അബുദബി: സെർച്ച് എഞ്ചിൻ ഫലങ്ങളിൽ പ്രത്യക്ഷപ്പെടുന്ന വ്യാജ ലിങ്കുകൾക്കും വ്യാജ വെബ്‌സൈറ്റുകൾക്കുമെതിരെ അതീവ ജാഗ്രത പാലിക്കണമെന്ന് യുഎഇ നിവാസികൾക്ക് അബുദബി പൊലിസിന്റെ കർശന മുന്നറിയിപ്പ്. ഉപയോക്താക്കളുടെ വ്യക്തിഗത വിവരങ്ങളും ബാങ്ക് അക്കൗണ്ട് രേഖകളും മോഷ്ടിക്കാൻ സൈബർ കുറ്റവാളികൾ ആകർഷകമായ വ്യാജ ഓൺലൈൻ പരസ്യങ്ങൾ വ്യാപകമായി ഉപയോഗിക്കുന്നുണ്ടെന്ന് പൊലിസ് വ്യക്തമാക്കി.

ഔദ്യോഗിക സോഷ്യൽ മീഡിയ അക്കൗണ്ടുകൾ വഴി പുറത്തുവിട്ട സുരക്ഷാ നിർദ്ദേശങ്ങളിലാണ് അബുദബി പൊലിസ് ഇക്കാര്യം വ്യക്തമാക്കിയത്. യഥാർത്ഥ സർക്കാർ-സ്വകാര്യ സേവന വെബ്‌സൈറ്റുകളെ കൃത്യമായി അനുകരിച്ചാണ് തട്ടിപ്പുകാർ വ്യാജ ലിങ്കുകൾ നിർമ്മിക്കുന്നത്. ഇത് തിരിച്ചറിയാതെ ജനങ്ങൾ തങ്ങളുടെ രഹസ്യ വിവരങ്ങൾ ഇത്തരം സൈറ്റുകളിൽ രേഖപ്പെടുത്തുന്നതോടെയാണ് തട്ടിപ്പിന് ഇരയാകുന്നത്.

അബുദബി പൊലിസിന്റെ 'പ്രോആക്ടീവ് സെക്യൂരിറ്റി' (മുൻകരുതൽ സുരക്ഷാ പദ്ധതി) എന്ന തന്ത്രപരമായ ലക്ഷ്യത്തിന്റെ ഭാഗമായാണ് ഈ ബോധവൽക്കരണം.

സുരക്ഷിതമായിരിക്കാൻ പൊലിസ് നൽകുന്ന നിർദ്ദേശങ്ങൾ

ഔദ്യോഗിക പ്ലാറ്റ്‌ഫോമുകൾ മാത്രം ഉപയോഗിക്കുക: ഏതെങ്കിലും തരത്തിലുള്ള ഓൺലൈൻ പണമിടപാടുകൾ നടത്തുന്നതിന് മുമ്പ് വെബ്‌സൈറ്റുകളുടെ ആധികാരികത പൂർണ്ണമായി ഉറപ്പുവരുത്തുക. ഔദ്യോഗിക ആപ്പുകളും ഡിജിറ്റൽ പ്ലാറ്റ്‌ഫോമുകളും മാത്രം ആശ്രയിക്കുക.

ലിങ്കുകളിൽ തൊടരുത്: അജ്ഞാത ഉറവിടങ്ങളിൽ നിന്ന് വരുന്ന സംശയാസ്പദമായ ലിങ്കുകളിൽ ഒരു കാരണവശാലും ക്ലിക്ക് ചെയ്യരുത്.

രഹസ്യ വിവരങ്ങൾ പങ്കുവെക്കരുത്: ഉറപ്പില്ലാത്ത വെബ്‌സൈറ്റുകളിലോ വ്യക്തികൾക്കോ നിങ്ങളുടെ ബാങ്കിംഗ് വിവരങ്ങൾ, പാസ്‌വേഡുകൾ, മറ്റ് രഹസ്യ രേഖകൾ എന്നിവ ഓൺലൈൻ വഴി കൈമാറരുത്.

തട്ടിപ്പുകൾ എങ്ങനെ റിപ്പോർട്ട് ചെയ്യാം?

ഡിജിറ്റൽ സുരക്ഷ വർദ്ധിപ്പിക്കുന്നതിനും സമൂഹത്തെ ഇത്തരം മാഫിയകളിൽ നിന്ന് സംരക്ഷിക്കുന്നതിനും സംശയാസ്പദമായ ഓൺലൈൻ പ്രവർത്തനങ്ങൾ ഉടനടി റിപ്പോർട്ട് ചെയ്യേണ്ടത് അനിവാര്യമാണെന്ന് പൊലിസ് ഓർമ്മിപ്പിച്ചു. പൊതുജനങ്ങൾക്ക് താഴെ പറയുന്ന മാർഗ്ഗങ്ങളിലൂടെ വിവരങ്ങൾ കൈമാറാം.

അമാൻ (Aman) സേവനം: 8002626 എന്ന ടോൾ ഫ്രീ നമ്പറിൽ വിളിച്ച് വിവരങ്ങൾ അറിയിക്കാം.

എസ്എംഎസ് വഴി: 2828 എന്ന നമ്പറിലേക്ക് ടെക്സ്റ്റ് സന്ദേശം അയക്കാം.

സ്മാർട്ട് ആപ്പ്: അബുദബി പൊലിസിന്റെ ഔദ്യോഗിക സ്മാർട്ട് ആപ്ലിക്കേഷൻ വഴിയും പരാതികൾ സമർപ്പിക്കാവുന്നതാണ്.

സൈബർ ഭീഷണികളിൽ നിന്ന് സ്വയം പരിരക്ഷിക്കാൻ പൊതുജനങ്ങളുടെ അവബോധവും കൃത്യമായ സമയത്തുള്ള റിപ്പോർട്ടിംഗുമാണ് ഏറ്റവും വലിയ ആയുധമെന്ന് പൊലിസ് ആവർത്തിച്ചു വ്യക്തമാക്കി.

ALSO READ: യു.എ.ഇയിൽ ചുട്ടുപൊള്ളുന്നു; വരും ദിവസങ്ങളിൽ താപനില 47 ഡിഗ്രി വരെ ഉയർന്നേക്കും | UAE Weather updates

Abu Dhabi Police have urged residents to stay alert against fraudulent links used to steal money and personal data, while highlighting dedicated channels for reporting cyber scams.