പത്തനംതിട്ട: കനത്ത മഴയിലും കാറ്റിലും തണ്ണിത്തോട് സെന്റ് ബെനഡിക്‌സ് എം.എസ്.സി സ്‌കൂളിന്റെ മേല്‍ക്കൂര തകര്‍ന്നു വീണു. ഞായറാഴ്ച ഉച്ചയോടെയായിരുന്നു സംഭവം. ശക്തമായ കാറ്റില്‍ മേല്‍ക്കൂരയുടെ ഭാഗങ്ങള്‍ സമീപത്തെ വീട്ടിലേക്ക് പതിച്ചെങ്കിലും ആളപായമൊന്നും റിപ്പോര്‍ട്ട് ചെയ്തിട്ടില്ല. 

അവധി ദിവസമായതിനാല്‍ വിദ്യാര്‍ഥികളും അധ്യാപകരും സ്‌കൂളിലില്ലാതിരുന്നത് വലിയ ദുരന്തം ഒഴിവാക്കി. രാവിലെ മുതല്‍ പത്തനംതിട്ടയുടെ മലയോര മേഖലകളില്‍ ശക്തമായ മഴ തുടരുകയായിരുന്നു. ഉച്ചയോടെ മിന്നല്‍ ചുഴലി അനുഭവപ്പെട്ട സമയത്താണ് സ്‌കൂള്‍ കെട്ടിടത്തിന്റെ മേല്‍ക്കൂര പൂര്‍ണമായും തകര്‍ന്നുവീണത്.

ALSO READ: തൃശൂരില്‍ വീട് കുത്തിത്തുറന്ന് കവര്‍ച്ച; ഗൃഹനാഥനെ കെട്ടിയിട്ട് 45 പവന്‍ സ്വര്‍ണവും പണവും കവര്‍ന്നു

പത്താം ക്ലാസിന്റെ മൂന്ന് ഡിവിഷനുകളും സ്റ്റാഫ് റൂമും പ്രവര്‍ത്തിച്ചിരുന്ന കെട്ടിടത്തിനാണ് കൂടുതല്‍ നാശനഷ്ടമുണ്ടായത്. മേല്‍ക്കൂര തകര്‍ന്നതോടെ ക്ലാസ് മുറികളും മറ്റ് സൗകര്യങ്ങളും വ്യാപകമായി കേടുപാടുകള്‍ സംഭവിച്ചു.

സ്‌കൂളിന് ഫിറ്റ്‌നസ് സര്‍ട്ടിഫിക്കറ്റ് ഉണ്ടായിരുന്നുവെന്നും 2018ല്‍ മേല്‍ക്കൂര മാറ്റി സ്ഥാപിക്കുകയും മറ്റ് നവീകരണ പ്രവര്‍ത്തനങ്ങള്‍ നടത്തുകയും ചെയ്തിരുന്നുവെന്നും പി.ടി.എ ഭാരവാഹികള്‍ അറിയിച്ചു.

സംഭവത്തെ തുടര്‍ന്ന് അധികൃതര്‍ സ്ഥലത്തെത്തി നാശനഷ്ടങ്ങള്‍ വിലയിരുത്തുകയും തുടര്‍നടപടികള്‍ ആരംഭിക്കുകയും ചെയ്തു.

The roof of St. Benedict's MSC School at Thannithode, Pathanamthitta collapsed due to heavy rains and storms. There were no casualties since the school was closed on that day due to holidays.