വയനാട്: ഉറപ്പുകള്‍ പാഴായി. മുണ്ടക്കൈ ഉരുള്‍പൊട്ടല്‍ ദുരന്തബാധിതരുടെ പുനരധിവാസത്തിനായി സര്‍ക്കാര്‍ നല്‍കിയ വാഗ്ദാനങ്ങള്‍ ഇനിയും പൂര്‍ത്തിയായില്ല. ഇത്തവണത്തെ വിഷുവും പുറത്ത്.

വിഷുവിനു മുമ്പ് ടൗണ്‍ഷിപ്പിലെ 178 വീടുകള്‍ കൈമാറുമെന്ന ഉറപ്പ് പാലിക്കപ്പെടാത്തതോടെ, ദുരന്തബാധിതരായ കുടുംബങ്ങള്‍ ഇത്തവണയും വാടകവീടുകളിലും ബന്ധുവീടുകളിലുമായി വിഷു ആഘോഷിക്കേണ്ടി വരുന്നത്.

178 വീടുകളില്‍ വെറും 40 എണ്ണത്തിന്റെ പണി മാത്രമാണ് നിലവില്‍ പൂര്‍ത്തിയായത്. ഡ്രെയിനേജ്, മുറ്റത്തെ പണികള്‍, ഗേറ്റ് എന്നിവയുടെ നിര്‍മ്മാണം പലയിടത്തും ഇഴഞ്ഞുനീങ്ങുകയാണ് ചെയ്യുന്നത്.

പണി പൂര്‍ത്തിയായ വീടുകളിലേക്ക് ഉടന്‍ മാറാന്‍ അധികൃതര്‍ നിര്‍ദേശിച്ചെങ്കിലും നിര്‍മ്മാണം നടക്കുന്ന വീടുകള്‍ക്കിടയില്‍ ഒറ്റപ്പെട്ടു കഴിയാനുള്ള ബുദ്ധിമുട്ട് ദുരന്തബാധിതര്‍ കലക്ടറെ അറിയിച്ചു.

എല്ലാ വീടുകളും സജ്ജമായ ശേഷം ഒരുമിച്ച് മാറാനാണ് ഇവരുടെ തീരുമാനം. വീട് വൈകുന്നതിനൊപ്പം സര്‍ക്കാര്‍ നല്‍കി വന്നിരുന്ന ദിനബത്ത കഴിഞ്ഞ ഒരു മാസമായി മുടങ്ങിയതും ദുരന്തബാധിതരെ കൂടുതല്‍ ദുരിതത്തിലാക്കിയിരിക്കുകയാണ്.

മെയ് മാസത്തിനുള്ളില്‍ പണികള്‍ തീര്‍ക്കുമെന്ന് അധികൃതര്‍ വീണ്ടും ഉറപ്പ് നല്‍കുന്നുണ്ടെങ്കിലും കാലവര്‍ഷം തുടങ്ങുന്നതിന് മുമ്പ് വീടുകള്‍ ലഭിക്കുമോ എന്ന ആശങ്കയിലാണ് കുടുംബങ്ങള്‍. മണ്‍സൂണ്‍ ശക്തിപ്രാപിച്ചാല്‍ നിര്‍മ്മാണ പ്രവര്‍ത്തനങ്ങള്‍ ഇനിയും തടസ്സപ്പെടാന്‍ സാധ്യതയുണ്ടെന്ന കാര്യത്തിലും ഇവര്‍ ഭയപ്പെടുകയാണ്.

The Kerala government’s promise to relocate Mundakkai landslide survivors to the new township by Vishu remains unfulfilled as construction is completed for only 40 out of the 178 planned houses, further worsened by a delay in daily allowances.