അബുദബി: മേഖലയിലെ ഇറാൻ ആക്രമണങ്ങളുമായി ബന്ധപ്പെട്ട യുഎഇയുടെ നിലപാട് ചില മാധ്യമങ്ങൾ തെറ്റായി വ്യാഖ്യാനിച്ചതായി യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അൻവർ ബിൻ മുഹമ്മദ് ഗർഗാഷ്. രാജ്യത്തിന്റെ നിലപാടുകളെ ശരിയായ സാഹചര്യത്തിൽ മനസ്സിലാക്കണമെന്നും അദ്ദേഹം ആവശ്യപ്പെട്ടു. സാധാരണക്കാരുടെ ജീവനും നിർണ്ണായക അടിസ്ഥാന സൗകര്യങ്ങൾക്കും ഭീഷണിയുയർത്തുന്ന ആക്രമണങ്ങളാണ് രാജ്യം നേരിടുന്നതെന്ന് അദ്ദേഹം ചൂണ്ടിക്കാട്ടി.

കഴിഞ്ഞ കുറച്ച് ആഴ്ചകളായി യുഎഇയുടെ ദേശീയ താൽപ്പര്യങ്ങളെയും തന്ത്രപ്രധാനമായ അടിസ്ഥാന സൗകര്യങ്ങളെയും ലക്ഷ്യമിട്ടുള്ള നീക്കങ്ങൾ നടക്കുന്നുണ്ടെന്ന് എക്‌സിലെ പോസ്റ്റിലൂടെ ഗർഗാഷ് വ്യക്തമാക്കി. ഇത്തരം ഭീഷണികളെ ദൃഢനിശ്ചയത്തോടും കാര്യക്ഷമതയോടും കൂടിയാണ് രാജ്യം പ്രതിരോധിക്കുന്നത്. രാജ്യത്തിന്റെ പരമാധികാരവും സുരക്ഷയും സംരക്ഷിക്കുക എന്നത് അഭിമാനകരമായ ഉത്തരവാദിത്തമാണെന്നും അദ്ദേഹം കൂട്ടിച്ചേർത്തു.

ALSO READ: ഇറാന്റെ ആക്രമണശ്രമം തകർത്ത് യുഎഇ പ്രതിരോധസേന: 20 ബാലിസ്റ്റിക് മിസൈലുകളും 37 ഡ്രോണുകളും വെടിവെച്ചിട്ടു; ആക്രമണങ്ങളിൽ പരുക്കേറ്റവരുടെ ആകെ എണ്ണം 178 ആയി

രാഷ്ട്രീയ പരിഹാരത്തിന് മുൻഗണന

മേഖലയിൽ തുടരുന്ന സംഘർഷങ്ങൾക്ക് സൈനിക നടപടികളല്ല, മറിച്ച് രാഷ്ട്രീയ പരിഹാരമാണ് ആവശ്യമെന്ന് യുഎഇ വിശ്വസിക്കുന്നു. താൽക്കാലികമായ ഒത്തുതീർപ്പുകൾ ഭാവിയിൽ കൂടുതൽ അസ്ഥിരതയ്ക്ക് കാരണമായേക്കാം. അതിനാൽ, വരും ദശകങ്ങളിൽ മേഖലയിൽ സുസ്ഥിരമായ സുരക്ഷ ഉറപ്പാക്കാൻ രാഷ്ട്രീയമായ ചർച്ചകൾ അനിവാര്യമാണ്. ഈ കാഴ്ചപ്പാടാണ് രാജ്യത്തിന്റെ നയതന്ത്ര നീക്കങ്ങളെ നയിക്കുന്നതെന്നും ഗർഗാഷ് വ്യക്തമാക്കി.

മേഖലയിലെ സമാധാനാന്തരീക്ഷം തകർക്കുന്ന നീക്കങ്ങൾക്കെതിരെ അന്താരാഷ്ട്ര സമൂഹം ജാഗ്രത പാലിക്കണമെന്നും യുഎഇയുടെ നയങ്ങൾ സമാധാനത്തിനും സുരക്ഷയ്ക്കും വേണ്ടിയുള്ളതാണെന്നും അദ്ദേഹം ഓർമ്മിപ്പിച്ചു.

anwar gargash said media reports misinterpreted the uae’s position on iran attacks. he clarified that the country remains committed to stability, de escalation, and regional security, while urging accurate reporting amid rising tensions in the middle east.