ഗുവാഹത്തി: അസമിലെ ബാർപേട്ടയിൽ സ്ഥിതിചെയ്യുന്ന മുൻ രാഷ്ട്രപതി ഫക്രുദ്ദീൻ അലി അഹമ്മദിന്റെ പേരിലുള്ള മെഡിക്കൽ കോളജ് ആൻഡ് ഹോസ്പിറ്റലിന്റെ പേര് മാറ്റി സംസ്ഥാന സർക്കാർ. 'ബാർപേട്ട മെഡിക്കൽ കോളജ് ആൻഡ് ഹോസ്പിറ്റൽ' എന്നാണ് പുതിയ പേര് നിശ്ചയിച്ചത്. 

2011ൽ സ്ഥാപിതമായ ഈ മെഡിക്കൽ കോളജ് ശ്രീമന്ത ശങ്കർദേവ യൂനിവേഴ്‌സിറ്റി ഓഫ് ഹെൽത്ത് സയൻസസിന് കീഴിലാണ് പ്രവർത്തിക്കുന്നത്. 2012 മുതൽ ബിരുദ മെഡിക്കൽ കോഴ്‌സുകളും 2019 മുതൽ ബിരുദാനന്തര കോഴ്‌സുകളും ഇവിടെ നൽകിവരുന്നുണ്ട്. സംസ്ഥാനത്തെ മിക്ക മെഡിക്കൽ കോളജുകളും അവ സ്ഥിതി ചെയ്യുന്ന സ്ഥലങ്ങളുടെ പേരിലാണ് അറിയപ്പെടുന്നതെന്നെന്നാണ് പേര് മാറ്റത്തിന് മുഖ്യമന്ത്രി ഹിമന്ത ബിശ്വ ശർമ്മ പറഞ്ഞ ന്യായം. അസമിൽ നിന്നുള്ള ആദ്യത്തെ രാഷ്ട്രപതിയായിരുന്നു ഫക്രുദ്ദീൻ അലി അഹമ്മദ്.