തിരുവനന്തപുരം: പശ്ചിമേഷ്യൻ സംഘർഷത്തിൻ്റെ പശ്ചാത്തലത്തിൽ  പ്രവാസി കേരളീയർക്കും കുടുംബങ്ങൾക്കുമായി സജ്ജീകരിച്ച 24 മണിക്കൂറും പ്രവർത്തിക്കുന്ന പ്രത്യേക നോർക്ക ഹെൽപ്‌ ഡെസ്ക് നമ്പറുകളിൽ  ഇന്നലെ വൈകുന്നേരം ആറുമണിവരെ ലഭിച്ചത്  541 കോളുകൾ. വിദേശത്തുനിന്നു 188 പേരും രാജ്യത്തിനുള്ളിൽ നിന്നു 353 പേരും ഹെൽപ്‌ ഡെസ്കിൽ ബന്ധപ്പെട്ടു.  

ALSO READ: തലയ്ക്കു മീതെ മിസൈലുകള്‍.. രാവുറങ്ങാതെ പ്രാര്‍ഥനയോടെ പ്രവാസികള്‍

ഇന്ത്യ — 353, യുഎഇ — 78,ഖത്തർ — 49, ബഹ്റൈൻ — 39, കുവൈത്ത് — 12, ഒമാൻ — 5, സൗദി അറേബ്യ — 3, യുകെ — 2 എന്നിങ്ങനെയാണ് കോളുകൾ ലഭിച്ചത്. സ്ഥിതിഗതികളും ലഭിച്ച വിവരങ്ങളും നോർക്ക വകുപ്പ് സെക്രട്ടറി ടി.വി അനുപമ, നോർക്ക റൂട്ട്സ് ചീഫ് എക്സിക്യുട്ടിവ് ഓഫിസർ അജിത് കോളശ്ശേരി എന്നിവരുടെ  നേതൃത്വത്തിൽ തൈക്കാട് നോർക്ക സെന്ററിൽ ചേർന്ന അവലോകനയോഗം വിലയിരുത്തി. അടിയന്തര സഹായത്തിനായി നോർക റൂട്ട്സ് ഹെൽപ്‌ ഡെസ്കുമായി  91-8802012345 (അന്താരാഷ്ട്ര മിസ്ഡ് കോൾ), 18004253939 (ടോൾ ഫ്രീ നമ്പർ, ഇന്ത്യയിൽ നിന്നു) എന്നീ നമ്പറുകളിൽ ബന്ധപ്പെടാം.