്ഷിണാഫ്രിക്കൻ ആരാധകനെ പരിഹസിക്കുന്നതായിരുന്നു പ്രമേയം. ഒരു കഫേയിലിരിക്കുന്ന ദക്ഷിണാഫ്രിക്കൻ ആരാധകൻ അവിടുത്തെ അവസാനത്തെ 'കപ്പ് കേക്ക്' കൈക്കലാക്കുന്നു. ഇത് കണ്ട ഇന്ത്യൻ ആരാധകൻ, "കപ്പ് കേക്ക് നിങ്ങൾ തന്നെ എടുത്തോളൂ, കാരണം 2024 കപ്പ് ഞങ്ങൾ നേടിയതാണ്. ഇത്തവണയും ജയം ഞങ്ങൾക്കൊപ്പമായിരിക്കും, നിങ്ങൾ കേക്ക് കഴിച്ച് ഇവിടെ ഇരുന്നോളൂ" എന്ന് പരിഹസിക്കുന്നതാണ് വീഡിയോയിലുണ്ടായിരുന്നത്. ദക്ഷിണാഫ്രിക്കൻ ടീമിനെ അപമാനിക്കുന്ന രീതിയിലുള്ള ഈ പരസ്യത്തിനെതിരെ വലിയ പ്രതിഷേധം ഉയർന്നിരുന്നു.

മത്സരഫലം മാറിയപ്പോൾ പരസ്യം മുങ്ങി

എന്നാൽ കളിക്കളത്തിൽ കാര്യങ്ങൾ മാറിമറിഞ്ഞു. സൂപ്പർ 8 പോരാട്ടത്തിൽ ഇന്ത്യയെ ദക്ഷിണാഫ്രിക്ക ദയനീയമായി പരാജയപ്പെടുത്തിയതോടെ സ്റ്റാർ സ്പോർട്സ് വെട്ടിലായി. വലിയ തോതിൽ ട്രോളുകൾ ഉയർന്നതോടെ ചാനൽ ഔദ്യോഗിക പേജുകളിൽ നിന്ന് ഈ വീഡിയോ പിൻവലിച്ചു.

തിരിച്ചടിച്ച് തഞ്ച വൂർ

ഇന്ത്യയുടെ പരാജയത്തിന് പിന്നാലെയാണ് ദക്ഷിണാഫ്രിക്കൻ നടി തഞ്ച വൂർ രംഗത്തെത്തിയത്. തന്റെ 'കേപ്പ് ടൗൺ ക്രിക്കറ്റ് ക്വീൻ' എന്ന ഇൻസ്റ്റാഗ്രാം അക്കൗണ്ടിലൂടെ അവർ പങ്കുവെച്ച വീഡിയോയിൽ ഇന്ത്യയുടെ തോൽവിയുടെ സ്കോർകാർഡ് പശ്ചാത്തലത്തിൽ കാണിച്ചുകൊണ്ട് അതീവ സന്തോഷത്തോടെ കപ്പ് കേക്ക് കഴിക്കുന്നതാണ് ഉള്ളത്. 'സോ സ്വീറ്റ്' എന്ന പരിഹാസത്തോടെയുള്ള ഈ വീഡിയോ ഇന്ത്യൻ ആരാധകരെ പ്രകോപിതരാക്കിയിട്ടുണ്ട്.