കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴിൽ തീർഥാടനത്തിന് അവസരം ലഭിച്ചവർ മൂന്നാം ഗഡു തുക അടക്കാനുള്ള തീയതി ഈ മാസം ആറ് വരെ കേന്ദ്ര ഹജ്ജ് കമ്മിറ്റി നീട്ടി. വിമാന ടിക്കറ്റ് നിരക്ക് അനുസരിച്ച് ഓരോ  എംബാർക്കേഷൻ പോയിന്റിലും തുക വ്യത്യസ്തമാണ്.

കരിപ്പൂർ എംബാർക്കേഷനിൽ നിന്നുള്ള ഒരു തീർഥാടകന് 91,100 രൂപയും കൊച്ചിയിൽനിന്ന് 69,450 രൂപയും കണ്ണൂരിൽ നിന്നുള്ളവർ 74,600 രൂപയുമാണ് അടക്കേണ്ടത്. നേരത്തെ അടച്ച രണ്ടു ഗഡു തുകയായ 2,77,300 രൂപക്കു പുറമെയാണ് ഇത്. കരിപ്പൂരിൽ ചെറിയ വിമാനങ്ങൾ ആണ് സർവിസിനെന്നതിനാൽ കൊച്ചി,കണ്ണൂർ എംബാർക്കേഷൻ പോയന്റുകളേക്കാൾ നിരക്ക് കൂടുതലാണ്. തീർഥാടകർ അവരുടെ കവർ നമ്പർ ഉപയോഗിച്ച് ഹജ്ജ് കമ്മിറ്റിയുടെ വെബ്സൈറ്റിൽ പരിശോധിച്ചാൽ അടക്കേണ്ട തുക സംബന്ധിച്ച വിവരങ്ങൾ ലഭിക്കും. അപേക്ഷാ ഫോറത്തിൽ ബലികർമത്തിനുള്ള കൂപ്പൺ ആവശ്യപ്പെട്ടവർ, ആ ഇനത്തിൽ 17,280 രൂപ കൂടി അധികം അടക്കണം. ഓരോ കവറിനും പ്രത്യേകമായുള്ള ബാങ്ക് റഫറൻസ് നമ്പർ രേഖപ്പെടുത്തിയ പേയ്മെന്റ് സ്ലിപ് ഉപയോഗിച്ച് സ്റ്റേറ്റ് ബാങ്ക് ഓഫ് ഇന്ത്യ, യൂനിയൻ ബാങ്ക് ഓഫ് ഇന്ത്യ എന്നിവയിൽ ഏതെങ്കിലുമൊന്നിലാണ് പണമടക്കേണ്ടത്. ഓൺലൈനായും തുക അടക്കാം.

ALSO READ: മരണക്കയത്തിൽ 36 മണിക്കൂർ, ചുറ്റും കടൽ മാത്രം; അസം സ്വദേശിക്ക് രണ്ടാം ജന്മം നൽകി കോസ്റ്റ് ഗാർഡ്