മേപ്പാടി: പെന്‍ഷന്‍ വീട്ടിലെത്തുമെന്ന് സംസ്ഥാന സര്‍ക്കാരിന്റെ പ്രഖ്യാപിത ലക്ഷ്യം ചിലര്‍ക്ക് ഗുണമായപ്പോള്‍ മറ്റുചിലര്‍ക്ക് നിരാശമാത്രം ബാക്കിയായി. അഞ്ചു മാസത്തെ കുടിശ്ശികയും ഒരു മാസത്തെ അഡ്വാന്‍സും അടങ്ങിയ പെന്‍ഷന്‍ തുക വീടുകളില്‍ എത്തിക്കുമെന്നായിരുന്നു പ്രഖ്യാപനം. ഇതു പ്രകാരം നിരവധി ആളുകള്‍ക്ക് വീടുകളില്‍ എത്തി സഹകരണ ബാങ്ക് ജീവനക്കാരാണ് തുക എത്തിച്ചു നല്‍കിയത്. എന്നാല്‍ തൊട്ടടുത്ത വീട്ടിലെ ഗുണഭോക്താവ് പെന്‍ഷന്‍ തുക അന്വേഷിച്ച് ബാങ്കിലെത്തിയപ്പോള്‍ ഉദ്യോഗസ്ഥര്‍ കൈമലര്‍ത്തി. തുക ബാങ്കിലെത്തിയില്ലന്നാണ് കൂടുതല്‍ പേര്‍ക്കും ലഭിച്ച മറുപടി. ഇത്തരത്തില്‍ പെന്‍ഷന്‍ തുക കിട്ടാത്ത നൂറുകണക്കിനാളുകള്‍ ജില്ലയിലുണ്ട്. കുടുംബശ്രീ പ്രവര്‍ത്തകരെ ഉപയോഗിച്ച് പെന്‍ഷന്‍ വീട്ടില്‍ കിട്ടേണ്ടവരുടെ ലിസ്റ്റ് തയ്യാറാക്കി എന്നാണ് അധികൃതരുടെ വാദം. അവര്‍ക്ക് മാത്രമേ തുക വീട്ടില്‍ ലഭിക്കൂ എന്നും പറയുന്നു. എന്നാല്‍ അങ്ങിനെ ഒരു സര്‍വെ തങ്ങളുടെ വീടുകളില്‍ എത്തിയിട്ടില്ലന്നാണ് കൂടുതല്‍ പേരും പറയുന്നത്. പോസ്‌റ്റോഫിസ് വഴിയും ബാങ്ക് വഴിയുമായിരുന്നു ഇതുവരെ പെന്‍ഷന്‍ നല്‍കിയിരുന്നത്.
ഇതിലെ കാലതാമസം ഒഴിവാക്കാനാണ് തുക നേരിട്ട് നല്‍കുമെന്ന് പ്രഖ്യാപിച്ചത്. എന്നാല്‍ നടത്തിപ്പിലെ അപാകത പലര്‍ക്കും പെന്‍ഷന്‍ കിട്ടാന്‍ ഇനിയും കാത്തിരിക്കേണ്ടിവരികയാണ്. ഓണ നാളുകളില്‍ വലിയ ആശ്വാസമാകേണ്ട ഒന്നാണ് അനാസ്ഥ കാരണം ഗുണമാകാതെ പോയത്.