മക്കളെ വഴക്കുപറയുന്ന അതേ ഗൗരവത്തില്‍ ഒരു കുരങ്ങനെ ശകാരിക്കുന്ന അമ്മയുടെ വിഡിയോയാണ് ഇപ്പോള്‍ ഇന്റര്‍നെറ്റിലെ പുതിയ താരം. ഭക്ഷണമാണെന്ന് കരുതി സോപ്പ് കൈയിലിട്ട് ഉരുട്ടുകയായിരുന്നു കുരങ്ങന്‍. എന്നാല്‍ ഇത് കണ്ട ആ അമ്മ വെറുതെ ഇരുന്നില്ല; കൈയിലിരുന്ന ആയുധമായ (സോപ്പ്!) താഴെയിടാന്‍ പറഞ്ഞ് അമ്മയും കളത്തിലിറങ്ങി.

സോപ്പ് കണ്ട് ഭക്ഷണമാണെന്ന് തെറ്റിദ്ധരിച്ച കുരങ്ങന്‍ അത് കടിച്ചു തിന്നാന്‍ ശ്രമിക്കുകയാണ്. ആ സമയത്താണ് നമ്മുടെ അമ്മ നായികയുടെ എന്‍ട്രി.

സ്‌നേഹശകാരമായിരുന്നു പിന്നെ, 'ഇടടാ അത് താഴെ' എന്ന് സ്വന്തം കുട്ടികളോടെന്ന പോലെ ആജ്ഞാപിച്ചുകൊണ്ട് അമ്മ അവിടേക്ക് എത്തി. അമ്മയുടെ ഗൗരവം കണ്ട കുരങ്ങന്‍ ഒന്ന് അമ്പരന്നെങ്കിലും സംഗതി പന്തിയല്ലെന്ന് അവനും മനസ്സിലായി.
വെറുതെ വഴക്ക് പറയുക മാത്രമല്ല, പാവം കുരങ്ങന് വിശക്കുന്നുണ്ടാകുമെന്ന് കരുതി സ്‌നേഹത്തോടെ ഒരു ഉരുളക്കിഴങ്ങും അമ്മ കുരങ്ങനു വച്ചുനീട്ടി. 'ആ സോപ്പ് അങ്ങ് കളഞ്ഞിട്ട് ഇത് കഴിക്ക്' എന്ന അമ്മയുടെ സ്‌നേഹത്തിന് മുന്നില്‍ കുരങ്ങന്‍ തോറ്റുപോയി. ഒടുവില്‍ സോപ്പ് ഉപേക്ഷിച്ച് ഉരുളക്കിഴങ്ങുമായി കുരങ്ങന്‍ സ്ഥലം വിട്ടു.