ന്യൂഡല്‍ഹി: രാജ്യത്തെ കൗമാരക്കാരായ പെണ്‍കുട്ടികളില്‍ ഗര്‍ഭാശയമുഖ അര്‍ബുദം തടയുന്നതിനായുള്ള ഹ്യൂമന്‍ പാപ്പിലോമ വൈറസ് (എച്ച്.പി.വി) വാക്‌സിനേഷന്‍ പദ്ധതി കേന്ദ്ര സര്‍ക്കാര്‍ ഉടന്‍ ആരംഭിക്കുന്നു. 2024ലെ കേന്ദ്ര ബജറ്റില്‍ പ്രഖ്യാപിച്ച പദ്ധതി രണ്ട് വര്‍ഷത്തിന് ശേഷമാണ് പദ്ധതി നടപ്പാക്കുന്നത്.

14 വയസ്സുള്ള പെണ്‍കുട്ടികളെ ലക്ഷ്യമിട്ടുള്ള ദേശീയ കാംപയിന്‍ വരും ദിവസങ്ങളില്‍ തന്നെ ആരംഭിച്ച്, അടുത്ത വര്‍ഷത്തോടെ ഏകദേശം 2.6 കോടി വാക്‌സിന്‍ ഡോസുകള്‍ വിതരണം ചെയ്യാനാണ് കേന്ദ്രം ലക്ഷ്യമിടുന്നത്. ആഗോള വാക്‌സിന്‍ സഖ്യമായ ഗാവിയുടെ സഹായത്തോടെ ഒരു കോടിയിലധികം ഡോസുകള്‍ ഇന്ത്യക്ക് ലഭിക്കും. മെര്‍ക്ക് കമ്പനി നിര്‍മ്മിക്കുന്ന ഗാര്‍ഡസില്‍ എന്ന വാക്‌സിനാണ് ഉപയോഗിക്കുന്നത്. ഇതോടെ, എച്ച്.പി.വി വാക്‌സിന്‍ ദേശീയ പ്രതിരോധ കുത്തിവയ്പ്പ് പട്ടികയില്‍ ഉള്‍പ്പെടുത്തിയ ലോകത്തെ 160 ലധികം രാജ്യങ്ങളുടെ നിരയിലേക്ക് ഇന്ത്യയും ചേരും.