മലപ്പുറം: താനൂർ നിയോജകമണ്ഡലത്തിലേക്ക് എൽ.ഡി.എഫ് സ്ഥാനാർഥിയായി പ്രഖ്യാപിച്ച മന്ത്രി വി അബ്ദുറഹ്‌മാൻ തിരൂർ മണ്ഡലത്തിലേക്കു ചേക്കേറിയതോടെയാണ് മണ്ഡലത്തിൽ മത്സരം മുറുകുന്നത്. സിറ്റിങ് എം.എൽ.എ മുസ്ലിംലീഗിലെ കുറുക്കോളി മൊയ്തീനാണ് യു.ഡി.എഫ് സ്ഥാനാർഥി. ഇരുവരും മണ്ഡലത്തിലുള്ളവർ. മലപ്പുറത്ത് എം.എൽ.എമാർ നേർക്കുനേർ മത്സരിക്കുന്ന ഏക മണ്ഡലം കൂടിയാണ് തിരൂർ. 

കുറുക്കോളി മൊയ്തീൻ രണ്ടാം തവണയാണ് യു.ഡി.എഫ് സ്ഥാനാർഥിയായി ജനവിധി തേടുന്നത്. വി അബ്ദുറഹ്‌മാൻ 2016ലും, 2021ലും താനൂരിൽനിന്ന് ഇടത് സ്വതന്ത്രനായി മത്സരിച്ച് കായിക, വഖ്ഫ്, ഹജ്ജ് തീർഥാടന, തപാൽ, റെയിൽവേ വകുപ്പ് മന്ത്രിയായി. എന്നാൽ സ്വതന്ത്ര പരിവേശം ഒഴിവാക്കി ഇത്തവണ തിരൂരിൽ മത്സരിക്കുന്നത് പാർട്ടി ചിഹ്നത്തിലാണ്. 

നേരത്തെ തിരൂർ നഗരസഭാ കൗൺസിലറും വൈസ് ചെയർമാനുമായിരുന്നു അബ്ദുറഹ്‌മാൻ. സ്വന്തം നാട്ടിൽ മത്സരിച്ച് സീറ്റ് പിടിക്കുക എന്ന ലക്ഷ്യവുമായാണ് താനൂരിൽനിന്ന് തിരൂരിലേക്കുള്ള മണ്ഡലമാറ്റം. 

ജന്മനാട്ടിൽ വികസനം എത്തിക്കുക എന്ന ലക്ഷ്യത്തോടെയാണ് മണ്ഡലം മാറി മത്സരിക്കുന്നതെന്ന് അബ്ദുറഹ്‌മാൻ പറയുമ്പോൾ 247 കോടിയുടെ വികസനമാണ് തിരൂരിൽ കൊണ്ടുവന്നതെന്ന് കുറുക്കോളി മൊയ്തീനും പറയുന്നു. തിരൂർ നഗരസഭയും വെട്ടം, തലക്കാട്, തിരുന്നാവായ, ആതവനാട്, കൽപ്പകഞ്ചേരി, വളവന്നൂർ പഞ്ചായത്തുകളും ചേർന്നതാണ് തിരൂർ മണ്ഡലം. മുഴുവൻ തദ്ദേശസ്ഥാപനങ്ങളും ഭരിക്കുന്നത് യു.ഡി.എഫാണ്. അതുകൊണ്ടുതന്നെ എൽ.ഡി.എഫിന് നന്നായി വിയർപ്പൊഴുക്കേണ്ടിവരും.

തിരൂർ നിയമസഭാ ചരിത്രത്തിൽ 16 തവണ നടന്ന തെരഞ്ഞെടുപ്പിൽ 15 തവണയും വിജയിച്ചത് മുസ്ലിംലീഗ് സ്ഥാനാർഥികളാണ്. 2006ൽ മാത്രം മുസ്ലിം ലീഗിലെ ഇ.ടി മുഹമ്മദ് ബഷീർ സി.പി.എമ്മിലെ പി.പി അബ്ദുല്ലക്കുട്ടിയോട് പരാജയപ്പെട്ടു. 

ആകെ വോട്ടർമാർ:2,52,575

സ്ത്രീ: 1,25,965

പുരുഷൻ    :1,26,597

ട്രാൻസ് ജെൻഡർ:13

2021 നിയമസഭ തെരഞ്ഞെടുപ്പ്

ആകെ വോട്ട് : 2,29,493

പോൾ ചെയ്തത്:1,70,851

കുറുക്കോളി മൊയ്തീൻ (ലീഗ്)    : 82,314

ഗഫൂർ പി. ലില്ലീസ് (സി.പി.എം.)    : 75,100

ഡോ.അബ്ദുസലാം (ബി.ജെ.പി): 9097

അശ്റഫ് (എസ്.ഡി.പി.ഐ):2712

മൊയ്തീൻ മീന്താരകത്ത് (സ്വ): 477

നോട്ട :417

ഭൂരിപക്ഷം: കുറുക്കോളി മൊയ്തീൻ    :7214

2016 നിയമസഭ തെരഞ്ഞെടുപ്പ്

ആകെ വോട്ട്-204129

പോൾ ചെയ്തത്-156792

സി മമ്മുട്ടി -(മുസ്‌ലിം ലീഗ്)-73,432

ഗഫീർ പി ലില്ലീസ് (സി.പി.എം)-66371

ഭൂരിപക്ഷം -സി മമ്മുട്ടി -(മുസ്‌ലിം ലീഗ്)-7061

2024 ലോക്സഭ

എം.പി. അബ്ദുസ്സമദ് സമദാനി (ലീഗ്):99468

കെ.എസ്. ഹംസ (സി.പി.എം.): 49138

നിവേദിത സുബ്രഹ്‌മണ്യൻ (ബി.ജെ.പി): 12592

ഭൂരിപക്ഷം-എം.പി. അബ്ദുസ്സമദ് സമദാനി:50,330