കൊച്ചി: മാട്രിമോണിയൽ സൈറ്റുകൾ വഴി സൗഹൃദം സ്ഥാപിച്ച് ലക്ഷങ്ങൾ തട്ടിയെടുക്കുന്ന അന്താരാഷ്ട്ര സൈബർ ക്രിമിനൽ സംഘത്തിലെ പ്രധാനി കൊച്ചി സിറ്റി പൊലിസിന്റെ പിടിയിലായി. പാലക്കാട് തൂത സ്വദേശി അബ്ദുറഹ്മാനെയാണ് ഡൽഹിയിൽ വെച്ച് പൊലിസ് അറസ്റ്റ് ചെയ്തത്. എറണാകുളം സ്വദേശിയായ ഡോക്ടറിൽ നിന്ന് ഓൺലൈൻ ട്രേഡിങ്ങിന്റെ പേരിൽ 37 ലക്ഷം രൂപ തട്ടിയെടുത്ത കേസിലാണ് നിലവിൽ നടപടി. ഇതോടെ ഈ കേസിൽ അറസ്റ്റിലായവരുടെ എണ്ണം നാലായി. മലപ്പുറം സ്വദേശി ഫൈസൽ, അരൂർ സ്വദേശി സൂരജ്, ആദിൽ എന്നിവരെ പൊലിസ് നേരത്തെ പിടികൂടിയിരുന്നു.

ALSO READ: ലക്ഷ്യം വെച്ചത് മതവിശ്വാസങ്ങളെ; ഇന്ത്യയിൽ ബലിപെരുന്നാൾ ആഘോഷങ്ങൾക്കിടെ മുസ്‌ലിംകൾക്കെതിരെ നടന്നത് ഞെട്ടിക്കുന്ന അതിക്രമങ്ങളെന്ന് റിപ്പോർട്ട്

തട്ടിപ്പ് ചൈനീസ് സംഘത്തിന്റെ മേൽനോട്ടത്തിൽ; കംബോഡിയ കേന്ദ്രം

കംബോഡിയ ആസ്ഥാനമായി പ്രവർത്തിക്കുന്നതും ചൈനീസ് പൗരന്മാർ നിയന്ത്രിക്കുന്നതുമായ വൻകിട സൈബർ മാഫിയയുടെ സജീവ പങ്കാളിയാണ് പിടിയിലായ അബ്ദുറഹ്മാനെന്ന് പൊലിസ് വ്യക്തമാക്കി. 2022 മുതൽ ഇയാൾ ഈ അന്താരാഷ്ട്ര സംഘത്തിനൊപ്പം പ്രവർത്തിച്ചുവരികയാണ്. മുൻപ് ലോൺ ആപ്പുകൾ, വ്യാജ ട്രേഡിങ് ആപ്പുകൾ എന്നിവ വഴി സോഷ്യൽ മീഡിയയിലൂടെയായിരുന്നു ഇവരുടെ തട്ടിപ്പ്. എന്നാൽ, ഇത്തരം രീതികളെക്കുറിച്ച് പൊതുജനങ്ങൾക്കിടയിൽ അവബോധം ശക്തമായതോടെയാണ് സംഘം തട്ടിപ്പിനായി പുതിയ വഴി തിരഞ്ഞെടുത്തത്.

മാട്രിമോണിയൽ പ്രൊഫൈലുകൾ പുതിയ കെണി

മാട്രിമോണിയൽ സൈറ്റുകളിൽ യുവതികളുടെയോ യുവാക്കളുടെയോ പേരിൽ ആകർഷകമായ വ്യാജ പ്രൊഫൈലുകൾ നിർമിച്ചാണ് ഇവർ ഇരകളെ കണ്ടെത്തുന്നത്. തുടർന്ന് സന്ദേശങ്ങളിലൂടെ വിശ്വസ്തതയും സൗഹൃദവും സ്ഥാപിച്ചെടുക്കും. പരസ്പരം വിശ്വാസത്തിലാകുന്നതോടെ, 'ഭാവി സുരക്ഷിതമാക്കാം' എന്ന് വിശ്വസിപ്പിച്ച് വൻ ലാഭം വാഗ്ദാനം ചെയ്ത് വ്യാജ ട്രേഡിങ് ആപ്പുകളിൽ പണം നിക്ഷേപിക്കാൻ ഇരകളെ പ്രേരിപ്പിക്കുന്നതാണ് ഇവരുടെ പുതിയ തന്ത്രം.

ഇത്തരത്തിൽ തട്ടിയെടുക്കുന്ന പണം നേരിട്ട് ചൈനീസ് സംഘത്തിലേക്ക് പോവുകയല്ല ചെയ്യുന്നത്. പകരം ഇന്ത്യയിലെ വിവിധ ആളുകളുടെ പേരിൽ വ്യാജമായി നിർമിച്ച 'മ്യൂൾ' (Mule) ബാങ്ക് അക്കൗണ്ടുകളിലേക്കാണ് പണം എത്തിക്കുന്നത്. ഇന്ത്യയിലുള്ള ഏജന്റുമാർ ഈ അക്കൗണ്ടുകളിൽ നിന്ന് പണം പിൻവലിച്ച ശേഷം, അത് ക്രിപ്റ്റോ കറൻസിയാക്കി മാറ്റി അന്താരാഷ്ട്ര സംഘത്തിന് കൈമാറുകയാണ് ചെയ്യുന്നത്. കേസന്വേഷണത്തിന്റെ ഭാഗമായി ഇത്തരത്തിലുള്ള ആയിരത്തോളം വ്യാജ ബാങ്ക് അക്കൗണ്ടുകൾ പൊലിസ് ഇതിനോടകം കണ്ടെത്തുകയും മരവിപ്പിക്കുകയും ചെയ്തിട്ടുണ്ട്.

in a major breakthrough, the kochi city police arrested abdul rahman, a malayali mastermind of an international cyber fraud syndicate, from delhi. the gang, which is operated from cambodia and controlled by chinese nationals, shifted from loan apps to matrimonial sites to target victims.